ព្រះសីហនុៈ ស្នងការខេត្តព្រះសីហនុកាលពីម្សិលមិញបានបញ្ជូនជនជាតិចិន ១០ នាក់ទៅតុលាការ បន្ទាប់ពីចាប់ឃាត់ខ្លួនកាលពីថ្ងៃទី ១៩ ខែមិថុនា ពាក់ព័ន្ធនឹងហិង្សាទៅលើជនជាតិចិនដូចគ្នា ២ នាក់នៅក្នុងខេត្តជាប់មាត់សមុទ្រមួយនេះ។
បើតាមសមត្ថកិច្ចខេត្តជនជាតិចិន ១០ នាក់នេះត្រូវបានកម្លាំងនគរបាលខេត្តចាប់ខ្លួនពាក់ព័ន្ធនឹងករណីវាយដំទាត់ធាក់ជនជាតិចិន ២ នាក់ រហូតដល់សន្លប់ហើយចាប់ដាក់ក្នុងរថយន្តដើម្បីបើកចេញពីកាស៊ីណូញូវហ្គោលឌិវែលស្ថិតនៅក្រុមទី ១៦ សង្កាត់លេខ ៤ កាលពីទី ១៩ ខែមិថុនាវេលាម៉ោង ១២ និង ៣០ នាទីយប់។
បើតាមលោក ជួន ណារិន្ទ ស្នងការខេត្តព្រះសីហនុបានឲ្យដឹងថា ជនជាតិចិនមួយក្រុមបានជិះរថយន្តមួយគ្រឿងចេញពីកាស៊ីណូឌីហាវឆ្ពោះទៅកាស៊ីណូ «ញូវហ្គោលឌិនវែល»។ ពេលទៅដល់ពួកគេបានវាយទៅលើជនជាតិចិន ២ នាក់បណ្តាលឲ្យសន្លប់រួចក៏យកជនរងគ្រោះបោះចូលរថយន្ត ដែលពួកគេជិះមកហើយក៏បើកចេញ។ ប៉ុន្តែភ្លាមៗនោះពលរដ្ឋរាយការណ៍ប្រាប់សមត្ថកិច្ចហើយសមត្ថកិច្ចក៏ដេញចាប់បានភ្លាមៗ។
លោក ឯក ស៊ុត សំអុន នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថាជនរងគ្រោះឈ្មោះ Huang Cheng និង He Jun ទាំង ២ នាក់ធ្វើការនៅកាស៊ីណូ ញូវហ្គោលឌិនវែលបានរងរបួសធ្ងន់ ហើយកំពុងសម្រាកព្យាបាលនៅមន្ទីរពេទ្យ។
ចំណែកជនសង្ស័យទាំង ១០ នាក់ត្រូវបញ្ជូនទៅសាលាដំបូងខេត្ត ប៉ុន្តែមិនទាន់ត្រូវបានចោទប្រកាន់ជាផ្លូវការនៅឡើយ។ ទោះយ៉ាងណាសមត្ថកិច្ចបានចោទប្រកាន់បឋមពីបទ «ហិង្សាដោយចេតនា មានស្ថានទម្ងន់ទោស»។ ចំពោះមូលហេតុដែលឈានដល់ហិង្សានេះក្រុមជនសង្ស័យមិនសារភាពឡើយ៕