ព្រះសីហនុៈ អភិបាលខេត្តព្រះសីហនុលោក យន្ត មីន បានសម្រេចសុំលាលែងពីតំណែង ក្រោយពីមានឧបទ្ទវហេតុរលំបាក់អគារ ៧ ជាន់ បណ្តាលឲ្យមនុស្សស្លាប់និងរបួសប្រមាណ ៥០ នាក់ ខណៈលោកនាយករដ្ឋមន្ត្រី ហ៊ុន សែន បានយល់ព្រមតាមសំណើនេះ ស្របពេលដែលលោក ញឹម វណ្ណដា ទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយក៏ត្រូវបានដកចេញពីតំណែង ដោយឲ្យកាន់តួនាទីថ្មី។
លោក ហ៊ុន សែន បានសរសេរបង្ហោះនៅលើហ្វេសប៊ុកកាលពីម្សិលមិញ ខណៈលោកបានចុះទៅដល់កន្លែងកើតហេតុដោយផ្ទាល់ថា ក្នុងពេលដែលលោកបំពេញការងារនៅខេត្តព្រះសីហនុ លោក យន្ត មីន អភិបាលខេត្តព្រះសីហនុ បានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួនដែលបណ្តាលឲ្យមានរឿងឈឺចាប់កើតឡើង។
លោកនាយករដ្ឋមន្ត្រីបានសរសេរបន្តថា៖ «គាត់ (យន្ត មីន) បានស្នើមកខ្ញុំដើម្បីលាលែងចេញពីអភិបាលខេត្តព្រះសីហនុ។ ខ្ញុំបានយល់ព្រមឲ្យគាត់លាលែង និងបានពិភាក្សាជាមួយ សម្តេច ស ខេង យកឯកឧត្តម គួច ចំរើន ពីអភិបាលខេត្តកំពង់ចាម មកធ្វើជាអភិបាលខេត្តព្រះសីហនុវិញ»។
បើទោះជាមានការស្នើសុំលាលែងពីតំណែងបែបនេះក្តី ក៏លោក ហ៊ុន សែន បានបញ្ជាក់ថា លោក យន្ត មីន នឹងបន្តដឹកនាំយុទ្ធនាការរុករក និងសង្គ្រោះក្នុងឧបទ្ទវហេតុតទៅទៀត រហូតចប់កិច្ចការ និងអភិបាលខេត្តថ្មី ចូលកាន់តំណែង។
ទន្ទឹមនឹងនេះ លោកនាយករដ្ឋមន្ត្រីក៏បានធ្វើសេចក្តីសម្រេចមួយទៀត ដោយបានដកមន្ត្រីជាន់ខ្ពស់ម្នាក់ ចេញពីតំណែងផងដែរ៖ «ខ្ញុំក៏សូមបញ្ជាក់ថា ថ្ងៃនេះខ្ញុំបានសម្រេចចិត្តដកឯកឧត្តម ញឹម វណ្ណដា ចេញពីតំណែងជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ដោយមូលហេតុខ្វះការទទួលខុសត្រូវ និងភូតភរ»។
ពាក់ព័ន្ធនឹងការប្រកាសលាលែងពីតំណែង និងការទទួលកំហុសចំពោះការបណ្តោយឲ្យមានឧបទ្ទវហេតុរលំបាក់អគារ ៧ ជាន់នេះ លោក យន្ត មីន បានសរសេរក្នុងទំព័រហ្វេសប៊ុករបស់លោក និងបានប្រាប់ភ្នំពេញប៉ុស្តិ៍ ដោយបង្ហាញនូវការសោកស្តាយយ៉ាងខ្លាំង និងបានសុំការអភ័យទោសពីក្រុមគ្រួសារនៃជនរងគ្រោះទាំងអស់ក្នុងឧបទ្ទវហេតុនេះ។ លោកក៏បានប្រកាសពីការទទួលខុសត្រូវស្របពេលលោកស្នើសុំលោកនាយករដ្ឋមន្ត្រីដើម្បីលាលែងពីតំណែងផងដែរ។
លោកបានបញ្ជាក់ថា៖ «សម្តេចក៏បានផ្តល់ការយល់ព្រមហើយដែរ។ ជាមួយនេះ ខ្ញុំបាទសុំការអភ័យទោសពីសម្តេចតេជោនាយករដ្ឋមន្ត្រី សម្តេចក្រឡាហោម សម្តេច ឯកឧត្តម លោកជំទាវ ចំពោះកង្វះខាតនៃការបំពេញភារកិច្ចរបស់ខ្ញុំបាទកន្លងមកនេះ។ ខ្ញុំសុំការអភ័យទោសនិងការអធ្យាស្រ័យពីបងប្អូនប្រជាពលរដ្ឋ មន្ត្រីរាជការ កងកម្លាំងប្រដាប់អាវុធគ្រប់ប្រភេទ ក្នុងខេត្តព្រះសីហនុទាំងអស់ចំពោះកង្វះខាតរបស់ខ្ញុំកន្លងមកដ្បិតអីខ្ញុំបានខំប្រឹងអស់ពីលទ្ធភាពហើយ»។
ចំណែក លោក ញឹម វណ្ណដា ទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ មិនអាចទាក់ទងបានទេ ដោយសារទូរស័ព្ទលោកទាំង ២ ខ្សែមិនអាចទាក់ទងបាន កាលពីម្សិលមិញ។
យ៉ាងណាក្ដី ក្រោយពីប្រកាសដកតំណែងភ្លាមៗព្រះមហាក្សត្រព្រះបាទសម្ដេចព្រះបរមនាថ នរោត្ដម សីហមុនី ទ្រង់បានចេញព្រះរាជក្រឹត្យ ២ ដាច់ដោយឡែកពីគ្នាដោយលិខិតមួយបញ្ចប់តំណែងលោក ញឹម វណ្ណដា និងលិខិតមួយទៀត សម្រេចតែងតាំងលោកក្នុងមុខតំណែងថ្មីគឺជាទីប្រឹក្សារាជរដ្ឋាភិបាលដែលមានឋានៈស្មើទេសរដ្ឋមន្ដ្រីដដែល ចំណែកតំណែងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយត្រូវបានជំនួសដោយ លោក គន់ គីម។
គិតមកទល់ត្រឹមល្ងាចថ្ងៃចន្ទម្សិលមិញ មានមនុស្សស្លាប់ប្រមាណ ២៨ នាក់ និងអ្នករបួសធ្ងន់ស្រាល ២៦ នាក់ ខណៈជនរងគ្រោះដែលរួចពីការរលំបាក់អគារកាលពីថ្ងៃអាទិត្យបានអះអាងថា មានមនុស្សជាច្រើនទៀតកំពុងកប់ក្នុងអគារ ក្នុងនោះក៏មានជនជាតិចិនផងដែរ ជាពិសេស គឺនៅជាន់ទី១ និងជាន់ទី២។
ជនរងគ្រោះម្នាក់ ដែលបានរួចចេញពីគំនរបាក់បែកដោយមានរបួសកែងជើងនិងនៅមានអារម្មណ៍ឈឺចុកចាប់ពេញខ្លួន គឺលោក ទុំ ខន បានរៀបរាប់ពីព្រឹត្តការណ៍ក្នុងពេលកើតហេតុប្រាប់ភ្នំពេញប៉ុស្តិ៍ពីម្សិលមិញថា ក្នុងបន្ទប់សំណង់អគារដែលលោកសម្រាកគឺនៅជាន់ទី៤ មានសមាជិក ៥ នាក់។ បុរសវ័យ ៤៤ ឆ្នាំរូបនេះ បានបន្តថា ខណៈដែលកំពុងសម្រាន្តលង់លក់ក្រោយធ្វើការអស់កម្លាំងដល់ម៉ោង ១២ កណ្តាលអាធ្រាត្រនោះ លោកបានភ្ញាក់ដឹងខ្លួនស្របពេលមិនប៉ុន្មានវិនាទីនៅពេលអគាររលំដួល។
លោកបានបញ្ជាក់ថា៖ «ដូចអត់ឲ្យដឹង មានមូលហេតុអ្វីផង ស្រាប់តែស្រឹបមកតែម្តង បើពេលខ្ញុំដឹងខ្លួន ដូចជា មិនបាន ១ នាទីផង ហើយក៏ងងឹតស្លុប មើលអ្វីមិនឃើញ។ ប៉ុន្តែពេលមានចន្លោះតាមបង្អូចដែលគេមិនទាន់ដាក់កញ្ចក់ ចេះតែលូនចេញមក ក៏ឃើញខ្លួននៅលើគំនរបាក់បែកបាត់ទៅហើយ និងខំស្រែក ជួយរកអ្នកដទៃទៀត»។
លោក ទុំ ខន ដែលទើបចូលធ្វើការមិនបានប៉ុន្មានថ្ងៃផងនោះ បានបញ្ជាក់បន្ថែមថា ជាទូទៅ ចំនួនកម្មករដែលធ្វើការក្នុងអគារ ទាំងជនជាតិចិន និងខ្មែរ គឺមាន ជាង ១០០ នាក់ ប៉ុន្តែអ្នកដែលសម្រាកក្នុងអគារនៅពេលយប់គឺមានប្រមាណ ៥០ ទៅ ៦០ នាក់ប៉ុណ្ណោះ ដោយក្នុងមួយជាន់ៗ អាចមានកម្មករចន្លោះពី ១០ ទៅ ១៥ នាក់។
លោកបានបន្ថែមថា៖ «អ្នកសម្រាកទាំងអស់គឺមានខ្មែរភាគច្រើន ហើយជនជាតិចិនភាគតិច ដែលសម្រាកក្នុងអគារហ្នឹងដែរ ហើយជនជាតិចិន នៅជាន់ក្រោមៗ ព្រោះពួកគេនៅសម្រាកក្នុងប្រអប់ជណ្ដើរយន្តដែលគេអាចនៅរស់ហើយឮថា មានតេឆ្លើយឆ្លងគ្នានៅពេលភ្លាមៗ តែឥឡូវប្រហែលមិនទាន់កាយដល់ទេដឹង»។
ស្រដៀងគ្នានេះដែរ ជនរងគ្រោះម្នាក់ទៀត លោក លូ ប៊ុនធឿន វ័យ ៣៣ ឆ្នាំ មកពីខេត្តពោធិ៍សាត់ដូចលោក ទុំ ខន ដែរនោះ បានប្រាប់ភ្នំពេញប៉ុស្តិ៍ថា កាលពីលោកទើបធ្វើការក្នុងអគារនេះបានជាង ១ សប្តាហ៍ ក៏មានអារម្មណ៍ថា ចម្លែកដែរព្រោះតែសង្កេតមើលពីបច្ចេកទេសសាងសង់របស់ពួកគេវាខុសគ្នាទៅនឹងកន្លែងដែលលោកធ្លាប់ធ្វើការពីមុនៗមក។
ជនរងគ្រោះរូបនេះបញ្ជាក់ថា៖ «ដូចជាវាខុសស្តង់ដា ព្រោះតែយើងធ្លាប់ធ្វើនៅខាងក្រៅ ខុសពីសំណង់អគារនេះ។ គេយកដែកជ្រុងមកចាប់ប៊ូឡុងតៗគ្នា ហើយគេយកឥដ្ឋមកដាក់ចំកណ្តាល។ ចម្លែកណាស់ គេបែរជាធ្វើពីលើដេញចុះមកក្រោមវិញហើយខុសគ្នា ១ ទៀតគេមិនចាក់ពុម្ពទេ គឺប្រើគ្រឿងដែកសុទ្ធ ដែលមិនដឹងយកដែកហ្នឹងមកពីខាងណា ខ្ញុំមិនសូវដឹងដែរ»។
កន្លងទៅអាជ្ញាធរខេត្តព្រះសីហនុ ធ្លាប់បានបញ្ជាក់ប្រាប់សារព័ត៌មានក្នុងស្រុកជាបន្តបន្ទាប់ថា សំណង់អគារខាងលើដែលមានម្ចាស់ឈ្មោះ ជីង គ័ង ជាជនជាតិចិន បានសាងសង់លើផ្ទៃដីទំហំ ៥៨៣ ម៉ែត្រការ៉េ មិនមានច្បាប់អនុញ្ញាតនោះទេ ហើយអាជ្ញាធរធ្លាប់បានហាមឃាត់មិនឱ្យសាងសង់ចំនួន ២ ដងរួចទៅហើយ ប៉ុន្តែម្ចាស់សំណង់មិនចូលរួមសហការ។
ការឆ្លើយបែបនេះក៏បង្កជាប្រតិកម្មនិងការរិះគន់ពីសំណាក់សង្គមស៊ីវិល ប្រជាពលរដ្ឋរួមទាំងមន្ត្រីរដ្ឋាភិបាលមួយចំនួនផង ទើបឈានដល់ថ្ងៃទី ២៣ មិថុនា រាជរដ្ឋាភិបាលសម្រេចបង្កើតគណៈកម្មការត្រួតពិនិត្យគុណភាពសំណង់នៅខេត្តព្រះសីហនុ ដោយមានសមាជិកចំនួន ១៥ រូប ដើម្បីត្រួតពិនិត្យបទដ្ឋានបច្ចេកទេសស្តង់ដារ សុវត្ថិភាព គុណភាព សំណង់នៅតាមការដ្ឋានក្នុងខេត្តព្រះសីហនុ។ ក្រៅពីតួនាទីនេះ ក្រុមការងារនេះ ក៏មានភារកិច្ចត្រួតពិនិត្យលក្ខណសម្បត្តិរបស់ក្រុមហ៊ុនទទួលម៉ៅការសាងសង់នៅតាមការដ្ឋានសំណង់រួមទាំងធ្វើបច្ចុប្បន្នភាពសំណង់អគារដែលបានសាងសង់រួចនិងកំពុងធ្វើអាជីវកម្មផងដែរ។
ទោះយ៉ាងណានៅពេលសួរថា តើមូលហេតុអ្វី បានជាសំណង់អគារកម្ពស់ ៧ ជាន់នេះរលំបាក់រាបដល់ដីបែបនេះ លោក ឡៅ ទិព្វសីហា រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មការដែលទើបបង្កើតថ្មីនេះ មិនបានឆ្លើយតបនោះទេ កាលពីម្សិលមិញ ដោយលោកបានចុចបិទទូរស័ព្ទ៕