លោក ផុន សុភា អតីតមេឃុំឈើខ្មៅ ស្រុកកោះធំ ត្រូវបានចាប់ខ្លួនពីបទ រួមគំនិតក្បត់។ រូបថត ហ្វេសប៊ុក
កណ្ដាលៈ នគរបាលខេត្តកណ្ដាលបានឲ្យដឹងកាលពីម្សិលមិញថា សាលាដំបូងខេត្តកណ្ដាលបានសម្រេចឃុំខ្លួនមនុស្ស ៤ នាក់ជាបណ្ដោះអាសន្ន និងតាមចាប់ខ្លួនម្នាក់ ដោយហេតុទទួលផែនការអូសទាញចលនាប្រជាពលរដ្ឋឲ្យងើបគាំទ្រការវិលត្រឡប់មកវិញរបស់លោក សម រង្ស៊ី អតីតមេដឹកនាំគណបក្សប្រឆាំងដែលប្រកាសជារឿយៗនឹងវិលត្រឡប់មកកម្ពុជាវិញនៅថ្ងៃទី ៩ ខែវិច្ឆិកា។
លោក អ៊ាវ ចំរើន ស្នងការនគរបាល ខេត្តកណ្ដាលបានឲ្យដឹងកាលពីម្សិលមិញថា មនុស្សទាំងនោះមានឈ្មោះ ផុន សុភា ភេទប្រុស អាយុ ៣១ ឆ្នាំ ឈ្មោះ ឈុន ថៃ ឈ្មោះ លី ម៉េងឃៀង ឈ្មោះ លី លីន ត្រូវចោទប្រកាន់ពីបទរួម «រួមគំនិតក្បត់» និងបានសម្រេចបញ្ជូនខ្លួនទៅឃុំនៅក្នុងពន្ធនាគាររួចហើយ។
លោក សូ សារិន អ្នកនាំពាក្យសាលាដំបូងខេត្តកណ្តាលបានថ្លែងថាចៅក្រមស៊ើបសួរសាលាដំបូងខេត្តកាលពីថ្ងៃទី ១៦ ខែតុលា ឆ្នាំ ២០១៩ បានចេញដីកាឲ្យសមត្ថកិច្ចតាមចាប់ខ្លួនឈ្មោះ ភ្លឺ ប៊ុនស៊ុន ភេទប្រុស អាយុ ៣២ ឆ្នាំពីបទ «រួមគំនិតក្បត់» ដែលពាក់ព័ន្ធនឹងការប៉ុនប៉ងចូលរួមធ្វើរដ្ឋប្រហារខុសច្បាប់រៀបចំដោយលោក សម រង្ស៊ី។
.jpg)
សេចក្ដីប្រកាសព័ត៌មានអ្នកនាំពាក្យរូបនេះបានឲ្យដឹងថាតំណាងអយ្យការអមសាលាដំបូងខេត្តកណ្តាលនៅថ្ងៃទី ១៦ ខែតុលា ឆ្នាំ ២០១៩ បានសម្រេចចោទប្រកាន់ឈ្មោះ ផុន សុភា ភេទប្រុស អាយុ ៣១ ឆ្នាំ ឈ្មោះ ភ្លឺ ប៊ុនស៊ុន ភេទប្រុស អាយុ ៣២ ឆ្នាំ និងគូកនពីបទ «រួមគំនិតក្បត់» តាមមាត្រា ៤៥៣ នៃក្រមព្រហ្មទណ្ឌនៃព្រះរាជាណាចក្រកម្ពុជាដែលពាក់ព័ន្ធនឹងរដ្ឋប្រហារខុសច្បាប់ រៀបចំដោយលោក សម រង្ស៊ី។ ជនទាំង ២ និងគូកនបានទៅជួបទណ្ឌិត សម រង្ស៊ី នៅប្រទេសម៉ាឡេស៊ីកាលពីថ្ងៃទី ១៥ ខែកញ្ញា ឆ្នាំ ២០១៩ ដើម្បីទទួលផែនការអូសទាញ ចលនាប្រជាពលរដ្ឋឱ្យងើបឡើងប្រឆាំងរាជរដ្ឋាភិបាលក្រោមឧបាយកល «ផែនការនៃការវិលត្រលប់វិញរបស់ទណ្ឌិត សម រង្ស៊ី» នៅថ្ងៃទី ៩ ខែវិច្ឆិកា ឆ្នាំ ២០១៩»។
លុះពេលត្រឡប់មកដល់ប្រទេសកម្ពុជាវិញ ជនទាំង ២ នេះ និងគូកនមួយចំនួនទៀតបានចាប់ផ្តើមសកម្មភាពអនុវត្តតាមផែនការខាងលើដោយបានចែករំលែកព័ត៌មានតាមបណ្តាញសង្គមហ្វេសប៊ុកដែលមានខ្លឹមសារវាយប្រហាររាជរដ្ឋាភិបាល បំផុសបំផុល ញុះញង់ ឃោសនា ប្រមូលផ្ដុំពលរដ្ឋដើម្បីចាំទទួលការវិលត្រឡប់របស់ទណ្ឌិត សម រង្ស៊ី និងបង្កចលាចល បង្កភាពអសន្តិសុខសង្គម ញុះញង់កម្លាំងប្រដាប់អាវុធឲ្យប្រឆាំងរាជរដ្ឋាភិបាល។
អ្នកនាំពាក្យនៃអយ្យការអមសាលាដំបូងខេត្តកណ្តាលបានឲ្យដឹងដែរថា អ្នកពាក់ព័ន្ធនឹងការគាំទ្រ ឬ ចូលរួមអនុវត្តផែនការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាល នឹងត្រូវប្រឈមនឹងការកាត់ទោសតាមច្បាប់ពីបទ «រួមគំនិតក្បត់» ដែលអាចជាប់ទោសពី ៥ ឆ្នាំ ទៅ ១០ ឆ្នាំតាមមាត្រា ៤៥៣ នៃក្រមព្រហ្មទណ្ឌ លើកលែងតែអ្នកពាក់ព័ន្ធទាំងនោះចូលខ្លួនមកសារភាពទាន់ពេលវេលាដែលពួកគេអាចនឹងត្រូវលើកលែងឱ្យរួចពីទោសតាមបញ្ញត្តិពិសេសមាត្រា ៤៥៤ នៃក្រមព្រហ្មទណ្ឌ។
ដោយឡែកសេចក្តីថ្លែងការណ៍របស់អ្នកនាំពាក្យនៃអយ្យការអមសាលាដំបូងខេត្តកំពង់ឆ្នាំងកាលពីរសៀលថ្ងៃទី ១៧ ខែ តុលា ឆ្នាំ ២០១៩ បានឲ្យដឹងថា អយ្យការអមសាលាដំបូងខេត្តកំពង់ឆ្នាំងបានសម្រេចចោទប្រកាន់ឈ្មោះ ដួង ចន្ត្រា ហៅ ត្រា ភេទប្រុស និងគូកនពីបទរួមគំនិតក្បត់យោងតាមមាត្រា ៤៥៣ នៃក្រមព្រហ្មទណ្ឌ។ ដួង ចន្ទ្រា ហៅ ត្រា ព្រមទាំងគូកនបានបំផុសបំផុលប្រជាពលរដ្ឋដោយចេតនាតាមរយៈបណ្តាញសង្គម Facebook ឈ្មោះ Duong Chantra ដើម្បីចូលរួមសកម្មភាពផ្តួលរំលំរាជរដ្ឋាភិបាលនៃព្រះរាជាណាចក្រកម្ពុជានៅថ្ងៃទី ៩ ខែវិច្ឆិកា ឆ្នាំ ២០១៩ ខាងមុខ។
ការចាប់ខ្លួនជាបន្តបន្ទាប់នេះ កើតមានឡើងពេលលោក សម រង្ស៊ី ថា លោកនឹងវិលចូលប្រទេសកម្ពុជាជាមួយពលករខ្មែរដោយដើរឆ្លងកាត់តាមព្រំដែន កម្ពុជា-ថៃ៕
