គ្រាប់យុទ្ធភណ្ឌទាំងនេះ ដែលត្រូវបានអនុញ្ញាតឲ្យទុកនៅក្នុងសារមន្ទីរគ្រាប់មីនរបស់លោក អាគី រ៉ា។ ហ្វេសប៊ុក Bill Morse
ភ្នំពេញ: គ្រាប់យុទ្ធភណ្ឌច្រើនប្រភេទចំនួន ៣៨៥ គ្រាប់ដែលបន្សាបជាតិផ្ទុះរួចត្រូវបានអនុញ្ញាតឲ្យយកទៅទុកនៅអង្គការសារមន្ទីរគ្រាប់មីនរបស់លោក អាគីរ៉ា នៅភូមិខ្នារ ឃុំខ្នារសណ្តាយ ស្រុកបន្ទាយស្រីខេត្តសៀមរាប ដើម្បីដាក់តាំងបង្ហាញភ្ញៀវទេសចរទស្សនា បន្ទាប់ពីមន្ត្រីជំនាញចុះត្រួតពិនិត្យរួចកាលពីថ្ងៃទី ៩ ខែ មេសា។
លោក ឈុន បូរ៉ា គ្រូបង្វឹកបច្ចេកទេសក្រុមមន្ត្រីដោះមីននៃអង្គការដោះមីនកម្ពុជា (Cambodia Self Help Landmine) ដែលជាប្រតិបត្តិករប្រមូលគ្រាប់ទាំងនោះបានប្រាប់ភ្នំពេញប៉ុស្ដិ៍កាលពីម្សិលមិញថា ក្រុមការងារលោកបានជូនដំណឹងទៅអាជ្ញាធរមីន អាជ្ញាធរមូលដ្ឋាននិងក្រុមជំនាញមីនដោយសមត្ថកិច្ចទាំងនោះ បានមកត្រួតពិនិត្យរួចរាល់ហើយ កាលពីថ្ងៃទី ៩ មេសា ហើយក៏បានអនុញ្ញាតឲ្យលោកយកគ្រាប់ទាំង ៣៨៥ គ្រាប់នោះ ទៅរក្សាទុក និងដាក់តាំងបង្ហាញនៅអង្គការសារមន្ទីរគ្រាប់មីន។
លោកបន្តថា គ្រាប់ទាំងនេះ នៅមិនទាន់បានរៀបចំឲ្យមានសណ្ដាប់ធ្នាប់ទេ ដោយកំពុងលាងសម្អាតដី និងក្លិនរំសេវ ក៏ដូចជាច្រែះជាមុនសិន ទើបបុគ្គលិកអង្គការសារមន្ទីរគ្រាប់មីនយកទៅដាក់នៅកន្លែងទាក់ទាញ និងមានសុវត្ថិភាពដើម្បីឲ្យភ្ញៀវទេសចរទស្សនា។ ម្យ៉ាងទៀតអង្គការសារមន្ទីរគ្រាប់មីននឹងលក់សំបុត្រថ្លៃចូលទស្សនា ដើម្បីយកថវិកាមកទ្រទ្រង់សកម្មភាពបោសសម្អាតមីនវិញ។
.jpg)
លោក បូរ៉ា បញ្ជាក់ថា៖ «គេអនុញ្ញាតឲ្យយើងដាក់តាំងក្នុងអង្គការសារមន្ទីរគ្រាប់មីនហ្នឹងហើយ។ គ្រាប់ទាំងនោះ គឺយើងមិនមែនរកបានម្ដងទាំងអស់ទេ គឺយើងសន្សំវារាប់ខែឆ្នាំ ហើយពេលបានច្រើនយើងក៏សុំការអនុញ្ញាតបន្សាបវា [ជាតិផ្ទុះ] ហើយយកទៅដាក់នៅអង្គការសារមន្ទីរគ្រាប់មីនហ្នឹង»។
លោកបន្ថែមថា ប៉ុន្មានខែដើមឆ្នាំនេះ អង្គការដោះមីនកម្ពុជា បានដោះគ្រាប់យុទ្ធភណ្ឌមិនទាន់ផ្ទុះជាច្រើនប្រភេទបានជាង ៤០០ គ្រាប់។ ប៉ុន្តែនៅសល់គ្រាប់បែកខ្លះកំពុងត្រូវបានរក្សាទុកនៅកន្លែងមានសុវត្ថិភាព និងរង់ចាំពេលបន្សាបរំសេវ ឬជាតិផ្ទុះដើម្បីស្នើសុំយកមកទុកក្នុងអង្គការលោកអាគីរ៉ាបន្ថែម។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការអាជ្ញាធរមីនបានថ្លែងកាលពីម្សិលមិញថា អង្គការឬសមាគមណាមួយដែលចង់យកគ្រាប់មីនឬយុទ្ធភណ្ឌមិនទាន់ផ្ទុះមកដាក់តាំងបង្ហាញ ឬរក្សាទុកក្នុងបំណងអ្វីមួយគឺត្រូវសុំអនុញ្ញាតពីស្ថាប័នជំនាញ និងត្រូវត្រួតពិនិត្យពីសុវត្ថិភាពជាមុនសិន។
លោកបានបន្តថា ការតម្រូវបែបនេះព្រោះកន្លងមកមានពលរដ្ឋខ្លះដែលគ្មានជំនាញបានយកគ្រាប់ទាំងនោះទៅច្នៃនិងប្រើប្រាស់ដោយគ្មានការត្រួតពិនិត្យបច្ចេកទេសត្រឹមត្រូវដែលបណ្ដាលឲ្យមានគ្រោះថ្នាក់ជាបន្តបន្ទាប់។
លោក លី ធុជ បញ្ជាក់ថា៖ «យើងត្រូវតែត្រួតពិនិត្យហ្មត់ចត់ណាស់រឿងនេះ គេមិនឲ្យធ្វើផ្ដេសផ្ដាសទេគឺយើងពិនិត្យមើលថា តើវាអស់គុណភាព ១០០ ភាគរយ ពិតប្រាកដទើបបានឲ្យយកមកប្រើប្រាស់ក្នុងបំណងណាមួយ ប៉ុន្ដែយើងមិនលើកទឹកចិត្តអ្នកគ្មានជំនាញយកវាមកប្រើប្រាស់ទេ»។
លោក អាគីរ៉ា ស្ថាបនិកអង្គការសារមន្ទីរគ្រាប់មីននៅខេត្តសៀមរាបមិនអាចទាក់ទងសុំការបញ្ជាក់ជុំវិញករណីនេះបានទេ កាលពីម្សិលមិញ។
ប៉ុន្ដែកញ្ញា សុភិន សុផារី បុគ្គលិកអង្គការសារមន្ទីរគ្រាប់មីន បានថ្លែងកាលពីម្សិលមិញថា អង្គការសារមន្ទីរគ្រាប់មីនបាននិងកំពុងរៀបចំកន្លែងសមរម្យ ដើម្បីដាក់តាំងបង្ហាញគ្រាប់យុទ្ធភណ្ឌទាំងនេះសម្រាប់ភ្ញៀវទេសចរចូលមកទស្សនា ព្រោះកន្លងមក មានការចាប់អារម្មណ៍ពីភ្ញៀវបរទេស និងសិស្សានុសិស្សដែលចង់ស្វែងយល់ពីប្រវត្តិសាស្ត្រ និងសង្គ្រាម។
កញ្ញាបន្តថា គ្រាប់មីនទាំងនេះត្រូវបានប្រមូលមកពីទីកន្លែងផ្សេងៗគ្នា ហើយមុនយកមកដាក់នៅទីនេះគឺបានស្នើសុំការអនុញ្ញាតនិងបន្សាបជាតិផ្ទុះ និងរំសេវ ព្រមទាំងមានការត្រួតពិនិត្យពីមន្ត្រីជំនាញ និងអាជ្ញាធរមូលដ្ឋានយ៉ាងហ្មត់ចត់ ដើម្បីចៀសវាងគ្រោះថ្នាក់។
កញ្ញាបញ្ជាក់ថា៖ «ខ្ញុំអត់ទាន់ដឹងពីពេលវេលាជាក់លាក់ ក្នុងការដាក់តាំងបង្ហាញហ្នឹងទេ ព្រោះយើងរៀបចំកន្លែងមិនទាន់រួចរាល់ផង ហើយគ្រាប់មីនទាំងអស់កំពុងលាងសម្អាតដែរ»។
តាមរបាយការណ៍របស់អាជ្ញាធរមីនបានបង្ហាញកាលពីម្សិលមិញថា គ្រាប់យុទ្ធភណ្ឌចំនួន ២៣ ប្រភេទដែលបានស្នើសុំចុះបញ្ជីនិងសុំរក្សាទុកនៅក្នុងអង្គការសារមន្ទីរគ្រាប់មីនរបស់លោក អាគីរ៉ា នៅខេត្តសៀមរាប។ ក្នុងនោះមាន គ្រាប់មីនចំនួន ១២៨ គ្រាប់ គ្រាប់ផ្សេងៗលាយឡំគ្នាចំនួន ២៤៩ គ្រាប់ និងកាំភ្លើងធំមានចំនួន ៨ កាណុង៕
