ក្រុងទ្រីស័រ៖ កិច្ចខិតខំប្រឹងប្រែងរបស់អ្នកដុតនំ និងចុងភៅនៅភាគខាងត្បូងប្រទេស ឥណ្ឌា កាលពីសប្ដាហ៍មុន កំពុងរង់ចាំកត់ត្រាចូលបញ្ជីហ្គីណេស ជាមួយសមិទ្ធផលនំខេកប្រវែង ៦,៥ គីឡូម៉ែត្រ ជានំដ៏វែងបំផុតក្នុងលោក។
នំខេកដ៏វែងអន្លាយនេះត្រូវបានលាបក្រែមសូកូឡា នៅលើតុរាប់ពាន់តម្រៀបគ្នានៅវិថីនៃក្រុងទ្រីស័រ រដ្ឋឆ្នេរសមុទ្រ ខេរ៉ាឡា ប្រទេស ឥណ្ឌា។
នំខេករសជាតិវ៉ានីឡា និងសូកូឡា នេះមានកម្រាស់ ១០ សង់ទីម៉ែត្រ និងកម្ពស់ ១០ សង់ទីម៉ែត្រ ហើយលាតសន្ធឹងដាច់កន្ទុយភ្នែក ក្នុងទម្ងន់សរុប ២៧ ០០០ គីឡូក្រាម។
នំខេកបំបែកឯតទគ្គកម្មវែងបំផុតនេះ ជាញើសឈាមរបស់អ្នកដុតនំ និងចុងភៅ ១ ៥០០ នាក់ ក្នុងសម្លៀកបំពាក់ពណ៌ស។ ពួកគេបានប្រើស្ករ និងម្សៅអស់ ១២ ០០០ គីឡូក្រាម និងចំណាយពេលជិត ៤ ម៉ោង ដើម្បីតម្រៀបនំ និងស្រោបក្រែមបន្តគ្នា។
កម្មវិធីធ្វើនំខេកវែងបំផុតនេះត្រូវបានរៀបចំដោយសមាគមអ្នកដុតនំប្រចាំរដ្ឋខេរ៉ាឡា ហើយសកម្មភាពដ៏មមាញឹកនេះត្រូវបានចោមរោមទស្សនាដោយមហាជនកុះករ។
អគ្គលេខាធិការសមាគម Naushad បានឲ្យដឹងថា ក្រុមការងារហ្គីណេសបានធ្វើការវាស់វែងនំខេកថា មានប្រវែង ៦,៥ គីឡូម៉ែត្រ ប៉ុន្តែការបញ្ជាក់ពីប្រវែងនេះនៅពុំទាន់ជាលក្ខណៈផ្លូវការ។
ប៉ុន្តែលោកថា៖ «នេះជាកិច្ចការស្ដែងពីជំនាញផ្នែកនំបង្អែម ទៅកាន់ពិភពលោក ហើយយើងក៏ធានាពីអនាម័យ និងរសជាតិផងដែរ»។
បើការផ្ទៀងផ្ទាត់ប្រវែងនេះពិតជាត្រឹមត្រូវ នំខេកឥណ្ឌារបស់សមាគមអ្នកដុតនំប្រចាំរដ្ឋខេរ៉ាឡា នឹងផ្ដួលកំណត់ត្រាចាស់របស់ក្រុមអ្នកដុតនំជនជាតិនៅតំបន់ ជីស៊ី ដែលបានធ្វើនំខេកផ្លែឈើប្រវែង ៣,២ គីឡូម៉ែត្រ កាលពីឆ្នាំ ២០១៨៕ AFP