រថយន្តធ្វើដំណើរលើផ្លូវជាតិលេខ ៤៨ នៅក្នុងស្រុកត្រពាំងរូង ខេត្តកោះកុង។ រូបថត សុខ រស្មី
ភ្នំពេញៈ ក្រសួងសាធារណការនិងដឹកជញ្ជូន បានជំរុញដល់គ្រប់មន្ទីរក្រោមឱវាទរបស់ខ្លួន ចុះធ្វើសកម្មភាពត្រួតពិនិត្យនិងជួសជុលកែលម្អ ប្រព័ន្ធហេដ្ឋារចនាសម្ព័ន្ធផ្លូវថ្នល់ ដែលរងការខូចខាតដោយជំនន់ទឹកភ្លៀងនាពេលកន្លងមក ជាបន្ទាន់ ដើម្បីសម្រួលដល់ការធ្វើដំណើរទៅមករបស់ប្រជាពលរដ្ឋ។
លោក នូ វឌ្ឍនៈ អ្នកនាំពាក្យក្រសួងសាធារណការនិងដឹកជញ្ជូន ប្រាប់ភ្នំពេញប៉ុស្តិ៍ ម្សិលមិញថា ជំនន់ទឹកភ្លៀងក្នុងរយៈពេលប៉ុន្មានខែកន្លងមកនេះ បានបង្កការខូចខាតផ្លូវក្នុងក្របខ័ណ្ឌទូទាំងប្រទេស សរុប៩០គីឡូម៉ែត្រ ដែលធ្វើឲ្យមានផលប៉ះពាល់ជាអវិជ្ជមានដល់ដំណើរការអភិវឌ្ឍវិស័យដឹកជញ្ជូននៅកម្ពុជា និងបង្កការខាតបង់ថវិកាជាតិជាច្រើនលានដុល្លារផងដែរ។
លោក វឌ្ឍនៈ បញ្ជាក់ថា៖«ជំនន់ទឹកភ្លៀងនៅក្នុងឆ្នាំនេះ បានធ្វើឲ្យផ្លូវចំនួន៣២ខ្សែ រងការខូចខាត គិតជាទឹកប្រាក់អស់ជាង៩លានដុល្លារ ក្នុងនោះផ្លូវជាតិលេខ៤៨ រងការខូចខាតធ្ងន់ធ្ងរជាងគេ ដែលទាមទារឲ្យមានការជួសជុលកែលម្អ ជាបន្ទាន់ ដើម្បីសម្រួលដល់ការធ្វើដំណើរទៅមករបស់ប្រជាពលរដ្ឋ និង ធ្វើយ៉ាងណាឲ្យហើយមុនពិធីបុណ្យសមុទ្រ ដែលនឹងត្រូវធ្វើឡើងនៅខេត្តកោះកុង ក្នុងខែធ្នូខាងមុខនេះ»។
.jpg)
ផ្លូវជាតិលេខ ៤៨ ដែលតភ្ជាប់ពីផ្លូវជាតិលេខ ៤ ត្រង់ចំណុចព្រំប្រទល់រវាងស្រុកស្ទឹងហាវ ខេត្តព្រះសីហនុ និង ស្រុកស្រែអំបិល ខេត្តកោះកុង ឆ្ពោះទៅដល់ក្រុងខេមរៈភូមិន្ទខេត្តកោះកុង មានប្រវែ ង១៣៨ គីឡូម៉ែត្រ ត្រូវបានសាងសង់កាលពីជាង១០ឆ្នាំមុន។ ដោយសារកត្តាអាកាសធាតុ ដែលបង្កឲ្យមានជំនន់ទឹកភ្លៀងជន់លិចផ្លូវដោយកន្លែង និងកត្តារួមផ្សំជាច្រើនទៀត បានធ្វើឲ្យផ្លូវនេះ រងការខូចខាតជាបន្តបន្ទាប់ ពិសេស នៅក្នុងឆ្នាំនេះមានការខូចខាតយ៉ាងដំណំតែម្ដង។
ទោះជាបែបណាក្ដី នៅថ្ងៃនេះ អាជ្ញាធរពាក់ព័ន្ធក្នុងខេត្តកោះកុង បានបញ្ចេញសកម្មភាពឆ្លើយតបភ្លាមៗ ទៅលើយន្តការនៃការជួសជុលកែលម្អផ្លូវនេះឡើងវិញ ដោយក្រុមមន្ត្រីមន្ទីរសាធារណការនិងដឹកជញ្ជូន បានចល័តគ្រឿងចក្រទៅកាន់តំបន់ដែលមានការខូចខាតផ្លូវធ្ងន់ធ្ងរ ដើម្បីឈូសឆាយសម្រួលចរាចរណ៍ជាបណ្ដោះអាសន្នឲ្យបានប្រសើរឡើងវិញ។
លោក ឬទ្ធី កណ្ណារ៉ា អ្នកនាំពាក្យមន្ទីរសាធារណការ និង ដឹកជញ្ជូន ខេត្តកោះកុង ប្រាប់ភ្នំពេញប៉ុស្តិ៍ នៅថ្ងៃនេះថា ជំនន់ទឹកភ្លៀងនៅក្នុងឆ្នាំនេះ បានធ្វើឲ្យផ្លូវជាតិលេខ៤៨ រងការខូចខាតសរុបអស់ប្រវែងជាង៣០គីឡូម៉ែត្រ ក្នុងនោះនៅតំបន់ស្រុកស្រែអំបិល ត្រពាំងរ៉ូង និង តាតៃ មានការខូចខាតធ្ងន់ធ្ងរជាងគេ។ ក្រៅពីផ្លូវជាតិលេខ៤៨ ផ្លូវឧបសម្ព័ន្ធមួយចំនួនទៀតនៅក្នុងខេត្តនេះក៏រងការខូចខាតផងដែរ។
លោកបញ្ជាក់ថា៖«នៅពេលនេះ ក្រុមការងាររបស់យើង ដែលមានការចូលរួមពីអាជ្ញាធរពាក់ព័ន្ធនានានៅទូទាំងខេត្ត បានចល័តគ្រឿងចក្រទៅកាន់គោលដៅសំខាន់ៗទាំង៣ ដើម្បីធ្វើការឈូសឆាយ និង ចាក់ដីកិនបង្ហាប់បំពេញជង្ហុក ធ្វើយ៉ាងណាឲ្យស្ថានភាពផ្លូវមានលក្ខណៈល្អប្រសើរ និងបង្កភាពងាយស្រួល ដល់ការធ្វើដំណើររបស់សាធារណជនទូទៅ»។
បើតាមការអះអាងរបស់លោក កណ្ណារ៉ា ក្រុមការងារថ្នាក់ខេត្តបានចាត់កម្លាំងជា៣ក្រុម និង ៣គោលដៅសំខាន់ៗ ដើម្បីចុះធ្វើយុទ្ធនាការជួសជុលកែលម្អស្ថានភាពផ្លូវជាតិលេខ៤៨ ធ្វើយ៉ាងណាឲ្យការងារនេះបានសម្រេចមុនពិធីបុណ្យសមុទ្រ ដែលនឹងមកដល់នៅក្នុងខែធ្នូខាងមុខនេះ ខណៈរដ្ឋាភិបាលបានកំណត់យកតំបន់ឆ្នេរនៃខេត្តកោះកុង សម្រាប់ការរៀបចំពីធីបុណ្យសមុទ្រនៅក្នុងឆ្នាំនេះ។
ដោយឡែក អាជ្ញាធរខេត្តព្រះសីហនុ ក៏មិននៅស្ងៀមនោះដែរ បន្ទាប់ពីជំនន់ទឹកភ្លៀងបានបង្កឲ្យមានផលប៉ះពាល់ជាអវិជ្ជមាន ដល់ហេដ្ឋារចនាសម្ព័ន្ធផ្លូវជាតិលេខ៤ និងផ្លូវឧបសម្ព័ន្ធមួយចំនួនទៀតនៅក្នុងខេត្តរបស់ខ្លួន នាពេលកន្លងទៅថ្មីៗនេះ។
លោក ណុប ហេង ប្រធានមន្ទីរសាធារណការខេត្តព្រះសីហនុ បានថ្លែងម្សិលមិញថា បន្ទាប់ពីផ្ទៃមេឃមានភាពស្រឡះឡើងវិញ នាប៉ុន្មានថ្ងៃចុងក្រោយនេះ អាជ្ញាធរខេត្តព្រះសីហនុ តាមរយៈមន្ទីរសាធារណការនិងដឹកជញ្ជូន បានដាក់ចេញនូវយុទ្ធនាការ១០០ថ្ងៃ ដើម្បីធ្វើការជួសជុលកែលម្អស្ថានភាពផ្លូវជាតិលេខ៤ ត្រង់ចំណុចដែលមានការខូចខាតឡើងវិញ ដែលយុទ្ធនាការនេះបានចាប់ផ្ដើមកាលពីព្រឹកថ្ងៃពុធ។
លោក ណុប ហេង បន្តថា យុទ្ធនាការនេះ គឺធ្វើឡើងក្នុងគោលបំណង កែសម្រួលការលំបាករបស់ប្រជាពលរដ្ឋ និងអ្នកធ្វើដំណើរទាំងអស់នៅតាមបណ្តោយផ្លូវជាតិលេខ៤ ក្នុងទឹកដីដែលអាជ្ញាធរខេត្តព្រះសីហនុគ្រប់គ្រង ដែលចាប់ពីរង្វង់មូលក្បែរទីរួមស្រុកព្រៃនប់ មកដល់ទីរួមក្រុងព្រះសីហនុ។
លោកបានបញ្ជាក់ថា៖«ក្នុងរយៈពេល១០០ថ្ងៃនេះ យើងត្រូវខិតខំជុសជុល និងលុបឲ្យអស់នូវជង្ហុក នៅតាមបណ្ដោយផ្លូវជាតិលេខ៤ និងបណ្ដាផ្លូវមួយចំនួនទៀតនៅក្នុងទីរួមខេត្តព្រះសីហនុរបស់យើង។ ទោះជាបែបណាក្ដី យុទ្ធនាការនេះ បានជោគជ័យ គឺអាស្រ័យដោយមានការចូលរួមពីគ្រប់ភាគីពាក់ព័ន្ធ ពិសេស ពីប្រជាពលរដ្ឋ និង វិស័យឯកជន»។
លោកនូ វឌ្ឍនៈ អ្នកនាំពាក្យក្រសួងសាធារណការនិងដឹកជញ្ជូន អះអាងដែរថា នៅឆ្នាំក្រោយនេះរដ្ឋាភិបាលគ្រោងរៀបចំជួសជុលកែលម្អកំណាត់ផ្លូវជាតិលេខ៤ត្រង់ចំណុចស្ពានស្ទឹងសម្រោងក្នុងស្រុកស្ទឹងហាវ ដោយធ្វើការស្ដារពង្រីកបើកផ្លូវទឹកឲ្យធំ និងចាក់ដីលើកផ្លូវឲ្យខ្ពស់ជាងមុន ធ្វើយ៉ាងណាបញ្ចៀសការជន់លិចផ្លូវត្រង់ចំណុចខាងលើនេះទៀត។
លោកវឌ្ឍនៈ ក៏បានបង្ហើបឲ្យដឹងផងដែរថាផ្លូវជាតិលេខ៤១ ដែលតភ្ជាប់ពីចំណុចថ្នល់ទទឹង ឆ្ពោះទៅកាន់ខេត្តកំពតក៏រងការខូចខាតផងដែរ តែក្រុមហ៊ុនចិនមួយកំពុងធ្វើការជួសជុល ជាបណ្ដើរៗហើយ ខណៈផ្លូវជាតិលេខ៣ ចាប់ពីទីរួមខេត្តកំពតមកភ្នំពេញ បានរងការខូចខាតប្រមាណ ២០ គីឡូម៉ែត្រ គ្រោងនឹងធ្វើការជួសជុលស្ដារឡើងវិញនៅដើមឆ្នាំក្រោយនេះ។ លោកបានបន្តថា ដោយឡែកផ្លូវជាតិលេខ៤៨ ក្រុមហ៊ុនកូរ៉េមួយនឹងចាប់ផ្ដើមដំណើការជួសជុលស្ដារឡើងវិញផងដែរនៅពាក់កណ្ដាលឬចុងឆ្នាំក្រោយនេះ៕
