រោងសំណាញ់ដាំបន្លែផ្តល់អត្ថប្រយោជន៍យ៉ាងច្រើនដល់កសិករ។
វិស័យកសិកម្មនៅក្នុងប្រទេសកម្ពុជា កំពុងចាប់យកវិធីសាស្ត្រធ្វើកសិកម្មបែបទំនើបដោយសាងសង់រោងបន្លែសំណាញ់ដើម្បីផលិតបន្លែដែលមានគុណភាព និងអាចផ្គត់ផ្គង់ក្នុងតំបន់បានពេញ ១ ឆ្នាំ ទោះបីមានអាកាសធាតុមិនល្អក៏ដោយ។
Tropicam Irrigation Solutions Co Ltd គឺជាក្រុមហ៊ុនមួយដែលបានណែនាំគំរូច្នៃប្រឌិតថ្មីដើម្បីកែលម្អផលិតភាពកសិកម្មតាមរយៈការដាំដំណាំក្រោមគំរូរោងសំណាញ់។ រោងសំណាញ់គឺដើរតួជាអ្នកត្រួតពិនិត្យអាកាសធាតុធម្មជាតិ ដែលជួយបង្កើនទិន្នផល ហើយកសិករអាចដាំដុះបានពេញ ១ ឆ្នាំដែលរួមចំណែកបង្កើនប្រាក់ចំណូលដល់កសិករបាន ១ កម្រិតទៀត។
ក្រុមហ៊ុន Tropicam បានសហការជាមួយក្រសួងកសិកម្ម រុក្ខាប្រមាញ់ និងនេសាទ ដោយក្រុមហ៊ុនបានដំឡើងរោងសំណាញ់បានចំនួន ២០០ រួចហើយនៅតាមបណ្តាខេត្តចំនួន ២០ នៅក្នុងដំណាក់កាលទី ១ ហើយគម្រោងនេះបានដំណើរការចាប់តាំងពីខែមិថុនាមកម្ល៉ះ។
ក្រុមហ៊ុន Tropicam ក៏បានសហការជាមួយក្រុមហ៊ុន NETAFIM ដែលជាអ្នកឯកទេសអ៊ីស្រាអែលផ្នែកប្រព័ន្ធស្រោចទឹក ដែលធ្វើការយ៉ាងជិតស្និទ្ធជាមួយសហគមន៍កសិកម្មនៅទូទាំងពិភពលោក។ តាមរយៈភាពជាដៃគូនេះ ក្រុមហ៊ុន Netafim ផ្តល់នូវបច្ចេកវិទ្យា និងប្រឹក្សាយោបល់ដល់ក្រុមហ៊ុន Tropicam ដើម្បីធ្វើឱ្យដំណាំទទួលបានទិន្នផល និងត្រឹមត្រូវតាមបច្ចេកទេស។
នាយកប្រតិបត្តិក្រុមហ៊ុន Tropicam Irrigation Solutions លោក ឡោ ងី បានប្រាប់ ភ្នំពេញ ប៉ុស្តិ៍ ថា ក្នុងដំណាក់កាលទី ២ ក្រុមហ៊ុនគ្រោងសង់ដំឡើងរោងសំណាញ់ ២០០ បន្ថែមទៀតនៅក្នុងឆ្នាំ ២០២១។
ក្រុមហ៊ុន Tropicam បានសហការជាមួយក្រសួងកសិកម្ម។
លោកថ្លែងថា៖ «ការសង់រោងបន្លែដល់កសិករនៅតាមបណ្តាខេត្តទូទាំងប្រទេស គឺដើម្បីផ្ទត់ផ្គង់តម្រូវការទីផ្សារក្នុងតំបន់ ព្រោះជាទូទៅពលរដ្ឋដាំបន្លែតាមបែបប្រពៃណីពុំមានសង់រោង ដូច្នេះពេលភ្លៀងខ្លាំង ឬក្តៅខ្លាំងពេក ធ្វើឱ្យខូចដំណាំរបស់គាត់ ហើយការប្រមូលផលក៏មិនទៀងទាត់ទៀត។ បញ្ហាប៉ះពាល់ដល់គុណភាពនេះហើយ ទើបធ្វើឱ្យអតិថិជនមានទំនោរទិញបន្លែដែលនាំចូល»។
ប្រជាកសិករអាចដាំបន្លែស្លឹកជាច្រើនប្រភេទ ដូចជាស្ពៃចង្កឹះ ស្ពៃតឿ និងខាត់ណាជាដើមនៅក្រោមរោងសំណាញ់ ដែលមានទំហំ ១០ គុណនឹង ២៤ ម៉ែត្រ។
ប្រជាកសិករក្នុងតំបន់ទទួលរងគ្រោះដោយសារការប្រែប្រួលអាកាសធាតុ ពោលគឺអាកាសធាតុស្ងួតពេក ឬភ្លៀងមិនគ្រប់គ្រាន់ដែលធ្វើឱ្យប៉ះពាល់ដល់ទិន្នផល និងគុណភាពបន្លែ។ កត្តាទាំងនេះនាំឱ្យមានការខ្វះខាតបន្លែ និងបង្កឱ្យមានការប្រែប្រួលតម្លៃនៅលើទីផ្សារទ្វេដង។
លោក ងី បានលើកឡើងថាក្រៅពីការពារដំណាំប្រឆាំងនឹងកំដៅ ទឹកភ្លៀង និងសត្វល្អិត រោងសំណាញ់បែបទំនើបនេះក៏អនុញ្ញាតឱ្យកសិករដាំដំណាំច្រើនដងពេញ ១ ឆ្នាំ។
«រោងសំណាញ់នេះអាចឱ្យគាត់ដាំបាន ៧ ដងក្នុង ១ ឆ្នាំ ហើយអាចរកចំណូលបាន ៣ លានរៀលក្នុងរយៈពេល ៤០ ថ្ងៃ ទោះបីខែភ្លៀង ឬខែក្តៅខ្លាំងក៏នៅតែធ្វើបានព្រោះមានរោងសំណាញ់ជួយការពារ អ៊ីចឹងកាលណាកសិករដាំដំណាំបានជោគជ័យមានចំណូល ដូច្នេះអាចជួយលើកកម្ពស់វិស័យកសិកម្មបានមួយកម្រិតទៀត យើងធ្វើគម្រោងនេះដើម្បីផ្គត់ផ្គង់ក្នុងស្រុកកុំឱ្យមានការនាំចូលច្រើនពេក»។
រោងសំណាញ់ដាំបន្លែមានទំហំ ១០ ម x ២៤ ម។
បើយោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយអំពីផលប៉ះពាល់ និងខូចខាតដោយជំនន់ទឹកភ្លៀងគិតពីថ្ងៃទី ១ ខែកញ្ញា ដល់ថ្ងៃទី ២៧ ខែតុលា បានបង្ហាញថា សន្ទូងចំនួន ៨៥ ៣៤៨ ហិកតាបានរងការខូចខាត និងដំណាំផ្សេៗចំនួន ៤៧២៣២ ហិកតាបានរងការខូចខាត។
ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម លោកបណ្ឌិត ងិន ឆាយ ធ្លាប់បានឱ្យដឹងថា ជារៀងរាល់ថ្ងៃនេះ តម្រូវការបន្លែសរុបមានរហូតដល់ ៥៧៣ តោនក្នុង ១ ថ្ងៃដែលក្នុងនោះ ការផ្គត់ផ្គង់បន្លែពីសំណាក់អ្នកផលិតក្នុងស្រុកមានប្រមាណ ៤០០ តោន (៧០%) និងការនាំចូលបន្លែពីបរទេសមានបរិមាណសរុប ១៧០ តោន (៣០%) ក្នុង ១ ថ្ងៃ។ បន្លែភាគច្រើនត្រូវបាននាំចូលពីប្រទេសវៀតណាម ដែលមានសរុប ៨៥ តោន (១៥%) ថៃ ៤៥ តោន (៨%) និងប្រទេសចិន ៤០ តោន (៧%)។ បើប្រៀបធៀបទៅនឹងរបាយការណ៍កាលពីឆ្នាំ ២០១៧ លទ្ធផលនេះបង្ហាញពីការកើនឡើងនៃផលិតកម្មបន្លែនៅក្នុងប្រទេសកម្ពុជា។
លោកបញ្ជាក់ថា៖ «កត្តាដែលជំរុញឱ្យមានការកើនឡើងនៃការផលិតបន្លែក្នុងស្រុក គឺដោយសារតែមានការវិនិយោគបន្ថែមទៅក្នុងវិស័យបន្លែពីសំណាក់រាជរដ្ឋាភិបាលកម្ពុជាដៃគូអភិវឌ្ឍន៍នានា និងវិស័យឯកជន តាមរយៈគម្រោងកម្មវិធីអភិវឌ្ឍន៍ដោយផ្តោតលើការពង្រឹងសមត្ថភាពផលិតកម្ម ការប្រើប្រាស់បច្ចេកទេស និងសម្ភារបរិក្ខារទំនើបរួមនឹងការផ្សារភ្ជាប់ទីផ្សាររវាងអ្នកផលិត និងអ្នកបញ្ជាទិញជាដើម»។
លោក ងី ឱ្យដឹងថា ក្រៅពីដំឡើងរោងសំណាញ់ ក្រុមហ៊ុន Tropicam ក៏មានឯកទេសក្នុងការគណនាប្រព័ន្ធ ធារាសាស្ត្រ ដើម្បីស្រោចស្រពដំណាំទទួលបានទិន្នផលខ្ពស់ និងដាំដុះបានពេញ ១ ឆ្នាំផងដែរ៕
ប្រើប្រាស់រោងសំណាញ់កសិករអាចដាំបន្លែបានពេញ ១ ឆ្នាំ។
