កំពង់ធំ/កោះកុង: មនុស្ស ៤ នាក់ ត្រូវបានឃាត់ និងឃុំខ្លួន ពាក់ព័ន្ធការកាប់ទន្ទ្រានព្រៃក្នុងដែនសហគមន៍តំបន់ការពារធម្មជាតិមកកាន់កាប់ដោយខុសច្បាប់ ដែលបានប្រព្រឹត្តនៅក្នុងតំបន់ដោយឡែកពីគ្នានៅក្នុងខេត្តកោះកុង និងខេត្តកំពង់ធំកាលពីសប្ដាហ៍មុន។
លោក សេង ប៊ុណ្ណា អនុប្រធាន និងជាចៅក្រមស៊ើបសួរនៃសាលាដំបូងខេត្តកំពង់ធំបានចេញដីកាកាលពីថ្ងៃទី ៩ សីហា ប៉ុន្តែភ្នំពេញប៉ុស្ដិ៍ ទើបទទួលបានកាលពីម្សិលមិញបានឲ្យដឹងថា សាលដីកាបានបញ្ជាឲ្យភ្នាក់ងារសមត្ថកិច្ចនៃកម្លាំងសាធារណៈនាំខ្លួនជនត្រូវចោទទាំង ៣ នាក់ ទៅឃុំខ្លួននៅពន្ធនាគារខេត្តកំពង់ធំបណ្ដោះអាសន្ន ដោយអនុវត្តឲ្យបានត្រឹមត្រូវតាមនីតិវិធីច្បាប់។ ជនសង្ស័យទាំង ៣ នាក់ មានមេភូមិម្នាក់ និងបក្ខពួក ២ នាក់ទៀត ត្រូវបានចោទប្រកាន់ កាប់គាស់រុករាន ឆ្ការដុត ឈូសឆាយដីព្រៃ ដើម្បីយកធ្វើជាកម្មសិទ្ធិ ស្ថិតនៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក។
យោងតាមដីកាដដែលនេះបានឲ្យដឹងថា ជនត្រូវចោទទាំង ៣ នាក់ ត្រូវបានសមត្ថកិច្ចឃាត់ខ្លួននៅថ្ងៃទី ៧ ខែ សីហា ត្រូវបានដាក់ឲ្យស្ថិតនៅក្រោមការពិនិត្យពីបទ កាប់គាស់ រុករាន ឆ្ការដុត និងឈូសឆាយដីព្រៃ ដើម្បីធ្វើជាកម្មសិទិ្ធ ប្រព្រឹត្តនៅក្នុងដែនសហគមន៍តំបន់ការពារធម្មជាតិជាំម្រេច ស្ថិតនៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ក្នុងចន្លោះឆ្នាំ ២០១៦ និង ២០១៩ តាមមាត្រា ៦២ នៃច្បាប់ស្ដីពីតំបន់ការពារធម្មជាតិ ២០១៨។
ជនត្រូវចោទទាំង ៣ នាក់នោះ រួមមានឈ្មោះទី១-សោម ច័ន្ទកុម្ភៈ អាយុ ៤២ ឆ្នាំ ជាប្រធានសហគមន៍ការពារធម្មជាតិជាំម្រេច ទី២-ឈ្មោះ ហេង សារឿន ហៅ ម៉ៅ អាយុ ៦៧ ឆ្នាំ ជាប្រធានភូមិតាឡែក និងទី៣-ឈ្មោះ សិត ហាន អាយុ ៣៣ ឆ្នាំ ជាបក្ខពួក ដោយពួកគេទាំង ៣ នាក់ រស់នៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
លោក តុប កក្កដា ប្រធានមន្ទីរបរិស្ថានខេត្តកំពង់ធំ បានថ្លែងថា ក្នុងនាមពួកគាត់ជាអ្នកគ្រប់គ្រងដីសហគមន៍ជាំម្រេចទាំងមូល ប៉ុន្ដែពួកគាត់មិនបានជួយការពារ បែរជាបានឃុបឃិតគ្នាយកដីសហគមន៍ទៅលក់ឲ្យពលរដ្ឋដទៃដែលមកពីខេត្តផ្សេងៗ។ លើសពីនេះ ពួកគាត់បានលាក់បាំងព័ត៌មានពលរដ្ឋសហគមន៍ ដោយមិនឲ្យមានការតវ៉ាអ្វីឡើយ។
លោកបន្តថា ប្រជាពលរដ្ឋចំនួន ១៨០ នាក់ តំណាងរាប់រយគ្រួសារ ដែលជាសមាជិកសហគមន៍បានសម្រេចចិត្តប្តឹងជនត្រូវចោទទាំង ៣ នោះ ព្រមទាំងមានជនខិលខូចមួយចំនួនទៀត បានឃុបឃិតគ្នា បើកដៃឲ្យប្រជាពលរដ្ឋផ្សេងចូលកាប់រានឈូសឆាយដីក្នុងដែនសហគមន៍តំបន់ការពារធម្មជាតិជាំម្រេចប្រមាណជិត ៣០ ហិកតា ដោយពួកគាត់ទាំង ៣ នាក់ បានចេញលិខិតទិញ-លក់ ដោយខ្លួនឯងផ្ទាល់។
លោក កក្កដា ថ្លែងថា៖ «យើងជាអ្នកដឹកនាំគួរនាំគ្នាផ្សព្វផ្សាយពង្រឹងសហគមន៍ ប៉ុន្ដែបែរជាឃុបឃិតគ្នាលក់ដីសហគមន៍ទៅវិញ។ អ៊ីចឹងខ្ញុំ មានតែប្រើផ្លូវច្បាប់អនុវត្តលើពួកគាត់ហើយ ព្រោះបើនាំគ្នាលក់អនាធិបតេយ្យបែបនេះ អ៊ីចឹងក្មេងៗជំនាន់ក្រោយមានដីឯណារស់នៅ អ៊ីចឹងត្រូវតែអនុវត្ត និងគោរពច្បាប់ទាំងអស់គ្នា»។
ករណីស្រដៀងគ្នានេះ មន្ទីរបរិស្ថានខេត្តកោះកុង បានសហការជាមួយកម្លាំងកងរាជអាវុធហត្ថលើផ្ទៃប្រទេស និងកម្លាំងអង្គការសម្ព័ន្ធមិត្តសត្វព្រៃ បានចុះប្រតិបត្តិការបង្ក្រាបបទល្មើសធនធានធម្មជាតិនៅថ្ងៃទី ១១ ខែ សីហា ឆ្នាំ ២០១៩ នេះ ចាប់ខ្លួនបុរសម្នាក់ ក្រោយធ្វើសកម្មភាពកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិ ស្ថិតនៅភូមិតាធង ឃុំដងពែង ស្រុកស្រែអំបិល ខេត្តកោះកុង។
លោក ម៉ន ផល្លា ប្រធានមន្ទីរបរិស្ថានខេត្តកោះកុង កាលពីម្សិលមិញ មិនទាន់អាចទាក់ទងបានទេ។
តាមសេចក្ដីប្រកាសព័ត៌មានរបស់មន្ទីរបរិស្ថានខេត្តកោះកុង ចុះថ្ងៃទី ១១ សីហានេះ ដែលភ្នំពេញប៉ុស្ដិ៍ទទួលបានកាលពីម្សិលមិញបង្ហាញថា ប្រពន្ធជនសង្ស័យឈ្មោះ ខន ផុន ស្នើសុំកាត់ឆ្វៀលផ្ទៃដី ចំនួន ១០ ហិកតា ក្នុងនោះដី ៤ ហិកតា ជនសង្ស័យបានអាស្រ័យផល និងធ្វើលំនៅឋានរស់នៅដោយគ្មានការហាមឃាត់ពីអាជ្ញាធរ និងពីមន្ត្រីបរិស្ថានទេ ប៉ុន្តែដី ៦ ហិកតាទៀត ជាដីអភិរក្សដែលមន្ត្រីបរិស្ថាន និងកម្លាំងអង្គការសម្ព័ន្ធមិត្តសត្វព្រៃតែងតែធ្វើការណែនាំ និងហាមឃាត់ជនសង្ស័យកុំឲ្យកាប់ទន្ទ្រាន តែជនសង្ស័យនៅតែព្យាយាមលួចកាប់ទន្ទ្រានដីអភិរក្សនោះដដែលទើបធ្វើឲ្យមានការឃាត់ខ្លួនជនសង្ស័យតែម្តង។
មន្ទីរបរិស្ថានបានបញ្ជាក់ថា ករណីដែលបង្កឡើងដោយជនសង្ស័យខាងលើនេះ ផ្ទុយពីច្បាប់ស្តីពីតំបន់ការពារធម្មជាតិ មាត្រា ៦២ ចំណុច ១ កាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិ ដែលតម្រូវឲ្យមន្ទីរបរិស្ថាន រៀបចំកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីបន្តនីតិវិធី។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (ADHOC) បានថ្លែងថា ការអនុវត្តច្បាប់ទៅលើជនគ្មានឥទ្ធិពល ឬគ្មានអំណាចនេះ គឺជាផ្នែកតូចមួយនៃសកម្មភាពរំលោភយកដីព្រៃ ឬដីពលរដ្ឋសហគមន៍។ ប៉ុន្តែកន្លងមក បុគ្គលមានឥទ្ធិពលមួយចំនួន មិនត្រូវបានដាក់ទោសទណ្ឌអ្វីទេ ក្រោយពីពួកគេបានរំលោភយកដីរបស់ពលរដ្ឋ និងដីព្រៃដែនអភិរក្ស ដោយគ្រាន់តែរឹបអូសដីទាំងនោះទុកជាសម្បត្តិរដ្ឋវិញប៉ុណ្ណោះ។
លោក ថ្លែងថា៖ «ចំណាត់ការអនុវត្តច្បាប់ ត្រូវតែធ្វើដូចគ្នាទាំងអ្នកមាន និងអ្នកក្រ ព្រោះកន្លងមក យើងមិនសូវបានឃើញ គេចាប់ឧកញ៉ា រំលោភដីធ្លីដាក់គុកប៉ុន្មានទេ បើអ្នកក្រក្រី គឺយើងឃើញមានច្រើនដែរ»៕