ក្រុងធីមពូ៖ ប៊ូតង់ដាក់ឲ្យដំណើរការ «ការបង់ថ្លៃអភិវឌ្ឍនិរន្ដភាព» សម្រាប់ភ្ញៀវទេសចរក្នុងតំបន់ក្រោយពីការកើនឡើងនៃចំនួនភ្ញៀវឥណ្ឌា ដែលបានបង្កជាក្ដីបារម្ភចំពោះប្រព័ន្ធអេកូឡូស៊ីដ៏ពិសេសប្រចាំទឹកដីហិមពាន្ដមួយនេះ។
ភ្ញៀវទេសចរភាគច្រើនបានចាយប្រាក់ ២៥០ ដុល្លារ ក្នុង ១ ថ្ងៃ នៅរដូវសម្បូរភ្ញៀវ រួមទាំងការចាយវាយលើអាហារដឹកជញ្ជូន និងការស្នាក់នៅ ដើម្បីមកលេងប្រទេសដែលមានប្រជាជនតែ ៧៥ ម៉ឺននាក់ ដ៏ល្បីល្បាញចំពោះភាពរីករាយមុនពេលសេដ្ឋកិច្ចកើនឡើង និងអត់មានឧស្ម័នកាបូន។
ប៉ុន្ដែយុទ្ធសាស្ដ្រ «តម្លៃខ្ពស់ ផលប៉ះពាល់ទាប» បានជួបឧបសគ្គខ្លះនាពេលថ្មីៗនេះ ដោយសារកំណើនភ្ញៀវច្រើនពីប្រទេស ឥណ្ឌា ដែលអត់ចង់ចំណាយប្រាក់បន្ថែមលើពន្ធ។
កាលពីដើមសប្ដាហ៍ សភាជាន់ទាបប៊ូតង់បានអនុម័តច្បាប់ដែលត្រូវឲ្យភ្ញៀវទេសចរមកពីឥណ្ឌា បង់ក្លាដែស និងម៉ាល់ឌីវ បង់ប្រាក់ ១៦,៨៥ ដុល្លារ ក្នុង ១ ថ្ងៃ ចាប់ពីខែកក្កដា។
ក្នុងឆ្នាំ ២០១៨ ប៊ូតង់បានទទួលភ្ញៀវ ២០ ម៉ឺននាក់មកពីបណ្ដាប្រទេសនានាក្នុងតំបន់ ដោយបានកើនជិត ១០ ភាគរយពីឆ្នាំ ២០១៧ ដែលបង្កជាក្ដីបារម្ភថា វាអាចក្លាយជាតំបន់ទេសចរណ៍ជោរជន់ភ្ញៀវពេក។
ប្រធានក្រុមកីឡាគ្រីឃីតឥណ្ឌា វីរ៉ាត់ កូលី បានធ្វើការផ្សព្វផ្សាយយ៉ាងច្រើនអំពីប៊ូតង់ នៅពេលលោកបង្ហោះរូបភាពលើបណ្ដាញសង្គមពីដំណើរកម្សាន្ដជាមួយភរិយា ជាតារាបូលីវូដ អានូស្កា សាម៉ា។
ខណៈគូស្នេហ៍ល្បីឈ្មោះឥណ្ឌាដែលគេហៅក្រៅថា «វីរូសកា» បានធ្វើការផ្សព្វផ្សាយច្រើនគ្មាននរណាផ្សេងធ្វើបែបនេះឡើយ។
កាលពីខែតុលាឆ្នាំមុន អ្នកជិះកង់ឥណ្ឌាម្នាក់បានបង្កឲ្យផ្ទុះកំហឹងដោយបានឡើងកំពូលភ្នំ ដើម្បីថតរូបបង្ហោះ។
យ៉ាងណាក្ដី ប្រធានសមាគមសណ្ឋាគារ និងភោជនីយដ្ឋានរបស់ប៊ូតង់ សូណាម វ៉ាងឈុក បានបង្ហាញនូវក្ដីកង្វល់ថា សណ្ឋាគារទើបសង់រួចថ្មីថ្មោងសម្រាប់ផ្ដល់សេវាកម្មឲ្យភ្ញៀវឥណ្ឌានឹងបាត់អតិថិជន។
លោក វ៉ាងឈុក បានប្រាប់ AFP ថា៖ «យើងបានប្រាប់ក្ដីកង្វល់ និងបញ្ហារបស់យើងដល់រដ្ឋាភិបាលហើយ»។
លោកបានបន្តទៀតថា៖ «ប៉ុន្ដែទោះយ៉ាងណាក៏ដោយ ពួកគេនៅតែគោរពតាមបទប្បញ្ញត្ដិថ្មីនេះ»។
លោក តានឌី ដូរជី រដ្ឋមន្ដ្រីការបរទេស និងជាប្រធានក្រុមប្រឹក្សាទេសចរណ៍ប៊ូតង់បាននិយាយថា រដ្ឋាភិបាលនឹងលើកទឹកចិត្ដលើពន្ធអាករ បើតម្លៃថ្មីនេះប៉ះពាល់ដល់វិស័យសណ្ឋាគារ៕ AFP/HR