ខឹង​ប្រដៅ​កូន​មិន​ស្តាប់​ រុំ​កន្ទេល​ជ័រ ចាក់​សាំង​ដុត​សម្លាប់​ខ្លួន


CrimeBanner
CrimeBanner

តាកែវៈ ស្ត្រី​ម្នាក់​ខឹង​ប្រដៅ​កូន​មិន​ស្តាប់ យក​កន្ទេល​ជ័រ​រុំ​ខ្លួន​ហើយ​ទិញ សាំង១លិ​ត្រ​ចាក់​ដុត​ខ្លួន​កាលពី​ថ្ងៃ​ព្រលប់​ថ្ងៃ​អង្គារ នៅ​ភូមិ​ត្រពាំង​ទន្លេ ស្រុក​កោះ​អណ្តែត ខេត្តតាកែវ​ហើយ​បាន​ស្លាប់​កាល​ពី​ព្រឹក​ថ្ងៃ​ពុធ នេះ​បន្ទាប់​ពី​បញ្ជូន​មក​មន្ទីរ​ពេទ្យ​ព្រះកុសុមៈ​រាជធានី​ភ្នំពេញ។

លោក អ៊ុក កាន់ នាយផ្នែក​នគរបាល​ស្រុក​កោះ​អណ្តែត​ឲ្យ​ដឹង​ថា ស្ត្រី​ដុត​ខ្លួន​ស្លាប់​ឈ្មោះ​ញឹម សារ៉ែន អាយុ​៣៧​ឆ្នាំ​ជា​ស្ត្រី​មេម៉ាយ​មាន​កូន ៥នាក់ មាន​លំនៅ ភូមិ​ត្រពាំង​ទន្លេ ស្រុក​កោះអណ្តែត ខេត្ត​តាកែវ ត្រូវ​ស្លាប់​បន្ទាប់​ពី​សាច់​ញាតិ​បញ្ជូន​មក​មន្ទីរ​ពេទ្យ​ព្រះកុសុមៈ​បាន​មួយ​យប់ ។

លោក​ប្រាប់ថា « គាត់​យក​កន្ទេល​ជ័រ​រុំ​ខ្លួន​ហើយ​ចាក់​សាំង​ដុត ។គាត់​ត្រូវ​ភ្លើង​ឆេះ​មួយ​ជាន់​ហើយ​ត្រូវ​ជ័រ​កន្ទេល​នោះ​ឆេះ​រលាក​មួយ​ជាន់​ទៀត​រលួយ​សាច់​អស់​ហើយ»។

លោក​រំ​ឮក​តាម​សម្តី​អ្នកជិតខាង​ថា មុនពេល​កើតហេតុ​កូនស្រី​គាត់​ឈ្មោះ​ងយ គន្ធា អាយុ​២០​ឆ្នាំ ជា​កម្មការិនី​កាត់​ដេរ​បាន​ឈ្លោះ​ប្រកែក​ជាមួយ​ប្តី​ឈ្មោះ​ធៀន វាសនា អាយុ​២៣​ឆ្នាំ ហើយ​ស្ត្រី​រងគ្រោះ​បាន​ទៅ​ឃាត់។ តែ​កូនស្រី​គាត់​មិន​ស្តាប់​ក៏​មក​ឈ្លោះ​ជាមួយ​ម្តាយ​ខ្លួនឯង​ទៅវិញ​ធ្វើឱ្យ​ស្ត្រី​រងគ្រោះ​តូច ចិត្ត ណាមួយ​ពិបាកចិត្ត​រឿង​ជំពាក់​លុយ​អង្គការ​ច្រើន​ផង​បានកើត​ទៅជា​រឿង​បែបនេះ​ទៅ។

ករណី​ដូចគ្នានេះដែរ​បុរស​ម្នាក់ ឈ្មោះ នួន យ៉ុង អាយុ៤០ឆ្នាំ មុខរបរ រត់​ម៉ូតូ​កង់​បី ស្នាក់​នៅផ្ទះ​លេខ២៨ ផ្លូវ១៣៦ ភូមិ២ សង្កាត់​ផ្សារ​ថ្មី​ទី២ ខណ្ឌដូនពេញ កាលពី​យប់​ថ្ងៃទី២៨ ខែមេសា កន្លងមក​បាន​លោត​ពីលើផ្ទះ​ជាន់​ទី២ស្លាប់​ក្រោយពី​ខឹង​កូន​មិន​ស្តាប់បង្គាប់ ៕

ព័ត៌មានថ្មីៗ