ក្មេងៗសិស្សានុសិស្សជិះកង់ទៅសាលារៀនមួយនៅក្នុងខេត្តកណ្ដាល នាពេលកន្លងមក។ រូបថត ភ្នំពេញ ប៉ុស្ដិ៍
ភ្នំពេញៈ ប្រទេស ជប៉ុន តាមរយៈកម្មវិធីស្បៀងអាហារពិភពលោករបស់អង្គការសហប្រជាជាតិបានបន្ដផ្ដល់ជំនួយឥតសំណងប្រមាណ ៣,១៨ លានដុល្លារអាមេរិកបន្ថែមទៀត ដល់រាជរដ្ឋាភិបាលកម្ពុជាក្នុងការអនុវត្ដកម្មវិធីផ្ដល់ស្បៀងអាហារនៅតាមសាលារៀនក្នុងសហគមន៍មានកុមារងាយរងគ្រោះដែលគម្រោងនេះនឹងផ្តល់អាហារពេលព្រឹកដល់កុមារចំនួន ៥ ម៉ឺននាក់ ដើម្បីលើកកម្ពស់សន្ដិសុខស្បៀង និងការអប់រំរបស់កុមារគិតចាប់ពីឆ្នាំ ២០១៩ ដល់ឆ្នាំ ២០២០។
ពិធីចុះហត្ថលេខាផ្ដល់ជំនួយឥតសំណងរបស់ប្រទេសជប៉ុនដល់រាជរដ្ឋាភិបាលកម្ពុជាដែលបានធ្វើឡើងកាលពីម្សិលមិញនេះមានការចូលរួមជាអធិបតីពីលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា លោក Mikami Masahiro ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងលោកស្រី Francesca Erdelmann តំណាង និងជានាយិកាកម្មវិធីស្បៀងអាហារពិភពលោកប្រចាំប្រទេសកម្ពុជានៅក្រសួងអប់រំយុវជន និងកីឡា។
លោក ហង់ជួន ណារ៉ុន បានថ្លែងប្រាប់អ្នកសារព័ត៌មានក្រោយពិធីចុះហត្ថលេខាផ្ដល់ជំនួយនេះថា ជំនួយបន្ថែមជាង ៣ លានដុល្លារ របស់ប្រទេស ជប៉ុន នេះនឹងទទួលបានជាត្រីខកំប៉ុងពីប្រទេស ជប៉ុន ដើម្បីយកត្រីខនេះទៅរៀបចំជាអាហារពេលព្រឹក សម្រាប់សិស្សនៅតាមសាលាគោលដៅមួយចំនួនក្នុងនោះរាជរដ្ឋាភិបាលកម្ពុជាក៏បានផ្ដល់ជាអង្ករចំនួន ២ ពាន់តោនក្នុង ១ ឆ្នាំ ដើម្បីរៀបចំអាហារពេលព្រឹកសម្រាប់ផ្គត់ផ្គង់ដល់សិស្សក្រីក្រនៅតាមសាលាគោលដៅនេះផងដែរ។
.jpg)
លោកថ្លែងថា៖ «ក្នុងឆ្នាំនេះក្រសួងអប់រំនឹងអនុវត្ដការងារនេះដោយខ្លួនឯងដោយពាក់កណ្ដាលគឺយើងនឹងអនុវត្ដនៅក្នុងខេត្ដគោលដៅចំនួន ៦ ដែលក្នុងនោះកុមារ ៥ ម៉ឺននាក់នឹងទទួលបានអាហារពេលព្រឹកពីរាជរដ្ឋាភិបាល»។
លោករដ្ឋមន្ដ្រីបានឲ្យដឹងថា ខេត្ដគោលដៅដែលនឹងទទួលបានជំនួយនោះរួមមានខេត្ដសៀមរាប បាត់ដំបង បន្ទាយមានជ័យ ព្រះវិហារ កំពង់ឆ្នាំង និងខេត្ដកំពង់ធំ។ ជាមួយគ្នានេះកម្មវិធីស្បៀងអាហារពិភពលោកដែលទទួលបានជំនួយពីប្រទេសជប៉ុននេះនឹងអនុវត្ដការផ្ដល់ស្បៀងអាហារដល់សាលាគោលដៅចំនួន ៥ ផងដែរក្នុងនោះមានខេត្ដសៀមរាប កំពង់ធំ កំពង់ឆ្នាំង ពោធិ៍សាត់ និងខេត្ដឧត្ដរមានជ័យ។
ពិធីចុះហត្ថលេខាផ្ដល់ជំនួយឥតសំណងរបស់ប្រទេសជប៉ុនពីម្សិលមិញ។ រូប វ៉ន ដារ៉ា
លោកបញ្ជាក់ថា៖ «ជារួមប្រទេសជប៉ុនចាប់តាំងពីឆ្នាំ ២០១១ រហូតមកបានផ្ដល់ថវិកាជិត ១៧ លានដុល្លារអាមេរិក ក្នុងការអនុវត្ដកម្មវិធីម្ហូបអាហារនៅតាមសាលារៀន។ ការផ្ដល់ម្ហូបអាហារនេះអាចឲ្យកុមារនៅតំបន់ទីទ័លក្រ តំបន់ដាច់ស្រយាលអាចទៅរៀនបាន ព្រោះបើមិនមានការផ្ដល់អាហារបែបនេះ កុមារមួយចំនួនមិនចង់ទៅរៀនទេ។ ដូច្នេះកម្មវិធីផ្ដល់ស្បៀងអាហារនេះ ក៏ជាការទាក់ទាញឲ្យកុមារទៅរៀនដោយមានអាហារគ្រប់គ្រាន់ការសិក្សាបានលូតលាស់ជាងមុន»។
លោក Mikami Masahiro ក៏បានថ្លែងពេលចុះហត្ថលេខាផ្ដល់ជំនួយពីម្សិលមិញដែរថាតាមរយៈជំនួយស្បៀងអាហារដល់សាលារៀនកម្ពុជានេះ រដ្ឋាភិបាលជប៉ុននឹងផ្ដល់ជំនួយឥតសំណងជាទឹកប្រាក់សរុប ៣៥០ លានយ៉េន ស្មើប្រមាណ ៣ លាន ២ សែន ដុល្លារ ដើម្បីទិញត្រីខកំប៉ុងប្រមាណ ៤១៥ លានតោនសម្រាប់ផ្គត់ផ្គង់អាហារពេលព្រឹករបស់សិស្សក្រីក្រនៅតាមសាលាសហគមន៍។
លោកថ្លែងថា៖ «សេដ្ឋកិច្ចកម្ពុជាបានកើនឡើងខ្លាំងក្នុងប៉ុន្មានទសវត្សរ៍កន្លងមកនេះហើយអត្រានៃភាពក្រីក្របានថយចុះគួរឲ្យកត់សម្គាល់។ ក៏ប៉ុន្ដែនៅតំបន់ជនបទ ប្រជាជន ១ ភាគធំនៅតែរងគ្រោះពីកង្វះអាហារូបត្ថម្ភពីព្រោះពួកគេមិនមានអាហារគ្រប់គ្រាន់»។
លោក Mikami Masahiro បានលើកឡើងថាក្នុងស្ថានភាពនេះតាមរយៈការផ្ដល់ត្រីខកំប៉ុងសម្រាប់កម្មវិធីផ្ដល់អាហារនៅតាមសាលារៀនរបស់កម្មវិធីស្បៀងអាហារពិភពលោកជំនួយនេះមិនត្រឹមតែរួមចំណែកក្នុងការលើកស្ទួយសុខភាពកុមារថែមទាំងធ្វើឲ្យកុមារទទួលបានការអប់រំនៅសាលាតាមសហគមន៍របស់ពួកគេផងដែរ។
លោកស្រី Francesca Erdelmann បានថ្លែងក្នុងពិធីចុះហត្ថលេខានេះដែរថា តាមរយៈការផ្ដល់ជំនួយនៃកម្មវិធីស្បៀងអាហារនៅតាមសាលារៀននៅទីជនបទនេះលោកស្រីបានជជែកពិភាក្សាជាច្រើនជាមួយភាគីក្រសួងអប់រំ និងភាគីផ្ដល់ជំនួយប្រទេស ជប៉ុន។
លោកស្រីថ្លែងថា៖ «ខ្ញុំពិតជារំភើបណាស់ លើលទ្ធផលនៃការងាររួមគ្នាដ៏ខ្លាំងក្លាលើកម្មវិធីស្បៀងអាហារតាមសាលារៀននេះ។ ក្នុងពេលឆាប់ៗខាងមុខនេះរដ្ឋាភិបាលកម្ពុជានឹងចាប់ផ្តើមគ្រប់គ្រងដោយផ្ទាល់នូវកម្មវិធីស្បៀងអាហារនៅតាមសាលាជាច្រើន ហើយសាលាទាំងនោះនឹងត្រូវបានជ្រើសរើសដោយប្រុងប្រយ័ត្ន»។
លោកស្រីបានបន្ដថា កម្មវិធីស្បៀងអាហារពិភពលោក យើងនឹងគាំទ្រអ្នកជាអន្តរកាលតាមរយៈជំនួយបច្ចេកទេស និងការគាំទ្រ។ ពិតណាស់ យើងនឹងបន្តផ្តល់អាហារនៅតាមសាលារៀនរហូតដល់រដ្ឋាភិបាល ត្រៀមលក្ខណៈទាំងស្រុងដើម្បីស្រូបយកកម្មវិធីសាលារៀនទាំងអស់ ហើយរហូតដល់ពង្រីកកម្មវិធីនេះបានឲ្យច្រើន។
WFP បានឲ្យដឹងថាតាមរយៈជំនួយឥតសំណងរបស់រដ្ឋាភិបាលជប៉ុនលើកម្មវិធីផ្ដល់ស្បៀងអាហារនៅតាមសាលារៀននេះ សិស្សសាលាបឋមសិក្សា ប្រមាណ ២១៧ ៩០០ នាក់ ក្នុងខេត្ដគោលដៅទាំង ៥ ខាងលើនឹងទទួលបានអាហារពេលព្រឹករៀងរាល់ថ្ងៃ។ កុមារទាំងនោះនឹងទទួលបានអាហារដែលត្រូវបានចម្អិនឡើងរួមមាន បាយត្រីខកំប៉ុង ប្រេងឆា អំបិលអ៊ីយ៉ូត និងបន្លែ ដែលមានបរិមាណស្មើ ៥៥០ គីឡូកាឡូរី៕
