ក្រុងហុងកុង៖ ស្ថិតនៅសួនច្បារដ៏ស្ងាត់ជ្រងំ ម្លប់អគារខ្ពស់សន្លឹមបានជះស្រមោលលើគ្រូបង្ហាត់កីឡា គ្រីស្ទិន ហេនហ្វត ខណៈនាងកំពុងធ្វើចលនាមុខកាមេរ៉ាទូរស័ព្ទ ដើម្បីឲ្យប្រិយមិត្តអនុវត្តតាមនៅផ្ទះរៀងៗខ្លួន។
និយាយបណ្ដើរ ធ្វើចលនាបណ្ដើរ គ្រូបង្ហាត់កីឡាអាយុ ៣៣ ឆ្នាំរូបនេះបន្លឺប្រាប់សិស្សតាមអនឡាញថា៖ «តោះ! អ្នកទាំងអស់គ្នា យើងនឹងចាប់ផ្ដើមលំហាត់ប្រាណរាងកាយ ១០ នាទី ដែលអ្នកអាចធ្វើនៅផ្ទះ ទោះជាស្ថិតនៅបន្ទប់តូចចង្អៀតក្ដី»។
នេះ គឺជាសកម្មភាពដែលត្រូវបានយកទៅអនុវត្តតៗគ្នាជុំវិញពិភពលោកអំឡុងពេលមានការរីករាលដាលនៃវីរុសកូរ៉ូណា។
ប្រជាជន ៤៤ ភាគរយ ឬ ៣,៤ ពាន់លាននាក់ទូទាំងពិភពលោក ត្រូវសម្ងំនៅក្នុងផ្ទះការពារខ្លួន និងចូលរួមកាត់បន្ថយអត្រាឆ្លង។
អ្នកដែលនៅផ្ទះមួយចំនួន មិនដឹងថាតើពួកគេគួរធ្វើអ្វី អំឡុងពេលប៉ុន្មានសប្ដាហ៍ ឬអាចថាប៉ុន្មានខែខាងមុខនេះ ដើម្បីរក្សាសុខភាពឲ្យរឹងមាំ។
ប្រជាជនហុងកុង ដែលភាគច្រើនរស់នៅផ្ទះល្វែងតូចចង្អៀត បានលើកឡើងពីបញ្ហាកង្វះទីធ្លាធ្វើចលនាលំហាត់ប្រាណ និងសកម្មភាពកីឡានានា។
ប៉ុន្តែគ្រូបង្វឹកជនជាតិកាណាដា គ្រីស្ទិន ហេនហ្វត បានពន្យល់ថា៖ «ពិតណាស់ ១០០ ភាគរយ គឺអ្នកពិតជាអាចថែរាង និងសុខភាពមាំមួន ទោះជាអ្នកនៅផ្ទះតូចចង្អៀតក្ដី»។
អ្នកម្ដាយកូន ១ ដែលរស់នៅក្រុងហុងកុងអស់ជាង ៦ ឆ្នាំមកហើយនេះ បានបញ្ជាក់ទៀតថា៖ «សំខាន់ គឺអ្នកចេះច្នៃទីតាំង និងចលនា»។
ផ្ទះសម្បែងរបស់អ្នកក្រុងហុងកុង ជាមធ្យមមានផ្ទៃក្រឡាត្រឹមតែ ១៦ ម៉ែត្រការ៉េ ឬ ៤ ម៉ែត្រ ៤ ជ្រុង។
យ៉ាងណាមិញ អ្នកគ្រូ ហេនហ្វត បានលើកទឹកចិត្តថា៖ «ជឿខ្ញុំចុះ បើអ្នកអាចហាត់ប្រាណក្នុងផ្ទះនៅទីក្រុងហុងកុងបាន ទៅដល់ណាក៏អ្នកអាចថែសុខភាពរាងកាយបានដែរ»។
កន្លងមក មានកីឡាករល្បីៗ រួមទាំងអ្នកនិយមហាត់កីឡាបានធ្វើឲ្យផ្អើលបណ្ដាញសង្គម អំឡុងពេលមានការបិទចរាចរណ៍ក្នុងទីក្រុង។
អ្នកខ្លះរត់ម៉ារ៉ាតុងក្នុងបន្ទប់គេង រីឯអ្នកខ្លះទៀតយកតុកៅអី ធ្វើជាឧបករណ៍ហាត់ប្រាណជាដើម។
ក្នុងចំណោមកូនសិស្សរបស់អ្នកគ្រូ ហេនហ្វត, អាលីស៊ុន យឿន បាននិយាយថា ក្រៅពីរៀនហាត់ប្រាណតាមអនឡាណ នាងក៏បានប្រើប្រាស់បច្ចេកវិទ្យា Zoom Video ដើម្បីហាត់ជាក្រុមជាមួយមិត្តភ័ក្ដិផងដែរ។
បុគ្គលិកបម្រើការផ្នែកទីផ្សារ វ័យ ៣២ ឆ្នាំ ដែលផ្អាកទៅការិយាល័យមកបំពេញការងារចិញ្ចឹមឆ្នាំបាយនៅផ្ទះ រូបនេះបានបន្តទៀតថា៖ «ខ្ញុំចាប់ផ្ដើមហាត់ប្រាណនៅផ្ទះប្រមាណជា ៧ ទៅ ៨ សប្ដាហ៍ហើយ»។
នាងបន្តទៀតថា៖ «យើងគ្រាន់តែជ្រើសរើសយកចលនាណាងាយៗ សាមញ្ញៗ ហើយអនុវត្ត ១០ ទៅ ១៥ នាទី ពត់កាច់ខ្លួននោះក៏ល្អដែរ»។
អាលីស៊ុន បន្តទៀតថា៖ «ធ្វើត្រឹមប៉ុណ្ណឹងបានវាជួយកម្ដៅសាច់ដុំ និងអាចឲ្យយើងជក់ហាត់ថែមទៀត»។
ការបង្រៀនហាត់ប្រាណតាមអនឡាញដោយអ្នកគ្រូហេនហ្វត មិនមានការគិតប្រាក់ពីសិស្សទេ ទោះជានាងថាគ្រូកីឡាគ្រប់គ្នាកំពុងតែប្រឈមនឹងបញ្ហាចំណូលព្រោះជំងឺឆ្លងនេះ។
នាងត្អូញត្អែរថា៖ «ខ្ញុំពិតជាខាតបង់បាត់ចំណូលច្រើនមែនទែន»។
ប៉ុន្តែនាងលើកទឹកចិត្តខ្លួនឯងថា៖ «យើងត្រូវឆ្លងកាត់រឿងនេះទាំងអស់គ្នា ហើយខ្ញុំរីករាយនឹងជួយអ្នកទាំងអស់គ្នាហាត់ប្រាណលើកដៃជើង ថែទាំសុខភាពទាំងអស់គ្នា»៕ AFP