បន្ទាប់ពីបង្កើតម៉ាកយីហោដ៏រឹងមាំក្នុងរយៈពេលមិនដល់មួយទសវត្សរ៍ក្រុមហ៊ុន ខ្មែរ ប៊ែវើរីជីស ខូអិលធីឌី ដែលជាក្រុមហ៊ុនផលិតស្រាបៀរកម្ពុជាដ៏ល្បីល្បាញ មានទំនុកចិត្តខ្ពស់ថានៅឆ្នាំក្រោយនឹងមានកំណើនកាន់តែខ្លាំងជាមួយនឹងគោលដៅដ៏ច្បាស់លាស់ ទោះបីទីផ្សារស្រាបៀរកំពុងមានការប្រកួតប្រជែងក៏ដោយ។
ក្រុមហ៊ុនមានគ្រឿងផ្សំ និងវត្ថុធាតុដើមល្អបំផុតនៅក្នុងទីផ្សារស្រាបៀរក្នុងស្រុក។ ភាពជាអ្នកដឹកនាំប្រកបដោយចក្ខុវិស័យ ម៉ាកយីហោដ៏ល្បីល្បាញ កម្លាំងពលកម្មខ្មែរដ៏រឹងមាំមានបណ្តាញចែកចាយធំទូលាយ បានធ្វើឲ្យក្រុមហ៊ុន ខ្មែរ ប៊ែវើរីជីស ក្លាយជាក្រុមហ៊ុនដ៏មានសក្តានុពលក្នុងការប្រជែងជាមួយក្រុមហ៊ុន ផលិតស្រាបៀរបរទេសនៅកម្ពុជា។
លោកឧកញ៉ា លាង ពៅ (ភីធើរ) អគ្គនាយកក្រុមហ៊ុន ខ្មែរ ប៊ែវើរីជីស មានប្រសាសន៍ប្រាប់ភ្នំពេញប៉ុស្តិ៍ថា៖ «បើនិយាយអំពីចំណាត់ថ្នាក់យើងស្ថិតក្នុងតំណែងកំពូលនៅក្នុងប្រទេស កម្ពុជា។ ពេលខ្លះយើងលេខ ១ ពេលខ្លះយើងលេខ ២។ ទីផ្សារកម្ពុជាមានការប្រកួតប្រជែងខ្លាំងណាស់វាមិនមែនជាទីផ្សារដែលងាយស្រួលនោះទេ។ យើងក្មេងខ្ចីនៅឡើយក្នុងឧស្សាហកម្មនេះ គឺយើងមានអាយុប្រមាណ ១០ ឆ្នាំប៉ុណ្ណោះ បើធៀបនឹងក្រុមហ៊ុនអន្តរជាតិ ២ ទៀត»។
ដោយមានទីតាំងស្ថិតនៅលើផ្ទៃដីធំទូលាយចំនួន ១៥ ហិកតា បច្ចុប្បន្នផលិតកម្មប្រចាំឆ្នាំរបស់ក្រុមហ៊ុនមានចំនួន ៧៥០ លានលីត្រ ប្រៀបធៀបនឹង ៦០ លានលីត្រ នៅពេលចាប់ផ្តើមដំណើរការដំបូងក្នុងឆ្នាំ ២០០៩។ ស្រាបៀរកម្ពុជាច្រកក្នុងដបពណ៌ក្រហមពណ៌ស និងកំប៉ុង ត្រូវបានចរាចរលក់នៅទូទាំងប្រទេស។ លើសពីនេះទៀត ក្រុមហ៊ុនក៏មានផលិតផលជាភេសជ្ជៈជាច្រើនផងដែរ ដែលមានចំនួន ២០០ លានលីត្រ ក្នុង ១ ឆ្នាំ។
លោក ភីធើរ ថ្លែងថា៖ «ជាដំបូងការពង្រីករបស់យើង គឺដោយសារតែសេដ្ឋកិច្ច។ ក្នុងរយៈពេល ១០ ឆ្នាំចុងក្រោយនេះសេដ្ឋកិច្ចរបស់កម្ពុជាមានការរីកចម្រើនជាលំដាប់ ដោយសារតែស្ថិរភាពរបស់ប្រទេស ហើយប្រជាជនកម្ពុជាបច្ចុប្បន្នមានប្រាក់ចំណូលកាន់តែប្រសើរជាងមុន។ ប្រជាជននៅតាមជនបទ ពីមុនធ្លាប់ទទួលទានស្រាស ដែលមានតម្លៃថោក ប៉ុន្តែបានប្តូរមកទទួលទានស្រាបៀរជំនួសវិញ។ ដូច្នេះតម្រូវការស្រាបៀរមានការកើនឡើងគួរឱ្យកត់សម្គាល់ នៅក្នុងឧស្សាហកម្មស្រាបៀររបស់យើង»។
ក្រៅពីស្រាបៀរកម្ពុជាដែលលក់ដាច់ជាងគេ ក្រុមហ៊ុនក៏ផលិតស្រាបៀរជាច្រើនម៉ាកផ្សេងទៀត ដូចជាស្រាបៀរ Kudo និងស្រាបៀរ Barrley Black Extra Stout Beerចំណែកឯផលិតផលដែលមិនមានជាតិអាល់កុល រួមមានភេសជ្ជៈប៉ូវកម្លាំង Wurkz ភេសជ្ជៈ Ize និងទឹកបរិសុទ្ធកម្ពុជា។
ក្រុមហ៊ុននេះ គឺជាពាណិជ្ជកម្មមួយរបស់ក្រុមហ៊ុនជីបម៉ុង ដែលមានអាជីវកម្មចំនួន ១៣ ផ្សេងទៀត រាប់ចាប់ពីហិរញ្ញវត្ថុ បដិសណ្ឋារកិច្ច រហូតដល់ក្រុមហ៊ុនអភិវឌ្ឍអចនលទ្រព្យ។
ក្រុមហ៊ុន ខ្មែរ ប៊ែវើរីជីស ត្រូវបានពង្រីក ៣ ដង ក្នុងរយៈពេល ៧ ឆ្នាំចុងក្រោយនេះ។
«ចំណុចខ្លាំងរបស់យើង គឺថាយើងជាកម្មសិទ្ធិរបស់ក្រុមហ៊ុនជីបម៉ុង ដែលមានបទពិសោធជិត ៤០ ឆ្នាំ និងមានបណ្តាញចែកចាយដ៏ខ្លាំងក្លាពីព្រោះក្រុមហ៊ុនជីបម៉ុងពីដំបូងចាប់ផ្តើមជាអាជីវកម្មជំនួញ ក្រោយមកប្តូរទៅក្រុមហ៊ុនផលិតកម្មជាច្រើន»។
«ជាមួយនឹងភាពខ្លាំងនេះ យើងមានកំណើនទៅមុខយ៉ាងលឿននៅក្នុងទីផ្សារអ្នកប្រើប្រាស់ ទីផ្សារចែកចាយ ដែលជាកូនសោគន្លឹះក្នុងការចែកចាយផលិតផលទៅដល់ដៃអតិថិជន។ ភាពខ្លាំងទី ២ របស់ យើងគឺក្នុងនាមជាក្រុមហ៊ុនក្នុងស្រុករាល់ការសម្រេចចិត្តទាំងអស់ត្រូវបានធ្វើឡើងនៅក្នុងប្រទេស កម្ពុជា ហើយយើងមានក្រុមប្រឹក្សាភិបាលតិច»។
លោក ភីធើរ បន្ថែមថា៖ «យើងមិនមែននៅក្នុងទីផ្សារនេះ ដោយគ្រាន់តែផលិតផលិតផលឲ្យចេះតែបានៗនោះទេ ប៉ុន្តែយើងផលិតផលិតផលដែលមានគុណភាពខ្ពស់។ យើងមានផែនការច្បាស់លាស់ អ្វីៗដែលយើងធ្វើគឺតាមច្បាប់ និងស្តង់ដារគុណភាពអន្តរជាតិ។ យើងបានវិនិយោគច្រើនទៅលើបច្ចេកវិទ្យាកម្រិតខ្ពស់»។
ក្រុមហ៊ុន ខ្មែរ ប៊ែវើរីជីស ដែលស្ថិតនៅក្រោមការដឹកនាំរបស់លោក ភីធើរ គឺផ្តោតលើសសរស្តម្ភចំនួន ៤ គឺ គ្រឿងម៉ាស៊ីន វត្ថុធាតុដើម វិធីសាស្ត្រក្នុងការផលិត និងកម្លាំងពលកម្ម។
ក្រុមហ៊ុនបានវិនិយោគយ៉ាងច្រើនទៅលើបច្ចេកវិទ្យាកម្រិតខ្ពស់ ដូចជាគ្រឿងម៉ាស៊ីនទំនើបចុងក្រោយ នាំចូលមកពីប្រទេស អាល្លឺម៉ង់ និងអឺរ៉ុប ជាម៉ាស៊ីនដែលមានប្រសិទ្ធភាពខ្ពស់បំផុត។ ចំពោះគ្រឿងផ្សំ ដើម្បីផលិតស្រាបៀរ មានដូចជាផ្កាហប ស្រូវសាឡី និងមេស្រាបៀរ ដែលសុទ្ធតែនាំចូលមកពីអឺរ៉ុប។
លោក ភីធើរ បន្ថែមថា៖ «ក្នុងនាមជាក្រុមហ៊ុនមួយយើងជឿជាក់ថាដំណើរការ និងប្រព័ន្ធ គឺមានសារៈសំខាន់ណាស់ដូចជាបច្ចេកវិទ្យាជាដើម។ យើងជាក្រុមហ៊ុនដែលគ្រប់គ្រងដោយក្រុមគ្រួសារ ប៉ុន្តែយើងមិនប្រតិបត្តិការជាលក្ខណៈគ្រួសារនោះទេ។ យើងប្រតិបត្តិការជាលក្ខណៈក្រុមហ៊ុនអាជីព និងជាក្រុមហ៊ុនពហុសាសន៍។ យើងមានស្តង់ដាដ៏ល្អ»។
អ្វីដែលកាន់តែរំភើបទៀតនោះ គឺក្រុមហ៊ុន ខ្មែរ ប៊ែវើរីជីស មានកម្លាំងពលកម្មដ៏មោះមុត និងបុគ្គលិកដ៏ពូកែប្រមាណ ១ ១០០ នាក់ កំពុងបម្រើការងារ ក្នុងនោះតិចជាង ៥ ភាគរយ ជាជនបរទេស។
លោក ភីធើរ បញ្ជាក់ថា៖ «យើងត្រូវការបុគ្គលិកដែលមានទេពកោសល្យ ដើម្បីជួយពង្រឹងក្រុមហ៊ុនដូច្នេះយើងមានបុគ្គលិកជាជនបរទេសនៅថ្នាក់គ្រប់គ្រងជាន់ខ្ពស់។ ជនបរទេសជួយពង្រឹងបុគ្គលិកខ្មែរ ដែលពួកគេជាអនាគតអ្នកគ្រប់គ្រង»។
លោក ភីធើរ មានសុទិដ្ឋិនិយមចំពោះទីផ្សារស្រាបៀរនៅកម្ពុជា ហើយលោករំពឹងថាវានឹងមានកំណើនល្អទោះបីមានការប្រកួតប្រជែងខ្លាំងពីគូប្រជែងក៏ដោយ។
លោកបានបន្ថែមថា៖ «និយាយដោយស្មោះ ការប្រកួតប្រជែងគឺល្អ វាធ្វើឱ្យយើងកាន់តែរឹងមាំ និងអនុញ្ញាតឱ្យយើងនាំមកនូវការផ្លាស់ប្តូរជាវិជ្ជមាន។ មើលទៅកំណើនសម្រាប់ឆ្នាំ ២០២០ គឺល្អ ដោយសារតែសេដ្ឋកិច្ចមានស្ថិរភាព។ ចក្ខុវិស័យរបស់ខ្ញុំ គឺរក្សាកំណើនជាមួយនឹងលទ្ធផលល្អដូច្នេះយើងអាចចូលរួមចំណែកដល់សេដ្ឋកិច្ច និងប្រជាជន»៕