សកម្មភាពឃាត់រថយន្តធុនធំល្មើសបម្រាមថ្មីៗនេះ។ រូប Fresh News
ភ្នំពេញៈ មន្ត្រីបម្រើការងារនៅខណ្ឌដូនពេញ រាជធានីភ្នំពេញបានឲ្យដឹងកាលពីម្សិលមិញថារយៈពេល ៣ ថ្ងៃកន្លងមកនេះ កម្លាំងបញ្ជាការឯកភាពខណ្ឌបានបង្ក្រាបចាប់រថយន្តធុនធំដែលបើកបរលើផ្លូវហាមឃាត់ខុសម៉ោងកំណត់ចំនួន ៤០ គ្រឿង បន្ទាប់ពីអ្នកបើកបររថយន្តទាំងនេះមិនបានគោរពតាមបម្រាមនេះ។
លោក គឹម វុត្ថា ប្រធានប្រជាការពារខណ្ឌដូនពេញបានប្រាប់ភ្នំពេញប៉ុស្តិ៍ថា មហាវិថីព្រះមុនីវង្ស,មហាវិថីព្រះនរោត្តម និងមហាវិថីសហព័ន្ធរុស្ស៊ី ត្រូវបានហាមឃាត់ការធ្វើចរាចរណ៍នូវរថយន្តដឹកទំនិញធំៗគ្រប់ប្រភេទដែលផ្ទុកទម្ងន់ចាប់ពី ៥ តោនឡើងទៅ។ ដោយឡែក រុក្ខវិថី ព្រះស៊ីសុវត្ថិចាប់ពីចំណុចរង្វង់មូលសម្ដេចព្រះសង្ឃរាជ ជួន ណាត ដល់មុខផ្សាររាត្រីក៏ត្រូវបានហាមផងដែរចាប់ពីម៉ោង ៦ ព្រឹកដល់ម៉ោង ៤ រសៀល។
លោក វុត្ថា បានថ្លែងថានៅក្នុងខែកញ្ញាកន្លងទៅនេះកម្លាំងបញ្ជាការឯកភាពខណ្ឌដូនពេញបានចាប់រថយន្តដឹកទំនិញធំៗបើកបរលើផ្លូវជាប់បម្រាមជិត ២០០ គ្រឿងបញ្ជូនទៅការិយាល័យនគរបាលចរាចរណ៍នៃស្នងការដ្ឋាននគរបាលរាជធានីភ្នំពេញដើម្បីអប់រំ និងផាកពិន័យតាមនីតិវិធីច្បាប់។
.jpg)
លោកថា៖ «ក្នុងចំណោមរថយន្តដែលបង្ក្រាបចាប់នាប៉ុន្មានថ្ងៃនេះមានមួយចំនួនធ្លាប់ត្រូវបានសមត្ថកិច្ចចាប់ផាកពិន័យនៅនឹងកន្លែងម្ដងជា ២ ដងរួចមកហើយកាលពី ៣-៤ ខែមុន។
រថយន្តទាំងនោះភាគច្រើន ដឹកដី ក្រួស ថ្ម ខ្សាច់ និងឥដ្ឋ»។
លោក វុត្ថា បានបន្តថាបច្ចុប្បន្នករណីរថយន្តធុនធំបើកបំពានលើដងវិថីខាងលើនេះមានការថយចុះច្រើន បើធៀបទៅនឹងឆ្នាំមុនៗដែលក្នុង ១ ថ្ងៃមានរថយន្តធុនធ្ងន់មិនក្រោមពី ៥០-៦០ គ្រឿង ត្រូវបានចាប់មកអប់រំ និងផាកពិន័យដែលក្នុងនោះមានរថយន្តខ្លះមានចំណុះដល់ ៣០ តោន។
ទោះជាយ៉ាងណាលោកថ្លែងថា ដើម្បីពង្រឹងសណ្ដាប់ធ្នាប់សាធារណៈ និងសម្រួលដល់ការធ្វើដំណើរតាមផ្លូវ បញ្ជាការឯកភាពខណ្ឌដូនពេញបានពង្រាយកម្លាំង ៣៦ នាក់ នៅតាមគោលដៅចំនួន ១០ កន្លែង លើដងវិថីទាំង ៤ ខាងលើនេះ និងមានកម្លាំង ៣០ នាក់ទៀត សម្រាប់ចុះជួយសម្រួលចរាចរណ៍តាមទីតាំងសំខាន់ៗមួយចំនួនដែលកកស្ទះផងដែរ។
ជុំវិញករណីចាប់រថយន្តល្មើសនេះលោក ចេវ ហាក់ ស្នងការរងរាជធានីភ្នំពេញទទួលបន្ទុកផែនសណ្ដាប់ធ្នាប់ចរាចរណ៍បានប្រាប់ភ្នំពេញប៉ុស្តិ៍ថា កម្លាំងនគរបាលចរាចរណ៍រាជធានីភ្នំពេញបានចុះអនុវត្តជាប្រចាំនូវច្បាប់ចរាចរណ៍ និងបទបញ្ជារបស់រដ្ឋបាលសាលារាជធានីភ្នំពេញដែលហាមរថយន្តដឹកទំនិញធំៗដែលធ្វើចរាចរណ៍ចូលក្នុងរាជធានីភ្នំពេញនៅពេលថ្ងៃនិងនៅលើផ្លូវហាមឃាត់។
លោកថា៖ «មន្ត្រីនគរបាលចរាចរណ៍យើងបង្ក្រាបចាប់មកធ្វើការអប់រំ និងផាកពិន័យជារៀងរាល់ថ្ងៃហ្នឹង»។
ទោះជាយ៉ាងណានៅពេលសួរពីតួលេខរថយន្តធំៗល្មើសច្បាប់ដែលត្រូវបាននគរបាលចរាចរណ៍រាជធានីភ្នំពេញបង្ក្រាបចាប់បានថ្មីៗក៏ដូចជារបាយការណ៍ ៩ ខែឆ្នាំនេះលោក ចេវ ហាក់ បានបង្វែរឲ្យសួរលោក សែម គន្ធា ប្រធានការិយាល័យនគរបាលចរាចរណ៍រាជធានីភ្នំពេញវិញ។ ប៉ុន្តែនៅពេលភ្នំពេញប៉ុស្តិ៍ព្យាយាមសួរតាមទូរស័ព្ទផង និងតាមប្រព័ន្ធ Whatsapp ផង លោក សែមគន្ធា លោកឆ្លើយថា «កំពុងជាប់រវល់ប្រជុំ» ៕
