ជំនួបរវាងលោក ប្រាក់ សុខុន និងឯកអគ្គរដ្ឋទូតស្វ៊ីសកាលពីថ្ងៃ ១២ កុម្ភៈ។ រូប ក្រសួងការបរទស
ភ្នំពេញៈ រដ្ឋាភិបាលប្រទេសស្វ៊ីសបានសម្រេចផ្តល់ជំនួយ ៦ លាន ហ្វ្រង់ស្វ៊ីសបន្ថែមទៀត ដើម្បីបន្តគាំទ្រដល់សកម្មភាពដោះមីននៅកម្ពុជារយៈពេល ៥ ឆ្នាំទៀត ដែលជាការចូលរួមធ្វើឲ្យសម្រេចតាមផែនការរបស់រាជរដ្ឋាភិបាលកម្ពុជាដែលគ្រោងដោះឲ្យអស់នៅក្នុងឆ្នាំ ២០២៥ ខាងមុខ។
ការសម្រេចផ្ដល់ជំនួយនេះបានធ្វើឡើង ខណៈលោកស្រី Helene Budliger Artieda ឯកអគ្គរដ្ឋទូតថ្មីរបស់ប្រទេស ស្វ៊ីស ប្រចាំកម្ពុជាបានជួបពិភាក្សាការងារជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៅទីស្ដីការក្រសួងការបរទេស កាលពីថ្ងៃទី ១២ ខែ កុម្ភៈ ឆ្នាំ ២០២០។
លោក កុយ គួង អ្នកនាំពាក្យក្រសួងការបរទេស និងសហប្រតិបត្ដិការអន្តរជាតិថ្លែងថា៖ «ចាប់ពីឆ្នាំ ២០១៦ ដល់ឆ្នាំ ២០១៩ ស្វ៊ីសបានផ្តល់ហិរញ្ញវត្ថុដល់វិស័យដោះមីន ៣ ៤៥០ ០០០ ដុល្លារអាមេរិក។ ស្វ៊ីសបន្តជួយដល់វិស័យដោះមីន ៦ លាន ហ្វ្រង់ស្វ៊ីស (ប្រហែល ៦ លានដុល្លារ) បន្ថែមទៀតសម្រាប់ឆ្នាំ ២០២០ ដល់ឆ្នាំ ២០២៥ ដែលរាជរដ្ឋាភិបាលកំណត់យកធ្វើជាគោលដៅដោះឲ្យអស់មីនពីផ្ទៃដីនៅកម្ពុជា»។
.jpg)
លោក កុយ គួង បានថ្លែងថាក្នុងជំនួបនេះលោកស្រីឯកអគ្គរដ្ឋទូតស្វ៊ីសក៏បានលើកឡើងអំពីកិច្ចសហប្រតិបត្តិការកន្លងមកដែលរដ្ឋាភិបាលស្វ៊ីសបានផ្តោតជាសំខាន់លើវិស័យសុខាភិបាលដែលពាក់ព័ន្ធទៅនឹងសុខភាពរបស់កុមារ។ លោកស្រី Helene Budliger Artieda បានថ្លែងថា ប្រទេសស្វ៊ីសនៅតែបន្តគាំទ្រដល់មន្ទីរពេទ្យគន្ធបុប្ផា ទោះបីជាសព្វថ្ងៃមន្ទីរពេទ្យនេះគ្រប់គ្រងដោយខ្មែរក៏ដោយ។
បើតាមលោក កុយ គួង រដ្ឋាភិបាលស្វ៊ីសបានគាំទ្រដល់មន្ទីរពេទ្យគន្ធបុប្ផាចាប់តាំងពីឆ្នាំ ១៩៩៤ មកម្ល៉េះដែលគិតមកទល់ឆ្នាំ ២០១៨ ប្រទេសស្វ៊ីសបានផ្តល់ជំនួយដល់មន្ទីរពេទ្យគន្ធបុប្ផាប្រមាណ ៦០ លាន ហ្វ្រង់ស្វ៊ីសដែលប្រហែលនឹង ៦០ លានដុល្លារអាមេរិក។
លោក កុយ គួង បានឲ្យដឹងទៀតថានៅក្នុងជំនួបនោះលោក ប្រាក់ សុខុន បានថ្លែងអំណរគុណដល់រដ្ឋាភិបាលស្វ៊ីសដែលកន្លងមកតែងបានចូលរួមចំណែកអភិវឌ្ឍសេដ្ឋកិច្ចក៏ដូចជាសង្គមកិច្ច ជាពិសេសគឺលើផ្នែកសុខាភិបាលដោយជួយដល់មន្ទីរពេទ្យគន្ធបុប្ផាកន្លងមក។
លោក ប្រាក់ សុខុន បានបញ្ជាក់ប្រាប់លោកស្រី Helene Budliger Artieda ថា រាជរដ្ឋាភិបាលកម្ពុជាតែងតែធ្វើយ៉ាងណាឲ្យមន្ទីរពេទ្យគន្ធបុប្ផានេះ មានដំណើរការរហូត ហើយពង្រីកវិសាលភាពឲ្យកាន់តែទូលំទូលាយផងដែរ។ ក្នុងនោះរាជរដ្ឋាភិបាលកម្ពុជាចូលរួមវិភាគទាន ១ ឆ្នាំៗ ១០ លានដុល្លារអាមេរិក។ ជាងនេះទៅទៀតកម្ពុជាមានមូលនិធិគន្ធបុប្ផាផងដែរដែលអាចបរិច្ចាគប្រមាណ ៥ លានដុល្លារអាមេរិកក្នុង ១ ឆ្នាំខណៈកាកបាទក្រហមកម្ពុជាក៏បរិច្ចាគ ១ លានដុល្លារអាមេរិក ១ ឆ្នាំៗ។ នេះបើតាមការបញ្ជាក់ពីលោក កុយ គួង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានបញ្ជាក់កាលពីម្សិលមិញថា លោកទទួលបានព័ត៌មានពីការផ្ដល់ជំនួយរបស់ប្រទេសស្វ៊ីសនេះដែរ ប៉ុន្ដែមិនទាន់ដឹងថាធ្វើតាមរយៈតំណាងអង្គការណាមួយ និងដោយវិធីណានោះទេ។
លោកបានបញ្ជាក់ថា៖ «ខ្ញុំដឹងខ្លះដែរពីរឿងនេះ ប៉ុន្ដែគ្រាន់តែថាកន្លងមកជំនួយរបស់ស្វ៊ីសបានផ្ដល់ជូន CMAC តាមរយៈ UNDP ប៉ុន្ដែឥឡូវគាត់ឈប់ជួយតាមវិធីនេះហើយ ប្រហែលជាគេឲ្យទៅតាមរយៈអង្គការសង្គមស៊ីវិលណាផ្សេង»។
យោងតាមទិន្នន័យរបស់ CMAC ដែលបានផ្សព្វផ្សាយកាលថ្ងៃទី ២៦ ខែធ្នូ ឆ្នាំមុនឲ្យដឹងថា ក្នុងរយៈពេលពេញ ១ ឆ្នាំ ២០១៩ CMAC បានរកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះបានជាង ៣៦ ០០០ គ្រាប់លើផ្ទៃដីជិត ៦ ៧០០ ហិកតា នៃតំបន់ចម្ការមីន និងគ្រាប់មិនទាន់ផ្ទុះចំនួន ៤៨៧ ទីតាំងនៅទូទាំងប្រទេស ខណៈដែលរដ្ឋាភិបាលបានប្តេជ្ញាដោះមីនឲ្យអស់នៅត្រឹមឆ្នាំ ២០២៥៕
