ភ្នំពេញ: វិធានការបង្ការ និងការទប់ស្កាត់ហានិភ័យអគ្គិភ័យកំពុងមានបញ្ហាប្រឈមច្រើន ខណៈមន្ត្រីជាន់ខ្ពស់នៃអគ្គស្នងការនគរបាលជាតិមើលឃើញថា សំណង់ អគារ រោងចក្រ និងសហគ្រាសមួយចំនួនត្រូវបានសាងសង់ឡើងដោយមិនបានគិតគូរពីបច្ចេកទេសបង្ការអគ្គិភ័យ និងមិនទាន់បំពាក់ប្រព័ន្ធសុវត្ថិភាពគ្រប់គ្រងអគ្គិភ័យឲ្យបានត្រឹមត្រូវនៅឡើយ។
ការលើកឡើងទាំងនេះគឺធ្វើឡើងនៅក្នុងកម្មវិធីសិក្ខាសាលាស្ដីពី «សុវត្ថិភាពអគ្គិភ័យនៅកម្ពុជា» ដែលរៀបចំឡើងដោយសមាគមសហគ្រាសបង្ការអគ្គិភ័យកម្ពុជាដើម្បីផ្សព្វផ្សាយលក្ខណៈបច្ចេកទេសការប្រើប្រាស់ឧបករណ៍សម្ភារ បង្ការពន្លត់អគ្គិភ័យ និងបង្ហាត់បង្រៀនអំពីរបៀបពន្លត់អគ្គិភ័យនៅតាមបណ្តាក្រុមហ៊ុន សណ្ឋាគារ សហគ្រាស រោងចក្រ និងស្ថានីយប្រេងឥន្ធនៈពីថ្ងៃចន្ទ។
លោក សេក ភូមី អគ្គស្នងការរងនគរបាលជាតិថ្លែងក្នុងសិក្ខាសាលានេះថា បច្ចុប្បន្នអង្គភាពជំនាញកំពុងជួបបញ្ហាប្រឈមជាច្រើនតាមរយៈកង្វះការយល់ដឹងរបស់ប្រជាពលរដ្ឋ និងសហគមន៍ជាទូទៅនៅមានកម្រិតទាបដែលជាហេតុធ្វើឲ្យស្មារតីចូលរួមភ្ញាក់រឭកអនុវត្តតាមវិធានការច្បាប់ ឬការធ្វេសប្រហែសនៅតែមានបញ្ហាខ្ពស់។
លោកថា៖ «យើងពុំទាន់មានច្បាប់ស្ដីពីសំណង់ និងបទដ្ឋានបច្ចេកទេសស្ដីពីការបំពាក់ប្រព័ន្ធពន្លត់អគ្គិភ័យនៅឡើយដែលជាហេតុធ្វើឲ្យយើងជួបប្រទះហានិភ័យខ្ពស់ សំណង់គោលដៅជាច្រើនគ្មានប្លង់ប្រព័ន្ធបង្ការពន្លត់អគ្គិភ័យដែលមានការទទួលស្គាល់ពីសមត្ថកិច្ចនគរបាលអគ្គិភ័យបញ្ហាសាងសង់លំនៅឋានមិនរៀបរយ បញ្ហាខ្វះហេដ្ឋារចនាសម្ព័ន្ធផ្លូវថ្នល់ ឬតូចចង្អៀតក៏បង្កជាឧបសគ្គច្រើន រាំងស្ទះដល់ប្រតិបត្តិការចេញពន្លត់របស់រថយន្តអគ្គិភ័យឲ្យទាន់ពេលវេលា»។
លោកបន្តថាក្នុងឆមាសទី ១ ឆ្នាំ ២០១៩ នេះដោយគួបផ្សំជាមួយការប្រែប្រួលអាកាសធាតុឡើងកម្ដៅ និងបណ្ដាលឲ្យកើតមានអគ្គិភ័យរហូតដល់ ៣១៥ លើក (កើន ៧៨ លើក ស្មើ ១៨,១៨ ភាគរយប្រៀបធៀបឆមាសទី ១ ឆ្នាំ២០១៨) បណ្ដាលឲ្យមានមនុស្សស្លាប់ ១០ នាក់របួស ៤៦ នាក់ ឆេះផ្ទះអស់ ៤១៨ ខ្នង រោងចក្រ ១ កន្លែង ឃ្លាំងស្ដុកសម្ភារ ៧ កន្លែង ស្ថានីយស្តុកហ្គាស ១ កន្លែង យានដ្ឋានជួសជុលរថយន្ត ១ កន្លែង ឆេះតូបលក់ដូរ ១២៩ តូប និងឧបករណ៍សម្ភារលុយកាក់អស់ជាច្រើនទៀត។
បើតាមលោក ភូមី មូលហេតុសំខាន់បង្កឲ្យមានអគ្គិភ័យកើតឡើងដោយសារការឆ្លងចរន្តអគ្គិសនី ៣៦,៨២ ភាគរយ ករណីធ្វេសប្រហែស ២៨,៩០ ភាគរយ និងដោយសារមូលហេតុផ្សេងៗទៀតដូចជា ជនល្មើសបង្កហេតុដុតបំផ្លាញ ឬកើតឡើងឯកឯងដោយសារធម្មជាតិប្រមាណ ៣៤,២៨ ភាគរយ។
ក្នុងចំណោមការឆេះទាំងនេះ គេរកឃើញថាមាន ១៣ ករណី បានបង្កទៅជាគ្រោះមហន្តរាយមានលក្ខណៈទ្រង់ទ្រាយធំរាលដាលដែលបណ្ដាលមកពីការធ្វេសប្រហែស ឬមិនគោរពតាមលក្ខខណ្ឌកំណត់ក្នុងការបង្ការអគ្គិភ័យ។
លោក ច្រឹង ដាវណ្ណារ៉ា អតីតអនុប្រធាននាយកដ្ឋាននគរបាលបង្ការ ពន្លត់ និងសង្គ្រោះក្នុងគ្រោះថ្នាក់ដោយសារអគ្គិភ័យនៃអគ្គស្នងការនគរបាលជាតិ ត្រូវបានអញ្ជើញមកធ្វើបទបង្ហាញពីបទពិសោធផ្ទាល់ខ្លួន ដោយលោកបានថ្លែងថា បច្ចុប្បន្ននៅកម្ពុជាមានការវិវឌ្ឍរីកចម្រើនយ៉ាងខ្លាំងផ្នែកហេដ្ឋារចនាសម្ព័ន្ធមានដូចជា សំណង់ ស្ថាប័នរដ្ឋ និងឯកជនកើតឡើងជាច្រើនមានអគារកម្ពស់ច្រើនជាន់ អគារក្រោមដី អគារសហកម្មសិទ្ធិ បុរីលំនៅឋានបណ្ដុំអគារពាណិជ្ជកម្មធំៗ សំណង់រោងចក្រ សហគ្រាស សិប្បកម្ម ស្ថានីយប្រេងឥន្ធនៈ ឧស្ម័នចំហេះ ឃ្លាំងស្ដុកប្រេងឥន្ធនៈ សិប្បកម្មបញ្ចូលឧស្ម័នចំហេះជាដើម។
លោកបន្តថា៖ «ទន្ទឹមការរីកចម្រើននេះយើងកំពុងជួបប្រទះសោកនាដកម្មដែលបណ្ដាលមកពីគ្រោះមហន្តរាយដោយគ្រោះអគ្គិភ័យបានបំផ្លាញសមិទ្ធផលដែលបានខិតខំកសាងដោយលំបាកអស់រយៈពេលជាច្រើនឆ្នាំកន្លងមករហូតមានករណីខ្លះធ្វើឲ្យគ្រោះថ្នាក់ដល់អាយុជីវិតមនុស្ស សត្វ និងទ្រព្យសម្បត្តិជាច្រើនទៀត»។
លោកបន្ថែមថាតាមតួលេខពី ១ ឆ្នាំទៅ ១ ឆ្នាំ បញ្ហាគ្រោះមហន្តរាយដោយអគ្គិភ័យមានការកើនឡើងជាលំដាប់ដែលជាក្ដីកង្វល់របស់ប្រជាពលរដ្ឋ និងអ្នកវិនិយោគទុន ចំពោះការបង្ការពន្លត់អគ្គិភ័យ និងសង្គ្រោះ ដើម្បីការពារអាយុជីវិតមនុស្ស សត្វ ទ្រព្យសម្បត្តិ បរិស្ថាន និងសន្ដិសុខ សណ្ដាប់ធ្នាប់សាធារណៈ។
លោក វ៉ាង គិតម៉េង ប្រធានសមាគមសហគ្រាសបង្ការអគ្គិភ័យកម្ពុជា និងជាអគ្គនាយកក្រុមហ៊ុន ខេមបូឌាន ហ្វែរវិន អិនធើប្រាយ ខមភេនី លីមីធីត (CFE) បានថ្លែងថា ប្រជាពលរដ្ឋក៏ដូចជាអាជីវករដែលមានអាជីវកម្មខ្នាតតូច ឬធំ និងមធ្យមត្រូវតែមានការប្រុងប្រយ័ត្នខ្ពស់ដោយត្រៀមឧបករណ៍ការពារសុវត្ថិភាពពន្លត់អគ្គិភ័យដែលអាចជួយសង្គ្រោះជាលក្ខណៈបឋម ឬបន្ទាន់។
លោកបន្តថា ចំណែកនៅតាមបណ្ដាក្រុមហ៊ុន រោងចក្រ សហគ្រាសអាជីវកម្មមួយចំនួនទៀតត្រូវយកចិត្ដទុកដាក់លើកិច្ចការនេះ ដោយត្រួតពិនិត្យលក្ខណៈបច្ចេកទេស និងរបៀបទុកដាក់បំពង់ពន្លត់អគ្គិភ័យឲ្យបានត្រឹមត្រូវ។ ពិសេសបង្រៀនកម្មករ ឬបុគ្គលិកពីវិធីប្រើបំពង់ពន្លត់អគ្គិភ័យនេះ និងវិធីបង្ការនានា។
លោកបញ្ជាក់ថា៖ «សូមបងប្អូនអាជីវករដែលមានមុខរបរគ្រប់ទីកន្លែង និងប្រជាពលរដ្ឋនៅតាមគេហដ្ឋានគួរតែមានបំពង់សុវត្ថិភាពដើម្បីការពារគ្រោះអគ្គិភ័យដែលកើតឡើងជាយថាហេតុ និងអនុវត្ដតាមបទដ្ឋានបច្ចេកទេសដែលការិយាល័យជំនាញបានបង្ហាត់បង្រៀនត្រូវយកចិត្តទុកដាក់ឲ្យបានខ្ពស់បំផុត»។
លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជាបានថ្លែងថា វិស័យធានារ៉ាប់រងមានការរីកចម្រើន ដោយសារម្ចាស់អាជីវកម្ម សហគ្រាស អគារ ផ្ទះសំបែង និងក្រុមគ្រួសារកម្ពុជាចង់ឲ្យមានការការពារកាន់តែច្រើនទៅលើការបាត់បង់ហិរញ្ញវត្ថុដែលបណ្ដាលមកពីការកើតឡើងនូវហានិភ័យនានាជាយថាហេតុ។
លោកបន្តថា ជាក់ស្ដែងសំណង់ដែលក្រុមហ៊ុនធានារ៉ាប់រងទទួលបានការទូទាត់សងអតិថិជនរបស់ខ្លួនចេះតែមានការកើនឡើងជាលំដាប់។ សំណងធានារ៉ាប់រងក្នុងឆ្នាំ ២០១៨ កន្លងទៅមានទំហំទឹកប្រាក់ប្រមាណ ២៥,៨ លានដុល្លារដែលក្នុងនោះសំណងផ្នែកធានារ៉ាប់រងទូទៅមានចំនួន ១៩,៨ លានដុល្លារ។
លោកបញ្ជាក់ថា៖ «បច្ចុប្បន្នមានប្រតិបត្តិករធានារ៉ាប់រងចំនួន ៣២ កំពុងមានប្រតិបត្តិការនៅក្នុងទីផ្សារធានារ៉ាប់រងនៅកម្ពុជា។ ក្នុងនោះក្រុមហ៊ុនធានារ៉ាប់រងទូទៅ ១៣ ក្រុមហ៊ុន ធានារ៉ាប់រងអាយុជីវិត ១១ ក្រុមហ៊ុនធានារ៉ាប់រងខ្នាតតូច ៧ និងក្រុមហ៊ុនធានារ៉ាប់រងបន្ត ១ ហើយក្រុមហ៊ុនទាំងនេះសុទ្ធតែជាសមាជិករបស់សមាគមធានារ៉ាប់រងកម្ពុជា»៕