មន្ត្រីខណ្ឌឫស្សីកែវក្នុងពេលចុះរុះរើសំណង់របស់ប្រជាពលរដ្ឋកាលពីម្សិលមិញ។ សាលាខណ្ឌ
ភ្នំពេញ: សំណង់ផ្ទះឈើទើបសង់ថ្មីរបស់ពលរដ្ឋចំនួន ៧ គ្រួសារ នៅភូមិទួលពពែ សង្កាត់ទួលសង្កែទី ២ ខណ្ឌឫស្សីកែវ រាជធានីភ្នំពេញ ត្រូវបានអាជ្ញាធរខណ្ឌយកគ្រឿងចក្រទៅឈូសឆាយរុះរើវិញកាលពីម្សិលមិញដោយអះអាងថា បានសង់លើដីអភិវឌ្ឍន៍របស់រដ្ឋ ប៉ុន្ដែពលរដ្ឋយល់ព្រមចាកចេញដោយគ្មានការតវ៉ា។ នេះបើតាមលោក ជា ពិសី អភិបាលខណ្ឌឫស្សីកែវ។
លោក ជា ពិសី បានប្រាប់ភ្នំពេញប៉ុស្ដិ៍ថា ក្រោយទទួលបានបទបញ្ជារបស់លោក ឃួង ស្រេង អភិបាលរាជធានីភ្នំពេញអាជ្ញាធរខណ្ឌឫស្សីកែវក្រោមការដឹកនាំរបស់លោកបានសម្រេចឲ្យសមត្ថកិច្ចយកគ្រឿងចក្រ ១ គ្រឿងទៅឈូសឆាយ និងរុះរើសំណង់ដែលទើបសង់ជាខ្នមតូចៗនៅលើដីបឹង ១ កន្លែង ក្នុងភូមិសាស្ត្រខាងលើ។
លោកបានបន្តថា ប្រតិបត្តិការនេះ អាជ្ញាធរបានសម្រេចរុះរើទាំងស្រុងចំពោះខ្ទមតូចៗ ប្រក់ស័ង្កសី ១១ ខ្នង ជាកម្មសិទ្ធិរបស់ពលរដ្ឋចំនួន ៧ គ្រួសារ ខណៈបានលួចសាងសង់រំលោភយកដីអភិវឌ្ឍន៍របស់រដ្ឋក្នុងខណ្ឌឫស្សីកែវ «ឥឡូវនេះ គាត់យល់ព្រមចាកចេញ និងរុះរើខ្នមដែលពួកគាត់បានសាងសង់ហ្នឹងចេញហើយគឺគ្មានការតវ៉ាអ្វីទេ»។
.jpg)
លោក កែវ ចន្ថា នាយប៉ុស្ដិ៍នគរបាលរដ្ឋបាលសង្កាត់ទួលសង្កែ ២ បានឲ្យដឹងកាលពីម្សិលមិញថា កាលពីថ្មីៗនេះ មានជនមួយក្ដាប់តូចបានមកចាប់ដីក្នុងតំបន់នេះ យ៉ាងអនាធិបតេយ្យ ហើយដើម្បីការពារផលប្រយោជន៍របស់ពលរដ្ឋដែលមានដីធ្លីក្នុងមូលដ្ឋាន និងដីរដ្ឋផង ទើបអាជ្ញាធរខណ្ឌឫស្សីកែវប្រញាប់ទប់ស្កាត់។
លោកបញ្ជាក់ថា៖ «បន្ទាប់ពីអាជ្ញាធរយើងបានចុះណែនាំជាច្រើនលើកមកគាត់រុះរើចេញវិញខ្លះ ហើយមួយចំនួនទៀត ត្រូវបានអាជ្ញាធរចុះរុះរើដោយផ្ទាល់តែម្ដង។ ឥឡូវនេះ គាត់ចេញអស់ហើយ ហើយអត់មានអ្នកតវ៉ាអ្វីទេ ព្រោះគាត់ដឹងថា គាត់មកធ្វើសកម្មភាពខុសច្បាប់»។
តាមសេចក្ដីប្រកាសព័ត៌មានរបស់រដ្ឋបាលខណ្ឌឫស្សីកែវចុះថ្ងៃទី ៩ មេសា បានបង្ហាញថា ដើម្បីការពារផលប្រយោជន៍ស្របច្បាប់របស់ពលរដ្ឋដែលមានដីធ្លីក្នុងមូលដ្ឋានខណ្ឌឫស្សីកែវ និយាយដោយឡែក និងនិយាយជារួម ក្នុងមូលដ្ឋានរាជធានីភ្នំពេញ ក៏ដូចជា ទប់ស្កាត់កុំឲ្យចលនានេះរីករាលដាលនោះ រដ្ឋបាលខណ្ឌឫស្សីកែវគ្មានជម្រើសអ្វីក្រៅពីការអនុវត្តវិធានការរដ្ឋបាល និងវិធានការច្បាប់ឡើយ។
សេចក្ដីប្រកាសព័ត៌មានបញ្ជាក់ថា៖ «ក្រៅពីវិធានការខាងលើនេះ រដ្ឋបាលខណ្ឌនឹងចាត់វិធានការច្បាប់បន្ថែមទៀតចំពោះជនរឹងរូសនិងមិនរាងចាលប្រព្រឹត្តអំពើខុសច្បាប់បង្កចលនាធ្វើឲ្យបាត់បង់សណ្តាប់ធ្នាប់សាធារណៈ និងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់ជាធរមាន» ។
តាមកំណត់ហេតុរបស់សង្កាត់ទួលសង្កែ២ចុះពីថ្ងៃទី៧ មេសា បានបង្ហាញថា ក្រោយពីបានចុះណែនាំកុំឲ្យពលរដ្ឋបន្តប្រព្រឹត្តខុសច្បាប់កន្លងមក អាជ្ញាធរក៏បានសម្រេចផ្អាកការសាងសង់ខ្នមរបស់ពលរដ្ឋចំនួន ៧ គ្រួសារ ដែលមាន ឈ្មោះ ផាន ចិត្ត ភេទប្រុស អាយុ ៣៣ ឆ្នាំ, ទេព ធីតា ភេទស្រី អាយុ ២៥ ឆ្នាំ, អ៊ិត រ៉ាវ៉េត ភេទប្រុស អាយុ ៥៧ ឆ្នាំ, សាន់ រឿន ភេទស្រី អាយុ ៥៧ ឆ្នាំ, ហឿន បូរី ភេទស្រី អាយុ ៣៣ ឆ្នាំ, សុខ សាវឿន ភេទស្រី អាយុ ៤៩ ឆ្នាំ និងឈ្មោះ អ៊ិត កណ្ណីន្ថា ភេទស្រី អាយុ ២៨ ឆ្នាំ ដោយពួកគាត់ជាពលរដ្ឋស្នាក់ នៅភូមិទួលពពែ សង្កាត់ទួលសង្កែទី ២ ខណ្ឌឫស្សីកែវ ។
កំណត់ហេតុបញ្ជាក់ថា៖ «ប្រជាពលរដ្ឋចំនួន ៧ គ្រួសារនេះ បានស្ដាប់តាមការណែនាំរបស់អាជ្ញាធរមូលដ្ឋានដោយសុខចិត្ត ព្រមផ្អាកការសាងសង់លើដីរដ្ឋបន្តទៀត ហើយព្រមផ្ដិតស្នាមមេដៃស្ដាំលើកំណត់ហេតុទុកជាការចំណាំស្រាប់»។
យ៉ាងណាក្ដី ប្រជាពលរដ្ឋទាំង ៧ គ្រួសារនេះ មិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ កាលពីម្សិលមិញ៕
