តារាសម្តែងស្រីសម្បូរទេពកោសល្យអ្នកនាង ស្វែង សុជាតា បង្ហើរសារថតសកម្មភាពសុខភាព ដែលគាំទ្រដោយសា្ថនទូតថៃ។ ហ្វេសប៊ុក
.jpg)
ភ្នំពេញៈ បង្កការងឿងឆ្ងល់យ៉ាងខ្លាំងក្នុងពេលថ្មីៗនេះ ក៏ស្រាប់តែតារាសម្តែងស្រី ដែលសម្បូរទេពកោសល្យអ្នកនាង ស្វែង សុជាតា បង្ហើរសារឲ្យដឹងពីដំណឹងត្រូវបានស្ថានទូតថៃ ជួយគាំទ្រឲ្យថតពីសកម្មភាពមើលថែទាំសុខភាពខ្លួននៅថៃ តែមិនដឹងថាថតកុន ឬថតស្ប៉តពាណិជ្ជកម្ម។
តារាស្រីដែលទើបតែ បាននាំកូនប្រុស គឺជាចំណងស្នេហ៍ស្វាមីក្មេងជាគ្រូផ្សំថ្នាំឱសថបុរាណ ទៅធ្វើសមាធិនៅឯតំបន់ភ្នំគូលែន កាលពេលថ្មីៗនេះ បានបង្ហោះសារថា៖ «លាហើយភ្នំពេញ! ព្រឹកនេះ ជាមួយនឹងក្រុមការងារជាង ១០ នាក់ បំពេញការងារថតរំឮកពីការទៅពិនិត្យសុខភាពរបស់នាងខ្ញុំកន្លងមកពេលមានជំងឺ ដើម្បីជាបទពិសោធន៍ជូនដល់ប្រជាជនខ្មែរទាំងអស់ឲ្យដឹង និងសូមអរគុណយ៉ាងជ្រាលជ្រៅដល់ស្ថានទូតថៃ និងជើងហោះហើរថៃអ៊ែរម្តងទៀត ដែលជួយយ៉ាងពេញទំហឹងក្នុងនេះ»។
ទោះបីជាយ៉ាងណាសកម្មភាពថតនោះ មិនដឹងថាតើ នេះជាការថតកុនឲ្យផលិតកម្មណា ឬថតស្ប៉តពាណិជ្ជកម្មឲ្យក្រុមហ៊ុនអ្វីទេ ខណៈអ្នកនាង ស្វែង សុជាតា ដែលមានស្វាមីវ័យក្មេងជាគ្រូផ្សំឱសថបុរាណ ទើបជានាគ្នាឡើងវិញក្រោយពីបែកធ្លាយត្រូវប្តីវាយបែកមុខមាត់ ក៏ធ្លាប់នាំគ្នាទៅកាន់សីល នៅតំបន់វិបស្សនាមួយ នៅភូមិជន្ទល់ ឃុំឃ្លាំងមឿង ស្រុកខ្សាច់កណ្តាល ខេត្តកណ្តាល មិនបានបកស្រាយឲ្យភ្នំពេញប៉ុស្តិ៍ដឹងនោះទេដោយមិនអាចទំនាក់ទំនងបានឡើយ។
ខណៈពេលបច្ចុប្បន្ននេះគេតែងតែឃើញស្វាមីអ្នកនាង ស្វែង សុជាតា Lives វីដេអូ តាមហ្វេសប៊ុក ប្រកាសផ្សាយពីដំណឹងបន្តលក់ថ្នាំឱសថបុរាណ ដូចកាលពីមុន គ្រាន់តែជាការប្រកបរបរកំប៉ិកកំប៉ុកលក្ខណៈគ្រួសារប៉ុណ្ណោះ ហើយតារាស្រីរូបនេះ ក៏មិនទាន់បានប្រកាសថាបោះបង់ចោលការងារសិល្បៈថតកុននោះដែរ៕
