សាលា​ក្រុង​មិន​ឲ្យ​សហជីព​ប្រារព្ធ​ទិវា​ពលកម្ម​អន្តរជាតិ​នៅ​ទី​សាធារណៈ


20140428_05
ក្រុមកម្មករសហជីពដើរក្បួន នៅថ្ងៃទិវាពលកម្មអន្តរជាតិ កាលពីឆ្នាំ ២០១៣ ហុង មិនា
<

ភ្នំពេញៈ សាលា​រាជធានី​ភ្នំពេញ​បាន​ច្រាន​ចោល​សំណើ​មួយ​ពី​សហជីព​ជាង ១០ ដើម្បី​ប្រារព្ធ​ទិវា​ពលកម្ម​អន្តរជាតិ​នៅ​ទីលាន​ប្រជាធិបតេយ្យ​នៅ​ថ្ងៃ ទី​១ ខែ​ឧសភា នេះ ប៉ុន្តែ​ក្រុម​សហជីព​បាន​អះអាង​ថា បម្រាម​នេះ​នឹង​មិន​អាច​បញ្ឈប់​គម្រោង​ពួក​គេ​បាន​ទេ។

អ្នក​នាំ​ពាក្យ​សាលា​រាជធានី​ភ្នំពេញ​លោក ឡុង ឌីម៉ង់ កាល​ពី​ថ្ងៃ​អាទិត្យ​បាន​ប្រាប់​ឲ្យ​ដឹង​ថា អាជ្ញាធរ​រាជធានី​ភ្នំពេញ​មិន​អនុញ្ញាត​ឲ្យ​សហជីព​ធ្វើ​ពិធី​នោះ​នៅ​ទីលាន​ប្រជាធិបតេយ្យ ដែល​ខ្លួន​បាន​ហាម​មិន​ឲ្យ​បាតុករ​ប្រជុំ​គ្នា​នៅ​ទី​នោះ​ចាប់​តាំង​ពី​ដើម ខែ​មករា នោះ​ទេ ហើយ​បាន​អំពាវនាវ​ឲ្យ​សហជីព​ទាំង​នេះ​យក​ស្នាក់ការ​ពួក​គេ​ប្រារព្ធ​ពិធី​ជំនួស​វិញ។

លោក ឡុង ឌីម៉ង់ បាន​ប្រាប់​ថា៖ «យើង​មិន​យល់​ព្រម​នឹង​សំណើ​ពួក​គេ​សុំ​ប្រារព្ធ​ទិវា​ពលកម្ម​អន្តរជាតិ​នៅ​ទីលាន​ប្រជាធិបតេយ្យ​ទេ ព្រោះ​ថា​មាន​អង្គការ​និង​ស្ថាប័ន​ជាច្រើន​ចង់​ប្រើ​ប្រាស់​កន្លែង​នោះ ប៉ុន្តែ យើង​បាន​បដិសេធ»។

លោក​បាន​បញ្ជាក់​ថា៖ «យើង​បាន​ប្រាប់​ឲ្យ​ពួក​គេ​ធ្វើ​នៅ​តាម​ស្នាក់ការ​សហជីព​មួយៗ ជា​កន្លែង​ឯកជន ឬ​តាម​រោងចក្រ​របស់​ពួក​គេ។ ប៉ុន្តែ យើង​មិន​អនុញ្ញាត​ឲ្យ​ពួក​គេ​ធ្វើ​នៅ​តាម​ទីសាធារណៈ​ទេ»។

លោក ឡុង ឌីម៉ង់ បាន​ថ្លែង​ថា សាលា​រាជធានី​បាន​បញ្ជូន​សំណើ​របស់​សហជីព​ទៅ​ក្រសួង មហាផ្ទៃ ដើម្បី​ធ្វើ​ការ​សម្រេច​ថា នឹង​អនុញ្ញាត​ឬ​យ៉ាង​ណា? តែ​សម្រាប់​សាលា​រាជធានី​ភ្នំពេញ គឺ​មិន​អនុញ្ញាត​ឲ្យ​ធ្វើ​ពិធី​នៅ​ទី​នោះ​ទេ។

អ្នក​ស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា (CATU) កាល​ពី​ថ្ងៃ​អាទិត្យ បាន​ថ្លែង​ឲ្យ​ដឹង​ថា ក្រុម​មេ​ដឹក​នាំ​សហជីព នៅ​តែ​ប្រកាន់​ជំហរ​ជួប​ជុំ​គ្នា​រៀបចំ​ប្រារព្ធ​ពិធី​នៅ​ទីលាន​ប្រជាធិបតេយ្យ​នោះ​ដដែល។

អ្នក​ស្រី សោភ័ណ្ឌ អះអាង​ថា៖ «យើង​នៅ​តែ​រក្សា​ជំហរ​របស់​យើង​ជួប​ជុំ​នៅ​ទីលាន​ប្រជាធិបតេយ្យ​ប្រារព្ធ​ទិវា​ពលកម្ម​អន្តរជាតិ ហើយ​សហជីព នឹង​ប្រជុំ​គ្នា​ម្តង​ទៀត​មុន​នឹង​ធ្វើ​ការ​សម្រេច​ចុង​ក្រោយ»។

អ្នក​ស្រី ប្រធាន​សហជីព​រូប​នេះ​បន្ត​ថា កាល​ពី​ប៉ុន្មាន​ឆ្នាំ​មុន សហជីព​ត្រូវ​អាជ្ញាធរ​អនុញ្ញាត​ឲ្យ​រៀបចំ​ពិធី​នោះ​នៅ​តាម​ទីលាន​សាធារណៈ​នានា​រួម​មាន​ទីលាន​ប្រជាធិបតេយ្យ ជាដើម ប៉ុន្តែ​ចម្លែក​នៅ​ឆ្នាំ​នេះ​ខុស​គ្នា​ស្រឡះ។

អ្នក​ស្រី​បញ្ជាក់​ថា៖ «សិទ្ធិ និង​សេរីភាព​របស់​យើង​បាន​ធ្លាក់​ចុះ​នៅ​ពេល​នេះ ព្រោះ​យើង​បាន​ដឹង​ហើយ កាល​ពី​ឆ្នាំ​មុនៗ រដ្ឋាភិបាល​បាន​អនុញ្ញាត​ឲ្យ​ធ្វើ​ឬ​ប្រើ​ប្រាស់​សិទ្ធិ​របស់​យើង​នៅ​តាម​ទីកន្លែង​សាធារណៈ...ប៉ុន្តែ​ឆ្នាំ​នេះ គឺ​ខុស​ប្លែក​ខ្លាំង​ណាស់»។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ (CUMW) ធ្លាប់​និយាយ​ថា ក្រុម​សហជីព​មាន​គម្រោង​ដើរ​ជា​ក្បួន​ចេញ​ពី​ទីលាន​ប្រជាធិបតេយ្យ​ទៅ​កាន់​ស្នាក់​ការ​កណ្តាល​របស់​គណបក្ស​ប្រជាជន​កម្ពុជា ហើយ​និង​គណបក្ស​សង្គ្រោះ​ជាតិ។

សម្រាប់​គម្រោង​ជួបជុំ​គ្នា​នេះ​ពួក​គេ​រំពឹង​ថា នឹង​មាន​អ្នក​ចូល​រួម ជា​កម្មករ​មន្រ្តី​រាជការ គ្រូ​បង្រៀន សិស្ស និស្សិត និង​ប្រជា​ពលរដ្ឋ​ប្រមាណ​ជា ៥ ពាន់​នាក់​យ៉ាង​តិច៕ NR

ព័ត៌មានថ្មីៗ