កណ្តាលៈ គិតមកដល់ថ្ងៃម្សិលមិញ សមត្ថកិច្ចកំពុងស្វែងរកចាប់ខ្លួនជនសង្ស័យម្នាក់ដែលបានជះទឹកអាស៊ីតទៅលើស្ត្រីជាប្រពន្ធ ប៉ុន្តែបានខ្ទាតទៅត្រូវលើកូនប្រុសខ្លួនឯង អាយុទើបជាង ១ ខួប បណ្តាលឲ្យរងរបួសស្រាល នៅភូមិដុល ឃុំសន្លុង ស្រុកខ្សាច់កណ្តាល ខេត្តកណ្តាល កាលពីថ្ងៃទី ១៤ ខែមករា។
លោក មែន សុខឃឿន អធិការស្រុកខ្សាច់កណ្តាល បានឲ្យដឹងកាលពីម្សិលមិញថា ជនសង្ស័យឈ្មោះ អ៊ុក កុម្ភៈ អាយុ ២២ ឆ្នាំត្រូវជាប្តីរបស់ស្ត្រីឈ្មោះ រ៉ា ស្រីនិច្ច អាយុ ១៩ ឆ្នាំ ហើយក្មេងរងគ្រោះជាកូនមានអាយុ ១ ឆ្នាំ ៦ ខែ។
លោកប្រាប់ថា៖ «ពេលនេះ ស្ថានភាពជំងឺរបស់ក្មេងរងគ្រោះ បានធូរស្រាលហើយ បន្ទាប់ពីព្យាបាលរបួសរួចមក។ ទឹកអាស៊ីតនោះខ្សោយដែរទេដែលគ្រាន់តែធ្វើឲ្យរបកក្រហមៗនៅលើស្បែកមុខ។ ចំណែកជនសង្ស័យត្រូវកម្លាំងយើងកំពុងស្រាវជ្រាវដើម្បីចាប់ខ្លួន»។
លោករំឭកប្រាប់តាមសម្តីសាច់ញាតិរបស់ក្មេងរងគ្រោះថា ជនសង្ស័យឈ្មោះ អ៊ុក កុម្ភៈ បានយកស្ត្រីឈ្មោះ រ៉ា ស្រីនិច្ច ជាប្រពន្ធ មិនបានរៀបការទេនិងបានកូនប្រុសម្នាក់ (ក្មេងរងគ្រោះ)។ លោកថ្លែងថា រយៈពេលរស់នៅជាមួយគ្នានោះ ពួកគេតែងតែឈ្លោះប្រកែកគ្នា ហើយជនសង្ស័យតែងតែបង្កអំពើហិង្សាជារឿយៗលើប្រពន្ធ។
នៅមុនថ្ងៃកើតហេតុពួកគេមានជម្លោះជាមួយគ្នា ដោយសារតែបុរសជាប្តី ខឹងស្ត្រីជាប្រពន្ធដែលចង់លែងលះជាមួយខ្លួន។ នៅថ្ងៃកើតហេតុ ស្ត្រីជាម្តាយដែលរស់នៅភ្នំពេញបាននាំកូន ទៅលេងស្រុករបស់ខ្លួននៅឃុំសន្លុង។
នៅពេលនោះជនសង្ស័យបានទូរស័ព្ទណាត់ជួបស្ត្រីជាប្រពន្ធ ប៉ុន្តែនាងមិនព្រមជួប។ លុះនៅម៉ោង៧យប់ ថ្ងៃទី ១៤ ខែមករា នាងបានបីកូនទៅទិញម្ហូបជាមួយស្ត្រីឈ្មោះ ម៉ៃ ស្រីឡា ស្របពេលនោះ ជនសង្ស័យបានជិះម៉ូតូសេ ១២៥ មកក្បែរហើយក៏ជះទឹកអាស៊ីតលើស្ត្រីជាម្តាយក្មេងប៉ុន្តែបែរជាខ្ទាតទៅត្រូវ ក្មេងរងគ្រោះទៅវិញ៕