ភ្នំពេញៈ ទិវាជាតិអំណានលើកទី ៤ ដែលបានរៀបចំឡើងចំនួន ៣ ថ្ងៃចាប់ពីថ្ងៃទី ៩ ដល់ ១១ ខែមីនានេះបានបិទបញ្ចាប់ដោយការចងចាំ និងភាពសប្បាយរីករាយដោយមានការចូលរួមពីប្រជាពលរដ្ឋសិស្សនិស្សិតប្រមាណជាង ៦៧ ០០០ នាក់ជាមួយនឹងចែកចាយ និងលក់សៀវភៅយ៉ាងច្រើនចំនួនរាប់សិបម៉ឺនក្បាលផងដែរ។ នេះបើយោងតាមក្រុមអ្នកស្ម័គ្រចិត្តរក្សាសន្តិសុខសណ្ដាប់ធ្នាប់បានឲ្យដឹងនៅរសៀលថ្ងៃបញ្ចប់ទិវាជាតិអំណាន។
ស្របគ្នានេះគេសង្កេតឃើញថា ទិវាជាតិអំណានមានការរៀបចំសណ្តាប់ធ្នាប់បានល្អដែលមានការចូលរួមពីក្រុមយុវជនស្ម័គ្រចិត្តយ៉ាងសស្រោកសស្រាំ។
និស្សិតពេទ្យ ១ រូបកញ្ញា ហម សុម៉ានិត អាយុ ២០ ឆ្នាំជាអ្នកស្ម័គ្រចិត្តក្នុងក្រុមរក្សាសន្តិសុខសណ្តាប់ធ្នាប់ និងពិធីនៃទិវាជាតិអំណានយល់ថា៖ «ខ្ញុំយល់ថា ក្នុងនាមជាយុវជនគួរតែចូលរួមចំណែកលើកកម្ពស់ការអាន និងអាចមកចូលរួមក្នុងការទិញសៀវភៅក្នុងពិព័រណ៍សៀវភៅអ៊ីចឹងៗ»។
កញ្ញាបន្តទៀតថា៖ «ដូចខ្ញុំជានិស្សិតពេទ្យការអានពិតជាសំខាន់មែនទែនការអានអាចបង្កើនចំណេះដឹងអាចឲ្យយើងដឹងពីអ្វីៗជាច្រើនទៀត ហើយក៏អាចពង្រឹងនូវក្រមសីលធម៌វិជ្ជាជីវៈបានផងដែរ»។
ការប្រមូលផ្ដុំស្ដង់សៀវភៅដ៏សម្បូរបែបដែលផ្ដល់ភាពងាយស្រួលដល់អ្នកចូលរួមក៏ជាកត្តាសំខាន់ដែរ។
កញ្ញា ឆោម សុវណ្ណដា និស្សិតឆ្នាំទី ១ ផ្នែករដ្ឋបាលសាធារណៈដែលបានចូលរួមក្នុងទិវាជាតិអំណាននេះបានប្រាប់ឲ្យ ភ្នំពេញ ប៉ុស្តិ៍ ដឹងថា៖ «ខ្ញុំមានអារម្មណ៍រំភើបមែនទែននៅពេលដែលខ្ញុំមកកាន់ទីនេះផ្ទាល់។ ថ្ងៃហ្នឹងគឺជាថ្ងៃចុងក្រោយហើយគ្រាន់តែចូលមកដល់ខ្លោងទ្វារភ្លាមខ្ញុំមានអារម្មណ៍ថា រំភើបខ្លាំង ព្រោះឃើញមនុស្សជាច្រើន សិស្សនិស្សិត និងលោកគ្រូអ្នកគ្រូដែលបានមកទីនេះ ហើយគាត់កាន់សៀវភៅទៅវិញយ៉ាងច្រើន ហើយខ្ញុំក៏ចង់បានសៀវភៅនៅទីនេះឲ្យបានច្រើនដែរណាមួយគេមានបញ្ចុះតម្លៃហើយខ្ញុំគិតថាវាល្អសម្រាប់ប្រជាជន និងសិស្សនិស្សិតនៅកម្ពុជា»។
និស្សិតផ្នែករដ្ឋបាលសាធារណៈរូបនេះក៏ស្នើឲ្យមានការតាំងពិព័រណ៍ ឬទិវាអំណានឲ្យបានជារៀងរាល់ឆ្នាំផងដែរ ព្រោះកញ្ញាយល់ថាកម្មវិធីនេះមានល្អ និងមានសារៈសំខាន់ខណៈដែលប្រជាពលរដ្ឋអាចមករកសៀវភៅបានជាច្រើន និងមិនបាច់ត្រូវធ្វើដំណើរឆ្ងាយម្យ៉ាងទៀតមានការបញ្ចុះតម្លៃផងដែរ។
នៅក្នុងទិវាជាតិអំណានលើកទី ៤ នេះមានការតាំងសៀវភៅទាំងអស់ចំនួន ៦៨ ស្តង់ និងមានការចែកចាយ និងដាក់លក់សៀវភៅជាច្រើនប្រភេទដូចជា ប្រវត្តិសាស្ត្រខ្មែរច្បាប់សេដ្ឋកិច្ច ការបណ្តុះការគិត គំនិតជោគជ័យ អក្សរសិល្ប៍ខ្មែរ និងមានសៀវភៅកុមារជាច្រើនរឿងព្រេង រឿងនិទាន រូបត្លុក និងគំនូរផាត់ពណ៌ផ្សេងៗរួមទាំងសៀវភៅជាភាសាបរទេសជាច្រើនផ្នែកទៀតសម្រាប់អ្នកដែលនិយមអានសៀវភៅ។
កញ្ញា សុខ សភក្ត្រនាថ ប្រធានគ្រប់គ្រងសួនអំណានដែលជាកន្លែងមួយសម្រាប់ចែកចាយសៀវភៅឥតគិតថ្លៃដល់អ្នកចូលរួមបានសង្កេតឃើញថា៖ «សម្ទុះរបស់យុវជនខ្មែរទៅលើការអានសៀវភៅខ្ញុំសង្កេតឃើញថា មានការកើនឡើងយ៉ាងខ្លាំងរយៈប៉ុន្មានឆ្នាំចុងក្រោយហ្នឹងរហូតមកដល់ទិវាជាតិអំណាននេះគឺកាន់តែមានការកើនច្រើនទៀត»។
កញ្ញាបន្តទៀតថា៖ «ពួកគាត់បានចូលរួមជាមួយយើងមកអានសៀវភៅ មកលេងល្បែងល្បងប្រាជ្ញាអីផ្សេងៗទាក់ទងជាមួយការអានសៀវភៅ ហើយពួកខ្ញុំក៏មានការចែកជូនសៀវភៅដល់គាត់ដើម្បីឲ្យគាត់អាចបង្កើនចំណេះដឹងដោយសារតែគាត់ចូលចិត្តអានសៀវភៅ»៕
វីដេអូ៖