ព្រះសីហនុៈ លោក យន្ត មីន អភិបាលខេត្តព្រះសីហនុបានធ្វើលិខិតទៅព្រះរាជអាជ្ញានៃអយ្យការអមសាលាដំបូងខេត្តសុំឲ្យដោះលែងពលរដ្ឋ ៤ នាក់ឲ្យបាននៅក្រៅឃុំបណ្ដោះអាសន្នមុនពេលដំណើរការឃោសនាបោះឆ្នោតជ្រើសតាំងតំណាងរាស្ត្រនៅខែកក្កដាក្នុងបំណងមិនឲ្យមានការប្រមូលផ្ដុំគ្នាតវ៉ារឿងជម្លោះដីធ្លីនៅក្នុងអំឡុងពេលយុទ្ធនាការឃោសនារកសំឡេងឆ្នោត។
យោងតាមលិខិតរបស់រដ្ឋបាលខេត្តព្រះសីហនុចុះថ្ងៃទី ១៥ ខែមិថុនា ឆ្នាំ ២០១៨ ចុះហត្ថលេខាដោយលោក យន្ត មីន ដែលភ្នំពេញប៉ុស្តិ៍ទទួលបានកាលពីម្សិលមិញបានឲ្យដឹងថា៖ «ពាក់ព័ន្ធនឹងករណីនេះ បើសិនជាលោកស្រីព្រះរាជអាជ្ញា និងលោកប្រធានសាលាដំបូងខេត្តអាចពិនិត្យលទ្ធភាពក្នុងការឃុំខ្លួនបណ្ដោះអាសន្នត្រឹមមុនថ្ងៃទី ៧ ខែកក្កដា ឆ្នាំ ២០១៨ ដែលជាថ្ងៃបើកយុទ្ធនាការបោះឆ្នោតនោះរដ្ឋបាលខេត្តនឹងមានភាពធូរស្រាលក្នុងការទទួលដោះស្រាយជាមួយប្រជាពលរដ្ឋដែលតែងតែមកទាមទារតវ៉ានៅមុខសាលាខេត្តព្រះសីហនុស្ទើររាល់ថ្ងៃ។ រីឯយន្តការផ្លូវច្បាប់គឺនៅតែបន្តតាមនីតិវិធីដដែល»។
ពលរដ្ឋទាំង ៤ រូបនោះមានឈ្មោះ លុច ទូច (ឡុច ទូច), កៅ ហេង (កៅ ចឹក), ញ៉ាញ់ ជាតិ, និង ម៉ែន ខេន ត្រូវបានតុលាការឃុំខ្លួនបណ្ដោះអាសន្នចាប់ពីថ្ងៃទី ៨ ខែឧសភាដោយពួកគេត្រូវបានតំណាងអយ្យការសម្រេចឃុំខ្លួនក្នុងរយៈពេលអតិបរមាចំនួន ៣ ខែ។
.jpg)
ប៉ុន្តែពួកគេបានជាប់ឃុំជាង ១ ខែហើយមកដល់ពេលនេះហើយការស្នើសុំដោះលែងនេះធ្វើឡើងតាមសំណើរបស់ពលរដ្ឋ ៦២០ គ្រួសារដែលបានស្នើសុំអន្តរាគមន៍ឲ្យមានការដោះលែងពួកគេទាំង ៤ ឲ្យបាននៅក្រៅឃុំបណ្ដោះអាសន្ន។
កាលពីថ្ងៃទី ៧ ខែមិថុនាពលរដ្ឋ ៦ នាក់ត្រូវបានអាវុធហត្ថខេត្តព្រះសីហនុចាប់ខ្លួនបញ្ជូនទៅតុលាការពាក់ព័ន្ធនឹងជម្លោះដីធ្លីជាមួយឧកញ៉ាម្នាក់ តែតុលាការបានចោទប្រកាន់តែពលរដ្ឋ ៤ នាក់ប៉ុណ្ណោះពីបទប្រើហិង្សា។
លោក យឹម ប៊ុណ្ណារ៉េត ប្រធានលេខាធិការដ្ឋានរដ្ឋបាលនៃសាលាដំបូងខេត្តព្រះសីហនុ និងអ្នកនាំពាក្យអយ្យការបានបដិសេធក្នុងការផ្ដល់អត្ថាធិប្បាយដោយបានរុញសំណួរពីមួយទៅមួយ។ ខណៈ លោក ហ៊ី រ៉ា ដែលត្រូវជាកូនប្រុសរបស់អ្នកស្រី លុច ទូច បានប្រាប់ឲ្យដឹងកាលពីម្សិលមិញថា មិនទាន់មានចំណាត់ការអ្វីពីភាគីតុលាការនៅឡើយទេ។
លោក ស៊ឹង សែងករុណា មន្ដ្រីផ្នែកស៊ើបអង្កេត Adhoc បានថ្លែងថាអាជ្ញាធរចាត់វិធានការនេះដោយសារការទាមទារពីប្រជាពលរដ្ឋនៅមុនដំណាក់កាលបោះឆ្នោតមកដល់៕
