ជាយូរមកហើយស្រាត្នោតត្រូវបានគេចាត់ទុកថា ជាភេសជ្ជៈមានជាតិអាល់កុលសម្រាប់អ្នកដែលមិនសូវមានជីវភាពធូរធារ ហើយមិនមានមនុស្សច្រើនប៉ុន្មានទេដែលស្គាល់អំពីស្រាប្រភេទនេះ ប៉ុន្តែស្រាផលិតពីទឹកត្នោតមានប្រវត្តិដ៏យូរលង់ និងចាក់ឫសយ៉ាងជ្រៅជាយូរមកហើយ។
វាជាប្រភេទស្រាដែលទទួលបានការពេញនិយមនៅក្នុងប្រទេសដែលមានអាកាសធាតុក្តៅ។ ស្រាត្នោតក៏ត្រូវបានមនុស្សប្រមាណ ១០ លាននាក់ នៅអាហ្វ្រិកខាងលិចទទួលទានផងដែរ ហើយវាក៏ពេញនិយមនៅទូទាំងទ្វីបអាស៊ី អាមេរិកខាងត្បូង តំបន់ការ៉ាបៀន និងមជ្ឈិមបូព៌ា។
ក្រុមហ៊ុន Confirel Co Ltd គឺជាក្រុមហ៊ុនកម្ពុជាដែលផលិត និងកែច្នៃចេញពីវត្ថុធាតុដើមក្នុងស្រុក និងផលិតផលិតផលជាច្រើនប្រភេទ ក្នុងនោះក៏មានផលិតផលិផលជាច្រើនពីទឹកត្នោត និងស្ករត្នោតផងដែរ។ មិនតែប៉ុណ្ណោះ ក្រុមហ៊ុនក៏មានគោលបំណងបង្ហាញពីការយល់ឃើញអំពីវប្បធម៌នៃការទទួលទានស្រាត្នោត ដោយបានផលិតស្រាមេគង្គស្ប៉ាកឃ្លីងពីទឹកត្នោតរបស់ខ្មែរដ៏ឈ្ងុយឆ្ងាញ់។
«ត្រូវបានផលិតឡើងនៅដើមឆ្នាំ ២០២០ ស្រាមេគង្គស្ប៉ាកឃ្លីង របស់យើងគឺជាភេសជ្ជៈមានជាតិអាល់កុលត្រូវផលិតប្រកបដោយភាពច្នៃប្រឌិត និងយ៉ាងពិសេសនៅក្នុងប្រទេសកម្ពុជា តាមរយៈរូបមន្ត Methode Champenoise ហើយវាជាប្រភេទស្រាស្ប៉ាកឃ្លីងដំបូងគេបង្អស់ដែលផលិតចេញពីទឹកត្នោតនៅកម្ពុជាផងដែរ»។
លោក Loic Martin ប្រធានផ្នែកពាណិជ្ជកម្មរបស់ Confirel ថ្លែងថា៖ «ទោះបីជាយើងមានបទពិសោធផលិតស្រាចេញពីទឹកត្នោតអស់រយៈពេលជាង ១៧ ឆ្នាំហើយក្តី ដូចជាស្រាម៉ាក Jaya និង Kirel ដែលមានរសជាតិពិសេសប្លែក ៣ ប្រភេទ ប៉ុន្តែស្រាមេគង្គស្ប៉ាកឃ្លីង គឺតំណាងឱ្យការខិតខំប្រឹងប្រែងមួយទៀតរបស់ក្រុមហ៊ុន Confirel ដើម្បីធ្វើឱ្យប្រសើរ ឡើងនូវដំណើរការផលិតស្រាពីទឹកត្នោតឱ្យទៅជាសិល្បៈផលិតស្រាប្រណីតមួយបែបទៀត»។
ដោយមានបណ្តាញដ៏រឹងមាំពីកសិដ្ឋានចំនួន ២០០ ដែលមានការបញ្ជាក់ការដាំដុះដើមត្នោតសរីរាង្គ និងការប្រមូលផលទឹកត្នោត ចាប់ពីខែធ្នូ ដល់ខែមីនា លោក Martin ជឿជាក់ថា Confirel មានសមត្ថភាពដើម្បីបំពេញតាមតម្រូវការនៅក្នុងស្រុក និងអន្តរជាតិ សម្រាប់ភេសជ្ជៈមានជាតិអាល់កុលប្រភេទនេះ។
«ស្រាមេគង្គស្ប៉ាកឃ្លីងត្រូវផ្អាប់ និងចំណាយពេលរយៈពេល ៣ ខែដើម្បីផលិតនៅក្នុងរោងចក្រដែលមានទំហំ ៣ ៥០០ ម៉ែត្រការ៉េ ស្ថិតនៅក្នុងខណ្ឌពោធិ៍សែនជ័យ។ ក្នុងអំឡុងពេលប្រមូលផលទឹកត្នោត និងការផលិតស្រា យើងអាចផលិតបានចំនួន ៤ ០០០ ដប សម្រាប់ចំណុះ ៧៥០ មិល្លីលីត្រ និង ៤ ០០០ ដប សម្រាប់ ចំណុះ ៣៧៥ មិល្លីលីត្រ»។
លោកថ្លែងថា៖ «ជាមួយនឹងការនាំចេញ ស្រាម៉ាក Jaya និង Kirel ទៅកាន់ទីផ្សារអន្តរជាតិ លោកក៏រំពឹងថា ស្រាមេគង្គស្ប៉ាកឃ្លីងនឹងអាចនាំចេញក្នុងឆ្នាំនេះ ហើយរំពឹងថា ការនាំចេញនឹងកើនឡើងផងដែរនៅក្នុងឆ្នាំខាងមុខៗ ជាពិសេសក៏មានផែនការពង្រីកប្រតិបត្តិការ ដើម្បីបង្កើនផលិតកម្មរបស់យើងទ្វេដងនៅឆ្នាំក្រោយ ដើម្បីឆ្លើយតបទៅនឹងតម្រូវការដែលកំពុងកើនឡើង»។
ដើមត្នោត គឺជានិមិត្តរូបដ៏សំខាន់នៃអត្តសញ្ញាណជាតិ និងជាមរតកជាតិរបស់ប្រទេសកម្ពុជា ដែលផ្តល់អត្ថប្រយោជន៍យ៉ាងច្រើន។ ដើមត្នោតមានច្រើននៅពាសពេញផ្ទៃប្រទេសកម្ពុជា គិតចាប់តាំងពីសម័យអាណាចក្រខ្មែរ និងសម័យអង្គរនៅសតវត្សរ៍ទី៩ មកម្ល៉េះ។
គំនិតនៃការប្រែក្លាយទឹកត្នោតទៅជាផលិតផលដែលបង្ហាញពីអត្តសញ្ញាណវប្បធម៌របស់ប្រជាជន គឺវាបានចាក់ឫសយ៉ាងជ្រៅនៅក្នុងទស្សនវិជ្ជារបស់ក្រុមហ៊ុន ហើយស្រាមេគង្គស្ប៉ាកឃ្លីង គឺជាឧទាហរណ៍ដ៏ល្អមួយនៃការប្តេជ្ញាចិត្តរបស់ ក្រុមហ៊ុន Confirel ក្នុងការបន្តនាំមកវប្បធម៌ និងអំណោយផលធម្មជាតិដ៏សម្បូរបែបរបស់ប្រទេសកម្ពុជា ទៅកាន់ពិភពលោក។
នៅក្នុងប្រទេសដែលការទទួលទានគ្រឿងស្រវឹងកើនឡើង ទន្ទឹមនឹងផលិតផលក្នុងស្រុកសរុបក៏កើនឡើងដែរនោះ ស្រាមេគង្គស្ប៉ាកឃ្លីងផលិតនៅក្នុងស្រុក មិនត្រឹមតែផ្តល់ជូនរសជាតិដ៏ឈ្ងុយឆ្ងាញ់ មានក្លិនក្រអូប ស្រស់ថ្លានៅក្នុងក្រអូមមាត់ប៉ុណ្ណោះទេ ថែមទាំងផ្តល់នូវអត្ថប្រយោជន៍ដល់សុខភាពទៀតផង ប្រសិនបើទទួលទានក្នុងកម្រិតតិចតួច និងក្នុងកម្រិតសមល្មម។
ទោះយ៉ាងណា អត្ថប្រយោជន៍មិនមែនមានតែប៉ុណ្ណឹងទេ លោកថ្លែងថា៖ «ផលិតផលរបស់យើងទាំងអស់ត្រូវបានផលិតឡើងប្រកបដោយគុណភាព និងសុវត្ថិភាព។
ទឹកត្នោតសម្រាប់ផលិតស្រាមេគង្គស្ប៉ាកឃ្លីង គឺត្រូវបានយកចេញពីដើមត្នោតដែលត្រូវដាំដុះដោយមានការទទួលស្គាល់ជាប្រភេទដំណាំសរីរាង្គ គ្មានប្រើថ្នាំគីមី និងថ្នាំសម្លាប់សត្វល្អិត។
លោក Martin បន្ថែមថា៖ «យើងក៏ធ្វើការយ៉ាងជិតស្និទ្ធជាមួយកសិករផងដែរ ដើម្បីបង្កើនគុណភាពនៃការប្រមូលផលទឹកត្នោត ជាមួយគ្នានេះយើងក៏កំពុងស្វែងរកដំណាំដាំដុះក្នុងស្រុកផ្សេងទៀតដូចជាស្វាយ និងម្នាស់ជាដើមសម្រាប់កែច្នៃជាផលិតផលផ្សេងៗ និងស្រាផលិតពីផ្លែឈើជាដើម»។
ខណៈ Confirel កំពុងនាំមុខគេក្នុងការផ្តល់ជូននូវស្រាប្រភេទស្ប៉ាកឃ្លីងដ៏មានរសជាតិឈ្ងុយឆ្ងាញ់នោះ ការយល់ឃើញពីមុនដែលចាត់ទុកថាស្រាផលិតពីទឹកត្នោតសម្រាប់តែអ្នកដែលមានជីវភាពមិនសូវធូរធារនោះ អាចនឹងត្រូវបានផ្លាស់ប្តូរកាន់តែច្រើននៅពេលអនាគត៕