ក្រុងញូវយ៉ក: អភិបាលក្រុង ប៊ីល ដេប្លាស៊ីអូ បានប្រកាសកាលពីថ្ងៃចន្ទថា ផ្ដើមពីខែកញ្ញាសិស្សសាលាក្រុងញូវយ៉ក ១,១ លាននាក់នឹងបរិភោគអាហារគ្មានសាច់រៀងរាល់ថ្ងៃចន្ទ។
លោក ដេ ប្លាស៊ីអូ មកពីគណបក្សប្រជាធិបតេយ្យបាននិយាយថា៖ «ការកាត់សាច់ពីរបបអាហារនឹងជួយបង្កើនសុខភាពអ្នកក្រុងញូវយ៉ក និងកាត់បន្ថយបញ្ហាបំពុលបរិស្ថានពីឧស្ម័នផងដែរ»។
កម្មវិធីដែលចាប់ផ្ដើមពីសាលារៀន ប្រូកលីន ១៥ ទីតាំងជិត ១ ឆ្នាំមុនដោយការផ្ដល់របបអាហារពេលព្រឹក និងថ្ងៃត្រង់បួសរៀងរាល់ថ្ងៃចន្ទនឹងពង្រីកទៅបណ្តាញសាលាទាំងអស់។
លោក ម៉ាក ចាមប៊័រ ជានាយកខុទ្ទកាល័យសាលាក្រុងផ្នែកចីរភាពបរិស្ថានបាននិយាយថា៖ «ការកាត់បន្ថយសាច់ពីរបបអាហារគឺជាវិធីសាស្ដ្រដ៏ល្អបំផុតមួយដែលបុគ្គលនីមួយៗកាត់បន្ថយផលប៉ះពាល់បរិស្ថានលើភពផែនដីរបស់យើង»។
សាលារៀនរដ្ឋរាប់រយក្នុងក្រុងសានហ្វ្រានស៊ីស្កូ និងសាលារៀនឯរដ្ឋកាលីហ្វ័រនីញ៉ាបានផ្ដល់ឲ្យសិស្សនូវអាហារ «ថ្ងៃចន្ទគ្មានសាច់» រួចទៅហើយ។ សេចក្តីព្រាងច្បាប់របស់បក្សប្រជាធិបតេយ្យថ្មីប្រចាំរដ្ឋកាលីហ្វ័រនីញ៉ា ថែមទាំងបានស្នើឲ្យសិស្សសាលារដ្ឋចាប់យកជម្រើសអាហារមានតែបន្លែ ផ្លែឈើ មិនមានសាច់ផងដែរ។
ចេមស៍ អូដដូ ចៅសង្កាត់ Staten Island បាននិយាយថា៖ «សម្រាប់អ្នកសើចចំអកចំពោះយុទ្ធសាស្ដ្រនេះ ខ្ញុំសូមផ្ដល់ការណែនាំងាយៗមួយចំនួន។ ចូរក្រឡេកមើលការសិក្សាបែបវិទ្យាសាស្ដ្រ និងមើលទិន្នន័យនានាព្រមទាំងមើលការឡើងទម្ងន់របស់កុមារ។ មើលអ្នកជំងឺទឹកនោមផ្អែមតាំងពីក្មេង មើលតួលេខជាក់ស្ដែងថា កុមារអាយុពី ១២ ទៅ ១៤ ឆ្នាំ ៦៥ ភាគរយកើតជំងឺខ្លាញ់ក្នុងប្រមាត់ទៅហើយ»។
លោកបន្ដថា៖ «អ៊ីចឹងប្រហែលជាលោកអ្នកយល់ឃើញថា យើងមិនអាចធ្វើអ្វីៗដដែលៗរហូតនោះទេរួមទាំង ការទទួលយកនូវគំនិត ថ្ងៃចន្ទអត់សាច់ផងដែរ»៕ HR