ឃុំ​ខ្លួន​ជន​សង្ស័យ​៣​នាក់​ពាក់​ព័ន្ធ​វាយ​ជន​រង​គ្រោះ ដេរ​រហូត​៦០​ថ្នេរ


ភ្នំពេញៈ យុវជន​សង្ស័យ​៣​នាក់​ដែល​ប្រើ​ហិង្សា​វាយ​ជន​រង​គ្រោះ​បណ្តាល​ឲ្យ​របួស​ធ្ងន់​ខណៈ​ជន​រង​គ្រោះ​​ទៅ​ប្រាប់​កុំ​ឲ្យ​ជជែក​គ្នា​ខ្លាំង​ពេល​ផឹកស៊ី​នៅ​ភូមិ​ ប៉ាយ៉ាប ​កាលពី​យប់​ថ្ងៃ​ចន្ទ​ត្រូវ​សមត្ថកិច្ច​នគរបាល​ខណ្ឌ​សែន សុខ​ចាប់​ឃុំ​ខ្លួន​និង​កំពុង​ស៊ើប​សួរ​ដើម្បី​កសាង​សំណុំ​រឿង​ទៅ​សាលា​ដំបូង​រាជធានី​ភ្នំពេញ។

លោក ម៉ុក ហុង អធិការ​នគរបាល​ខណ្ឌ​សែន​សុខ​ឲ្យ​ដឹង​ថា​ ជន​សង្ស័យ​ដែល​សមត្ថកិច្ច​ឃាត់​ខ្លួន​ពាក់​ព័ន្ធ​ជម្លោះ​វាយ​តប់​គ្នា​បណ្ដាល​ឲ្យ​ជន​រង គ្រោះ​ម្នាក់​របួសធ្ងន់ កាលពី​រំលង​អា ធ្រាត្រ​ឈាន​ចូល​ថ្ងៃទី ១២ ឧសភា​សមត្ថកិច្ច​កំពុង​ស៊ើបសួរ​នៅ​ឡើយ​ទេ។

លោកថ្លែង​ថា «ជន​ទាំង​៣នាក់​នោះ​សមត្ថកិច្ច​ទើប​តែ​ឃាត់​ខ្លួន​យក​ទៅ​ភ្លាមៗ​មិន​កើត​ទេ»។

សមត្ថកិច្ច​ខណ្ឌ​សែន​សុខ​ឲ្យ​ដឹងថា​ជន​សង្ស័យ​ទាំង​៣​នាក់​ឈ្មោះ អ៊ឹត សុខ​ជា អាយុ​១៩​ឆ្នាំ ឈ្មោះ ខឿន ពិសី ភេទ​ប្រុស អាយុ​ ២១ ​ឆ្នាំ ​និង​ទី៣ ឈ្មោះ ហ៊ុន សារឿត អាយុ​២០​ឆ្នាំ​មាន​លំនៅ​ភូមិ​ បាយ៉ាប សង្កាត់​ភ្នំពេញ​ថ្មី ខណ្ឌ​សែន​សុខ។

សមត្ថកិច្ច​បន្តថា នៅ​មុន​ពេល​កើត​ហេតុ​ក្រុម​ជន​សង្ស័យ​បាន​ផឹក​ស្រា​តាំង​ពី​ក្បាល ព្រលប់​រហូត​ដល់​ម៉ោង​ជាង​១២ រំលង​អាធ្រាត្រ​ឈាន​ចូល​ថ្ងៃទី​១២ ខែ​ឧសភា និង​ស្រែក​ឡូឡា។ ពេលនោះ​ជន​រងគ្រោះ​ឈ្មោះ ងួន រចនា ភេទ​ប្រុស អាយុ​២០ឆ្នាំ មុខរបរ​កម្មករ​សំណង់​បាន​ចេញ​មក​ប្រាប់​បំណង​កុំ​ឲ្យ​ជជែក​គ្នា​ឮ​ពេក​តែ​ដោយ​ត្រូវ​ស្រា​ខ្លាំង​ស្ពឹក​មុខ​ស្រាប់តែ​ក្រុម​ជនសង្ស័យ​បាននាំគ្នា​ស្ទុះ​មក​វាយ​លើ ជនរងគ្រោះ​គ្មាន​ដក​ដៃ​ដោយ​ប្រើ​ដំបង​ឈើ​និង​ដុំថ្ម​វាយ​ក្បាល​និង​ខ្លួន​ជនរងគ្រោះ​បណ្ដាល​ឲ្យ​របួស​បែកក្បាល​ហូរឈាម​ស្រោច​ខ្លួន។

សមត្ថកិច្ច​បន្តទៀតថា ក្នុងពេល​ក្រុម​ជនសង្ស័យ​វាយតប់​លើ​ជនរងគ្រោះ​នោះ​ខាង​ក្រុមគ្រួសារ​ជនរងគ្រោះ​បាន​ស្ទុះ​មកឃាត់​និង​ដឹក​ជនរងគ្រោះ​ទៅ មន្ទីរពេទ្យ​ព្រះកុសុមៈ​ដោយ​ដេរ​របួស​ដល់​ទៅ៦០ថ្នេរ ៕

ព័ត៌មានថ្មីៗ