លោកស្រីភឿង សកុណា រដ្ឋមន្ត្រីក្រសួងវប្បធម៌(ពីឆ្វេងទី៣)ទទួលពានរង្វាន់នៅអ៊ីតាលី។ រូបថត FN
ភ្នំពេញៈ កម្ពុជាទទួលបានពានរង្វាន់បុរាណវិទ្យាប៉ាស្ទូមឆ្នាំ ២០១៨ (PAESTUM ARCHEOLOGIA) ពីវេទិកាពិព័រណ៍អន្តរជាតិលើក ទី ២១ ស្ដីពីការផ្លាស់ប្ដូរបទពិសោធន៍អំពីបេតិកភណ្ឌ និងទេសចរណ៍នៃតំបន់ មេឌីទែរ៉ាណេ និង តំបន់អឺរ៉ុប ដែលរៀបចំឡើងដោយមជ្ឈមណ្ឌល Mediterranean Exchange of Archaeological Tourism នៅរមណីយដ្ឋានបុរាណពិភពលោក (Paestum) ក្នុងប្រទេសអ៊ីតាលី។ នេះបើយោងតាមការផ្សព្វផ្សាយរបស់មជ្ឈមណ្ឌលខាងលើ នាថ្ងៃទី១៨ ខែវិច្ឆិកា នេះ។
វេទិកា ដែលផ្ដល់ការគាំទ្រនិងកិច្ចសហការពីអង្គការ UNESCO, UNWTO និង ICCROM មួយនេះបានចាប់ផ្ដើមពីថ្ងៃទី ១៥ ដល់ ១៨ ខែវិច្ឆិកា ឆ្នាំ២០១៨ មានអ្នកចូលរួមជាង ១០ ០០០ នាក់ មកពី ៣០ ប្រទេស រួមទាំងកម្ពុជា បានផ្ដោតសំខាន់ទៅលើកការលើកកម្ពស់សារៈសំខាន់នៃបេតិកភណ្ឌវប្បធម៌ ដែលជាកត្តាមួយនៃការសន្ទនាអន្តរវប្បធម៌សមាហរណកម្មសង្គមនិងការអភិវឌ្ឍសេដ្ឋកិច្ច។
បើតាមរបាយការណ៍ព័ត៌មានពីមជ្ឈមណ្ឌល Mediterranean Exchange of Archaeological Tourism លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនិងជាប្រធានអាជ្ញាធរជាតិអប្សរា ដែលបានដឹកនាំប្រតិភូ ទៅចូលរួមក្នុងកម្មវិធីនេះ ត្រូវបានលោក Ugo Picarelli ប្រធានមជ្ឈមណ្ឌល Mediterranean Exchange of Archaeological Tourism ដែលជាអ្នករៀបចំកម្មវិធីនេះឡើង ផ្ដល់ពានរង្វាន់បុរាណវិទ្យាប៉ាស្ទូម ឆ្នាំ២០១៨ បន្ទាប់ពីអ្នកស្រីបានឡើងធ្វើជាវាគ្មិនដ៏សំខាន់ក្នុងការជជែកពិភាក្សានៅថ្ងៃទី ១៧ ខែ វិច្ឆិកា ឆ្នាំ ២០១៨ ដោយធ្វើការប្រៀបធៀបពីលក្ខណៈប្រវត្តិសាស្ត្រនិងវិទ្យាសាស្ត្រ នៃប្រាសាទអង្គរវត្តដ៏អច្ឆរិយៈនៃប្រទេសកម្ពុជា និងកីឡដ្ឋានបុរាណដ្ឋានពិភពលោក(Colosseum)របស់ប្រទេសអ៊ីតាលី ដ៏គួរឲ្យចាប់អារម្មណ៍រួចមក។
.jpg)
លោកស៊ុម ម៉ាប់ អគ្គនាយកអាជ្ញាធរអប្សារា ថ្លែង នាថ្ងៃអាទិត្យនេះថា ពានរង្វាន់នេះគឺជាការបង្ហាញអំពីឧត្តមភាពរបស់កម្ពុជា ដែលកំពុងដើរលើមាគា៌ដ៏ត្រឹមត្រូវក្នុងកិច្ចការពារ អភិរក្ស និង អភិវឌ្ឍន៍បុរាណដ្ឋានបេតិកភណ្ឌពិភពលោក។
លោកថ្លែងថា៖«ពានរង្វាន់នេះគឺជាមហាកិតិ្តយសដ៏ថ្លៃថ្លាបំផុតរបស់យើង ព្រោះវាជាការទទួលស្គាល់ជាអន្តរជាតិ អំពីភាពអស្ចារ្យនៃរមណីយដ្ឋានអង្គរ ដែលជាសារមន្ទីរមានជីវិត ពោរពេញទៅដោយប្រវត្តិសាស្ត្រ សិល្បៈ និងបុរាណវិទ្យា»។
គួរបញ្ជាក់ថា វេទិកានេះ ត្រូវបានគេរៀបចំឡើងជារៀងរាល់ឆ្នាំ ហើយឆ្នាំនេះគឺជាខួបលើកទី៥០នៃការរកឃើញទីបុរាណដ្ឋានស័ក្ដិសិទ្ធិរបស់ជនជាតិក្រិកដ៏ល្បីល្បាញមួយក្នុងពិភពលោក ដោយបុរាណវិទូម្នាក់មកពីក្លិបNapoli គឺលោក Mario នាថ្ងៃទី០៣ ខែមិថុនា ឆ្នាំ ១៩៦៨។ ក្រៅពីលោកស្រី ភឿង សកុណា នៅមានបេក្ខជនបីនាក់ផ្សេងទៀត ដែលរួមមាន លោកស្រី Irina Bokova អតីតប្រធានអង្គការ UNESCO, លោក Avellino អគ្គនាយកសារមន្ទីរ Salerno និង សហការីរបស់គាត់ គឺ លោក Benevento ក៏ទទួលបានពានរង្វាន់ដ៏អស្ចារ្យពីកម្មវិធីនេះផងដែរ៕
