សមត្ថកិច្ចក្នុងពេលចុះពិនិត្យសាកសពក្មេងស្រី២នាក់ នៅថ្ងៃទី១៨តុលានេះ។ រូបថត ប៉ូលិស ហុង មិនា
កំពង់ឆ្នាំងៈ នគរបាលខេត្តកំពង់ឆ្នាំង នៅថ្ងៃទី ១៨ ខែតុលានេះ បានធ្វើកោសល្យវិច័យសាកសពក្មេងស្រី ២ នាក់ បន្ទាប់ពីត្រូវសាច់ញាតិប្រទះឃើញក្នុងកេសឈើលើផ្ទះនៅភូមិថ្មីឃុំផ្សារដែក ស្រុកបរិបូរណ៍ ។
លោក ឌុច ចំរើន ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ឆ្នាំងប្រាប់ថាករណីក្មេងស្រី២នាក់ដែលត្រូវបានជនល្មើសសម្លាប់នោះលោកមិនទាន់ដឹងប្រាកដថាបណ្តាលមកពីអ្វីទេ។
លោកបញ្ជាក់យ៉ាងខ្លីថា ៖ «ករណីនេះខ្ញុំមិនដឹងថាមកពីអ្វីទេ ហើយខ្ញុំកំពុងតែធ្វើកិច្ចការនេះ»។
.jpg)
ប៉ុន្តែបើតាមប្រភពពីគេហទំព័ររបស់អគ្គស្នងការនគរបាលជាតិបានសរសេរថាក្មេងស្រីទាំង២នាក់មានឈ្មោះ អ៊ុល លក្ខិណា អាយុ១៤ឆ្នាំនិងម្នាក់ទៀតឈ្មោះ អ៊ុល ធីតា អាយុ៧ឆ្នាំ ពួកគេរស់នៅក្នុងភូមិ-ឃុំកើតហេតុខាងលើ។
តាមសមត្ថកិច្ចនគរបាលស្រុកបូរិបូរណ៍ម្នាក់សុំមិនឲ្យបញ្ចេញឈ្មោះបានឲ្យដឹងដែរថា ហេតុការណ៍នេះបានបង្កការភ្ញាក់ផ្អើលកាលពីថ្ងៃត្រង់ថ្ងៃទី១៨តុលា ខណៈ ឈ្មោះ ភី វុទ្ធី ត្រូវជាពូរបស់ក្មេងស្រីរងគ្រោះ បាត់ក្មួយហើយពេលគាត់ឡើងលើផ្ទះក៏ប្រទះឃើញក្មេងរងគ្រោះត្រូវគេសម្លាប់ដាក់ក្នុងកេសឈើ។
បើតាមមន្ត្រីនគរបាលរូបនោះថាឪពុកម្តាយក្មេងស្រីរងគ្រោះទាំង២នាក់ជាកម្មករទើបធ្វើចំណាកស្រុកទៅធ្វើការនៅប្រទេសថៃបានប្រហែលមួយសប្តាហ៍មុនថ្ងៃកើតហេតុប៉ុណ្ណោះ។
ចំណែកសាកសពក្មេងរងគ្រោះត្រូវបានសមត្ថកិច្ចសន្និដ្ឋានថាអាចត្រូវជនល្មើសសម្លាប់មុនថ្ងៃកើតហេតុ១ថ្ងៃដោយសាកសពពួកគេត្រូវជនសង្ស័យវាយលើផ្ទៃមុខដែលសង្ស័យថាជាករណីរំលោភសម្លាប់៕
