សភាពាណិជ្ជកម្មហ្វីលីពីននៅកម្ពុជា (PhilCham Cambodia) ត្រូវបានសម្ពោធជាផ្លូវការនៅសណ្ឋាគារ Raffles Hotel Le Royal កាល ពីថ្ងៃទី ២១ ខែមករា ដើម្បីជំរុញបន្ថែមទៀតដល់ទំនាក់ទំនងធុរកិច្ច និងពាណិជ្ជកម្មរវាងហ្វីលីពីន និងកម្ពុជា។
ដោយត្រូវបានបង្កើតឡើងដំបូងក្នុងឆ្នាំ ២០១៦ ជាបណ្តាញអាជីវកម្ម បេសកកម្មចម្បងរបស់ PhilCham គឺលើកកម្ពស់ទំនាក់ទំនងពាណិជ្ជកម្មរវាងហ្វីលីពីន-កម្ពុជា និងបម្រើដល់សមាជិករបស់ខ្លួនជាធនធានដ៏សំខាន់មួយសម្រាប់ការចែករំលែកព័ត៌មាន និងបណ្តាញអាជីវកម្ម។
ពិធីនេះក៏ទទួលបានការអញ្ជើញចូលរួមពីសំណាក់ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម និងលោកស្រី Frances Louissa Cleofas អគ្គកុងស៊ុល និងលេខាធិការទី ៣ នៃស្ថានទូតហ្វីលីពីននៅទីក្រុងភ្នំពេញផងដែរ។
លោកស្រី Benilda Custodio-Fernando ប្រធាន PhilCham និងជានាយិកាសវនកម្មក្រុមហ៊ុន PwC (Cambodia) ថ្លែងថា៖ «គ្រប់គ្នាត្រូវបានឱ្យតម្លៃ និងស្វាគមន៍ដោយសភាពាណិជ្ជកម្មហ្វីលីពីន ហើយយើងរីករាយដើម្បីធ្វើការ និងរីកចម្រើនជាមួយគ្នា»។
«តាមរយៈការក្លាយជាសមាជិករបស់ PhilCham នៅកម្ពុជាអ្នកនឹងទទួលអត្ថប្រយោជន៍ពីបច្ចេកវិទ្យា និងយុទ្ធសាស្ត្រអាជីវកម្ម និងពីថ្នាក់ដឹកនាំសហគមន៍អ្នកជំនួញហ្វីលីពីនដើម្បីលើកកម្ពស់ក្រុមហ៊ុន ការតភ្ជាប់បណ្តាញ ការចូលទៅកាន់មេដឹកនាំជំនួញ និងនយោបាយសកម្មភាពសង្គម និងការតស៊ូមតិ»។
ពាណិជ្ជកម្មទ្វេភាគីរវាងប្រទេសអាស៊ានទាំង ២ នៅក្នុងអំឡុងជំងឺកូវីដ១៩ ក្នុងឆ្នាំ ២០២០ គឺមានតម្លៃប្រហែល ៤៩,០៥ លានដុល្លារក្នុងនោះដែរ ការនាំចូលមកកម្ពុជាមានតម្លៃ ២៥,០៩ លានដុល្លារ ខណៈការនាំចេញពីកម្ពុជាទៅហ្វីលីពីនមានតម្លៃ ២៣,៩៦ លានដុល្លារ។ នេះបើយោងតាមស្ថិតិពាណិជ្ជកម្ម និងឧស្សាហកម្មរបស់ហ្វីលីពីន។
លោកស្រី Sundee M Vinas គឺជានាយិកាប្រតិបត្តិ និងលោក Ronald C Almera ដែលជាដៃគូគ្រប់គ្រងក្រុមហ៊ុន GrantThornton (Cambodia) គឺជាអនុប្រធាន។
«សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់កម្ពុជា ច្បាប់បើកចំហដល់ការវិនិយោគ ច្បាប់ពន្ធដារមានភាពទាក់ទាញ និងកម្លាំងពលកម្មមានការប្រកួតប្រជែងបានទាក់ទាញអាជីវកម្ម និងការវិនិយោគជាច្រើនមកក្នុងវិស័យផ្សេងៗហើយគិតត្រឹមខែតុលាឆ្នាំមុន មានក្រុមហ៊ុនហ្វីលីពីនជាង ៩០ បានចុះបញ្ជីនៅក្រសួងពាណិជ្ជកម្ម។
«ជាមួយនឹងការបង្កើត PhilCham Cambodia និងក្នុងភាពជាដៃគូជាមួយស្ថានទូតហ្វីលីពីនយើងរំពឹងថានឹងមានក្រុមហ៊ុន និងម៉ាកយីហោហ្វីលីពីនកាន់តែច្រើននឹងចូលមករកស៊ីនៅកម្ពុជាក្នុងរយៈពេល ៥ ទៅ ១០ ឆ្នាំខាងមុខ»។
លោកស្រី Vinas លើកឡើងថា៖ «ម៉ាកយីហោក៏ដូចជាក្រុមហ៊ុនរបស់ហ្វីលីពីនដែលកំពុងប្រតិបត្តិការនៅកម្ពុជាផ្តល់ជូននូវផលិតផលគុណភាពខ្ពស់ និងសេវាកម្មមានការប្រកួតប្រជែងដែលឆ្លើយតបទៅនឹងចំនួនប្រជាជនវ័យក្មេងកម្ពុជាដ៏មានសក្ដានុពល។ លើសពីនេះ វត្តមានជនជាតិហ្វីលីពីនជាង ៧ ពាន់នាក់នៅកម្ពុជាដែលភាគច្រើនជាអ្នកជំនាញ ទទួលបានការចូលចិត្ត និងស្វែងរកពីសំណាក់ក្រុមហ៊ុនផ្សេងៗនៅក្នុងប្រទេស»។
លោកស្រី Vinas ដែលជាម្ចាស់ និងជាស្ថាបនិកក្រុមហ៊ុន FiDi Events and Entertainments ថ្លែងថា ការអភិវឌ្ឍក្នុងតំបន់ និងកន្លែងផ្សេងទៀតគឺត្រូវបានកំណត់ដើម្បីជំរុញការវិនិយោគ និងឱកាសអាជីវកម្ម។
«សមាហរណកម្មសេដ្ឋកិច្ចអាស៊ាន និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) គឺមានគោលបំណងដើម្បីធ្វើឱ្យប្រសើរឡើងនូវលទ្ធភាពទទួលបានទីផ្សារសម្រាប់ទំនិញ និងជំរុញការអភិវឌ្ឍពាណិជ្ជកម្ម»។
លោកស្រីបញ្ជាក់ថា៖ «ដោយសារការអភិវឌ្ឍទាំងនេះយើងរំពឹងថានឹងមានការវិនិយោគកាន់តែច្រើននៅក្នុងតំបន់ និងការកើនឡើងនៃលំហូរទំនិញមិនត្រឹមតែក្នុងតំបន់អាស៊ានប៉ុណ្ណោះទេ ប៉ុន្តែថែមទាំងជាមួយសមាជិក RCEP រួមទាំងប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ផងដែរ»។
PhilCham ចាប់ផ្តើមនៅ ឆ្នាំ ២០១៦ ជាបណ្តាញក្រៅផ្លូវការរបស់ម្ចាស់អាជីវកម្ម និងប្រតិបត្តិហ្វីលីពីនដែលមានមូលដ្ឋាននៅកម្ពុជា ដែលជាកន្លែងសម្រាប់ចែករំលែកព័ត៌មាន និងការធ្វើអាជីវកម្មនៅក្នុងប្រទេសកម្ពុជា។
លោក Jay Ian L Capungan ស្ថាបនិក Teachers'' Learning Action Guild នៅកម្ពុជា និងជាអ្នកសម្របសម្រួលភាសាអង់គ្លេសនៅសាលាអន្តរជាតិ Footprints International School គឺជាលេខាធិការ។ លោក Romyr A Liboon ជាស្ថាបនិក និងជានាយកគ្រប់គ្រង Cambodia International Models និងជានាយកនៃ Miss Universe-Cambodia គឺជាហេរញ្ញិក។ ចំពោះក្រុមប្រឹក្សាភិបាលគឺលោកស្រី Maria Rowena Medina លោកស្រី Ninja Flor Ricafort-Hesita និង លោក Ben Betonio។
លោកស្រី Medina គឺជាប្រធានទីផ្សារ និងទំនាក់ទំនងផ្នែកឌីជីថលនៅ Oakwood Premier រីឯលោកស្រី Ricafort-Hesita គឺជានាយិកានៃក្រុមហ៊ុន Happybee Food Cambodia ដែលនឹងនាំយកចង្វាក់អាហាររហ័សទាន់ចិត្តអន្តរជាតិហ្វីលីពីន Jollibee មកកម្ពុជា។
ចំណែកឯលោក Betonio គឺជានាយកប្រតិបត្តិ និងជាជំនួយការប្រធាន និងអគ្គនាយកក្រុមហ៊ុន Royal Group of Companies។
ការសម្ពោធនេះជាចម្បងគឺផ្តោតលើការណែនាំក្រុមប្រឹក្សាភិបាល និងកម្មវិធីទូរស័ព្ទចល័តដំបូងគេដែលមានឈ្មោះថា PhilCham ដែលត្រូវបង្កើតឡើងដោយ Bronx Technology ដើម្បីភ្ជាប់ទំនាក់ទំនងជាមួយដៃគូ និងសមាជិកតាមរយៈឧបករណ៍ដំណើរការដោយប្រព័ន្ធ Android និង iOS។ «ជាមួយសភាពាណិជ្ជកម្មហ្វីលីពីននៅកម្ពុជា ស្ថានទូតមានដៃគូមួយក្នុងការចាប់យកសក្តានុពលពេញលេញនៃទំនាក់ទំនងពាណិជ្ជកម្ម និងវិនិយោគរវាងហ្វីលីពីន និងកម្ពុជា»។
អគ្គកុងស៊ុលលោកស្រី Cleofas មានប្រសាសន៍ថា៖ «ជាមួយសភាពាណិជ្ជកម្មហ្វីលីពីននៅកម្ពុជា ស្ថានទូតមានដៃគូក្នុងការទាញយកសក្តានុពលពេញលេញនៃទំនាក់ទំនងពាណិជ្ជកម្ម និងជំនួញ និងវិនិយោគរវាងហ្វីលីពីន-កម្ពុជា»៕