ទិដ្ឋភាពត្រើយម្ខាងនៃតំបន់កោះពេជ្រទល់មុខកោះនរា ដែលត្រូវឆ្លងស្រឡាង។ រូបថត ឡាយ សាមាន
ភ្នំពេញៈ រដ្ឋបាលរាជធានីភ្នំពេញ និងក្រុមហ៊ុនអភិវឌ្ឍន៍ OCIC កំពុងសហការរៀបចំដាក់ឱ្យប្រើប្រាស់ស្រឡាងជាបណ្តោះអាសន្ន ដើម្បីចម្លងពីកោះនរាទៅកាន់កោះពេជ្រនៅចុងខែកុម្ភៈនេះ ដើម្បីដោះស្រាយបញ្ហាការកកស្ទះចរាចរណ៍ពីកំណាត់ផ្លូវជាតិលេខ ១ និងស្ពានព្រះមុនីវង្សដែលជាក្តីកង្វល់របស់ពលរដ្ឋនាពេលបច្ចុប្បន្ន។
មុនដាក់ឱ្យដំណើរការស្រឡាងបណ្តោះអាសន្ន អភិបាលរាជធានីភ្នំពេញលោក ឃួង ស្រេង កាលពីថ្ងៃទី ១៧ ខែ កុម្ភៈ ឆ្នាំ ២០២១ បានដឹកនាំមន្ត្រីនៃមន្ទីរជំនាញពាក់ព័ន្ធ និងមន្ត្រីជំនាញរដ្ឋបាលរាជធានីភ្នំពេញចុះពិនិត្យទីតាំងដាក់ស្រឡាងឆ្លងកាត់ពីកោះនរាទៅកាន់កោះពេជ្រ ដើម្បីធ្វើបច្ចុប្បន្នភាព ។
លោក ឃួង ស្រេង អភិបាលរាជធានីភ្នំពេញបានប្រាប់ ភ្នំពេញ ប៉ុស្តិ៍ បន្ថែមកាលពីថ្ងៃទី ២២ កុម្ភៈថា ក្រុមការងារកំពុងធ្វើការលើរឿងនេះដើម្បីរំដោះការកកស្ទះចរាចរណ៍ឱ្យបានឆាប់រហ័ស។
.jpg)
លោកថា៖ «យើងត្រៀមដាក់ស្រឡាងចម្លងចំនួន ៤ ខ្ញុំចង់ឱ្យបានដាក់ដំណើរការឆាប់ៗនៅចុងខែកុម្ភៈនេះជាការគ្រោងទុក តែអាស្រ័យទៅលើជាក់ស្តែងយើងកំពុងទាក់ទងទៅកំពង់ដរអរិយក្សត្រថាតើគាត់មានលទ្ធភាពផ្តល់ខ្លះឱ្យយើងទាន់ទេ យ៉ាងហោចណាស់ក៏មានស្រឡាង ២ បណ្តោះអាសន្នសិន ចាំពេលគាត់ធ្វើបានទៀតយើងនឹងបន្ថែមទៀត»។
យ៉ាងនេះក្តី លោកបានគូសបញ្ជាក់ថា អ្នកដែលធ្វើដំណើរតាមស្រឡាងនេះ គិតកម្រៃធម្មតា ព្រោះរដ្ឋពុំមែនជាអ្នកវិនិយោគឡើយ គ្រាន់តែជាអ្នកសម្របសម្រួលត្រួសត្រាយផ្លូវប៉ុណ្ណោះ។ លោកថា៖ «អ្នកវិនិយោគគាត់ជាអ្នកធ្វើយើងជាអ្នកសម្រួលគាត់រដ្ឋមានលុយឯណាដើម្បីទិញប្រេង ទិញស្រឡាង ហើយការបង់ថ្លៃសេវាធ្វើដូចតម្លៃជិះស្រឡាងអរិយក្សត្រដែរ»។
ប្រជាពលរដ្ឋរស់នៅភូមិកោះនរាដែលប្រកបរបររត់ម៉ូតូឌុប លោក បុរី បានប្រាប់ ភ្នំពេញ ប៉ុស្តិ៍ ដោយបានបង្ហាញការសាទរចំពោះការដាក់ឱ្យប្រើប្រាស់ស្រឡាងបណ្តោះអាសន្ននេះ ខណៈលោកស្នើរដ្ឋបាលរាជធានីភ្នំពេញដាក់ស្រឡាងឱ្យបានច្រើនដើម្បីឆ្លើយតបតាមតម្រូវការ។
លោកថ្លែងថា៖ «ពេលឃើញគេប្រកាសដាក់ស្រឡាងយើងសប្បាយចិត្ត ដោយសារយើងរស់នៅខាងស្ពានច្បារអំពៅស្ទះខ្លាំង ពេលដាក់ឱ្យឆ្លងនឹងកាត់បន្ថយស្ទះមួយចំណែកដែរ អ៊ីចឹងអ្នកជិះពីកៀនស្វាយមកអាចជិះតាមផ្លូវជាតិលេខ ១ វាងចូលកំពង់ចម្លងកោះនរានេះ»។ តែខ្ញុំសំណូមពរថាបើស្រឡាងមាន ១ ក៏ចម្លងអត់ទាន់ដែរ លុះត្រាតែមាន ២ ឬ ៣ សម្រាប់ដឹកទៅមកទើបគ្រប់គ្រាន់»។
លោក បុរី បានឱ្យដឹងដែរថា បញ្ហាការកកស្ទះចរាចរណ៍កើតឡើងរៀងរាល់ថ្ងៃ ពេលព្រឹក និងពេលល្ងាច ជាពិសេសស្ទះខ្លាំងចាប់ពីអនុវិទ្យាល័យច្បារអំពៅ។
ពលរដ្ឋម្នាក់ទៀតលោក ព្រំ រដ្ឋា រស់នៅសង្កាត់ច្បារអំពៅ ២ បាននិយាយថា ការដាក់ឱ្យប្រើប្រាស់ស្រឡាងបណ្តោះអាសន្ននេះគឺជាដំណោះស្រាយដែលអាចជួយកាត់បន្ថយការកកស្ទះចរាចរណ៍មួយចំណែកតូចតែប៉ុណ្ណោះ។
លោកបានបញ្ជាក់ថា៖ «ព្រោះថារយៈចម្ងាយនៃការធ្វើដំណើរដោយយានយន្តបូកទាំងការកកស្ទះ ឬស្មើនឹងការចំណាយពេលជិះស្រឡាងទៅហើយ អ៊ីចឹងប្រហែលអ្នកដំណើរអាចជ្រើសយកមធ្យោបាយជិះស្រឡាងតែត្រឹមរយៈពេលខ្លីប៉ុណ្ណោះ»។
យ៉ាងណាក៏ដោយ លោកស្នើដល់រដ្ឋាភិបាលគប្បីពន្លឿនការសាងសង់ស្ពានពីកោះនរាឆ្លងទៅកាន់តំបន់កោះពេជ្រឱ្យបានឆាប់រហ័ស ហើយបន្ថែមសមត្ថកិច្ចនៅម្តុំច្បារអំពៅឱ្យបានច្រើនដើម្បីសម្រួលដល់ការធ្វើចរាចរណ៍នៅតំបន់នេះ។
គួរបញ្ជាក់ផងដែរ ស្ពានខ្សែកាបបេតុងតភ្ជាប់ពីតំបន់អភិវឌ្ឍន៍កោះនរា ទៅកាន់ទីក្រុងរណបកោះពេជ្រត្រូវបានបើកការដ្ឋានសាងសង់តាំងពីខែតុលាឆ្នាំ ២០២០ ដោយនឹងប្រើប្រាស់រយៈពេលសាងសង់ប្រមាណ ៣៥ ខែ។ ស្ពាននេះមានបណ្តោយប្រវែង ៨២៤ ម៉ែត្រ និងទទឹងប្រវែង ២៤,៥ ម៉ែត្រ និងមានសសរខ្សែកាបកម្ពស់ ៦០ ម៉ែត្រចំនួន ២ ដើម ដែលមានចម្លាក់ក្បាច់ខ្មែរផងដែរ៕
វីដេអូ៖
