ភ្នំពេញៈ សាលាដំបូងរាជធានីភ្នំពេញកាលពីថ្ងៃសុក្រកន្លងមកនេះបានបើកសវនាការជំនុំជម្រះលើសំណុំរឿងមេដឹកនាំសហជីពចំនួន ៥ នាក់ និងប្រធានសមាគមគ្រូបង្រៀនឯករាជ្យដែលបានជាប់ពាក់ព័ន្ធនឹងការធ្វើបាតុកម្មនៅផ្លូវវេងស្រេងពីអំឡុងចុងឆ្នាំ ២០១៣ និងដើម ២០១៤ ខណៈបណ្តឹងមេសហជីពទាំង ៦ នាក់នោះក៏ត្រូវបានខាងសមាគមរោងចក្រកាត់ដេរនៅកម្ពុជាបានដកពាក្យបណ្តឹងវិញហើយដែរ។
នៅក្នុងបន្ទប់សវនាការកាលពីថ្ងៃសុក្រកន្លងមកនេះដែរមិនមានវត្តមានមេដឹកនាំ សហជីពទាំង ៦ នាក់នោះទេ ប៉ុន្តែមានវត្តមានលោក ទឹម វុទ្ធី និងលោក សោម ឌីណា ជាមន្ត្រីនគរបាលក្នុងចំណោមមន្ត្រីនគរបាលជាង ១០ នាក់ដែលជាជនរងគ្រោះ។
នៅក្នុងសវនាការលោក សោម ឌីណា ជាមន្ត្រីនគរបាលខណ្ឌសែនសុខបានរៀបរាប់ប្រាប់ចៅក្រមថា លោកត្រូវបានមេរបស់លោកបញ្ជាឲ្យទៅជួយសម្រួលចរាចរណ៍នៅកន្លែងធ្វើបាតុកម្មនោះហើយពេលទៅដល់លោកបានឃើញក្រុមបាតុករជាច្រើនរយនាក់កំពុងស្រែកទាមទារពីការដំឡើងប្រាក់ខែ ប៉ុន្តែនៅពេលដែលលោកកំពុងសម្រួលចរាចរណ៍ ស្រាប់តែមានមនុស្ស ១ ក្រុមប្រហែលគ្នា ២០ នាក់បានគប់ដំបង និងខ្លះគប់ដុំថ្មមកលើកម្លាំងប្រដាប់អាវុធ ហើយលោកត្រូវគេគប់នឹងដុំថ្មត្រូវកដៃខាងស្តាំដាច់សរសៃ ហើយគេដឹកលោកទៅព្យាបាលនៅមន្ទីរពេទ្យ។
លោក ឌីណា ថ្លែងទៅកាន់ចៅក្រមថា៖ «ពេលនោះខ្ញុំមិនដឹងថាក្រុមសហជីពណាគប់ត្រូវខ្ញុំទេ ហើយក៏ខ្ញុំមិនស្គាល់មុខដែរ ព្រោះពេលនោះយប់ងងឹត ប៉ុន្តែកាលពីពេលថ្ងៃ ខ្ញុំជិះម៉ូតូកាត់ហ្វូងបាតុករ ខ្ញុំឮគេថាក្រុម វ៉ន ពៅ ខ្ញុំគ្រាន់តែដឹងថា ក្រុមបង្កជាក្រុមសហជីព ហើយចំពោះសំណងគឺខ្ញុំមិនទាមទារទៀតទេ»។
ដោយឡែកលោក ទឹម វុទ្ធី ជាអនុប្រធាននគរបាលប៉ុស្តិ៍វាលវង់ ខណ្ឌ ៧ មករាបានរៀបរាប់ប្រាប់ចៅក្រមដែរថា នៅយប់ថ្ងៃទី ១ ខែមករាឆ្នាំ ២០១៤។ លោក ម៉ក់ ជីតូ បានបញ្ជាលោកផ្ទាល់ឲ្យចុះទៅសម្រួលចរាចរណ៍នៅផ្លូវវេងស្រេងដែលកំពុងកើតមានបាតុកម្ម។ ពេលទៅដល់ទីនោះលោកបានជួយសម្រួលចរាចរណ៍ ព្រោះមានរថយន្តធំ ២ ទៅ ៣ គ្រឿងបានដាក់រាំងផ្លូវ ហើយក៏មានក្រុមអនាធិបតេយ្យស្រែកឡូឡាទាមទារដំឡើងប្រាក់ខែ។
លោកបន្តថាពេលដែលលោកកំពុងបំពេញការងារ ស្រាប់តែមានក្រុមអនាធិបតេយ្យ ១ ក្រុមបានគប់ដុំថ្មត្រូវចំភ្នែកខាងឆ្វេង ហើយត្រូវក្រុមការងារដឹកទៅសង្គ្រោះនៅមន្ទីរពេទ្យព្រះកុសុមៈ។ ប៉ុន្តែដោយស្ថានភាពរបួសធ្ងន់ពេក លោកក៏ត្រូវក្រុមគ្រួសារបញ្ជូនទៅប្រទេសវៀតណាម។ ប៉ុន្តែគ្រូពេទ្យប្រាប់ថា ភ្នែកដែលគេគប់ត្រូវនោះមិនអាចមើលឃើញទៀតទេ។
លោកបានបញ្ជាក់ថា៖ «នៅយប់មានបាតុកម្មនោះខ្ញុំមិនស្គាល់ថា ក្រុមណាជាក្រុមណាទេ ប៉ុន្តែខ្ញុំដឹងថា ជាក្រុមសហជីព។ ខ្ញុំសុំទាមទារសំណង ៤០ លានរៀល»។ រីឯជនរងគ្រោះម្នាក់ទៀតដែលមិនមានវត្តមាននៅក្នុងតុលាការ បានទាមទារសំណង ២០ លានរៀល។
លោកព្រះរាជអាជ្ញារង លី សុផាណា តំណាងអយ្យការបានសន្និដ្ឋានថា បន្ទាប់ពីបានស្តាប់ការឆ្លើយបំភ្លឺពីជនរងគ្រោះ និងពិនិត្យលើអង្គហេតុ និងតាមរយៈការបញ្ចាំងស្លាយឃ្លីបវីដេអូពីសកម្មភាពបាតុកម្មនោះលោកសន្និដ្ឋានថា ពិតជាមានអំពើនេះកើតមានមែន។
លោកថ្លែងថា៖ «អំពើនេះបានបង្ហាញឲ្យឃើញច្បាស់ថា បានកើតឡើងយ៉ាងពិតប្រាកដ ហើយបង្កឲ្យមានការខូចខាតទ្រព្យសម្បត្តិ រោងចក្រកាត់ដេរ និងបង្កឲ្យមានមនុស្សរងគ្រោះ។ ខ្ញុំសូមឲ្យក្រុមប្រឹក្សាជំនុំជម្រះពិចារណាតាមច្បាប់»។
លោក ចៅក្រម អ៊ឹម វណ្ណៈ បានថ្លែងថានៅក្នុងសំណុំរឿងនេះមានជនជាប់ចោទឈ្មោះ អាត់ ធន់, ឈ្មោះ ម៉ម ញឹម, ឈ្មោះ ប៉ាវ ស៊ីណា, ឈ្មោះ ជា មុន្នី, ឈ្មោះ រ៉ុង ឈុន និងឈ្មោះ យ៉ាង សោភ័ណ្ឌ។ ប៉ុន្តែក្នុងរឿងនេះដែរលោក ខេន លូ ជាអគ្គលេខាធិការសមាគមរោងចក្រកាត់ដេរបានដកពាក្យបណ្តឹងវិញហើយកាលពីថ្ងៃទី ២ ខែធ្នូ ឆ្នាំ ២០១៨ ។
នៅក្នុងលិខិតដកពាក្យបណ្តឹងនោះលោក ខេន លូ លើកឡើងថា៖ «ដោយមានការជំរុញពីនាយករដ្ឋមន្ត្រីសម្តេច ហ៊ុន សែន ឲ្យខាងសហជីពពន្លឿនក្តីក្តាំរបស់ខ្លួនជាមួយក្រសួងការងារ និងក្រសួងយុត្តិធម៌ ហើយដែលជាការជំរុញរបស់សម្ដេចនាយករដ្ឋមន្ត្រីដូច្នេះខាងសមាគមរោងចក្រកាត់ដេរបានដកពាក្យបណ្តឹងវិញ ដោយគ្មានទាមទារសំណងអ្វីឡើយពីជនជាប់ចោទទាំង ៦ នាក់»។
លោក គីម សុជាតិ ជាមេធាវីការពារសិទ្ធិឲ្យលោក អាត់ ធន់ បានសន្និដ្ឋានថា កូនក្តីរបស់លោកមានការចុះបញ្ជីទទួលស្គាល់ពីសហជីពរបស់គាត់ត្រឹមត្រូវពីក្រសួងមហាផ្ទៃ ហើយសកម្មភាពរបស់គាត់ធ្វើស្របទៅតាមច្បាប់។ លោកថ្លែងថា៖ «នៅថ្ងៃកើតហេតុនោះកូនក្តីខ្ញុំមិនស្ថិតនៅទីនោះទេ...រឿងនេះគ្មានសាក្សីបញ្ជាក់ច្បាស់លាស់ និងគ្មានភ័ស្តុតាងទេ ដូច្នេះខ្ញុំសុំឲ្យតុលាការឲ្យកូនក្តីខ្ញុំរួចពីបទចោទ»។
លោកស្រី សាម សុគន្ធា, លោកស្រី ប៊ុត សិរីចរិយា, លោក លី សុចិត្ត្រា មេធាវីការពារសិទ្ធិឲ្យលោក រ៉ុង ឈុន, លោក ប៉ាវ ស៊ីណា និង លោកស្រី យ៉ាង សោភ័ណ្ឌ បានសន្និដ្ឋានដូចគ្នាថា បើពិនិត្យលើអង្គហេតុ និងតាមចម្លើយជនរងគ្រោះបញ្ជាក់ថាពិតជាមានអំពើនោះកើតឡើងមែន ប៉ុន្តែនៅពេលកើតហេតុនោះលោក រ៉ុង ឈុន, លោក ប៉ាវ ស៊ីណា និង លោក ស្រីយ៉ាង សោភ័ណ្ឌ មិនស្ថិតនៅកន្លែងកើតហេតុទេ។ ពួកគាត់មានភារកិច្ចចូលរួមប្រជុំជាមួយក្រសួងការងារស្ដីពីប្រាក់ឈ្នួលកម្មករ។ ដូច្នេះសូមលោកចៅក្រមទម្លាក់បទចោទ ហើយឲ្យពួកគាត់រួចខ្លួន។ ម្យ៉ាងភាគីសហគមរោងចក្រក៏ដកពាក្យបណ្តឹងហើយដែរ។ ប៉ុន្តែលោក ជា មុនី និងលោកស្រី ម៉ម ញឹម មិនមានមេធាវីការពារសិទ្ធិឲ្យឡើយនៅថ្ងៃទី ៧ ធ្នូនោះ ដោយសារលោកមេធាវីកៅទីអវត្តមានក្នុងសវនាការ។
នៅក្នុងលិខិតអញ្ជើញដែលចុះហត្ថលេខាដោយព្រះរាជអាជ្ញារង លី សុផាណា បានឲ្យដឹងថា អ្នកទាំង ៦ នាក់នោះត្រូវចោទពីបទហិង្សាដោយចេតនាមានស្ថានទម្ងន់ទោស, បទធ្វើឲ្យខូចខាតដោយចេតនាមានស្ថានទម្ងន់ទោស, បទគំរាមកំហែងថានឹងធ្វើឲ្យខូចខាតដែលភ្ជាប់នូវបញ្ជាអ្វីមួយ និងបទប្រើមធ្យោបាយដើម្បីជាឧបសគ្គដល់ចរាចរណ៍សាធារណៈ ប្រព្រឹត្តនៅមុខសួនឧស្សាហកម្មកាណាឌីយ៉ាផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញកាលពីអំឡុងថ្ងៃទី ២៥ ធ្នូ ឆ្នាំ ២០១៣ ដល់ថ្ងៃទី ១៣ ខែមករា ឆ្នាំ ២០១៤។
ក្រោយជំនុំជម្រះលោកចៅក្រម អ៊ឹម វណ្ណៈ បានថ្លែងឲ្យដឹងថា សាលក្រមនៃសំណុំរឿងនេះនឹងត្រូវប្រកាសនៅល្ងាចថ្ងៃទី ១១ ខែធ្នូ ឆ្នាំ ២០១៨ ខាងមុខ៕