ចាប់​ឡាន​ដឹក​ឈើ​ម្រះ​ព្រៅ​១០​ដុំ​នៅ​ក្រុង​កំពង់​ឆ្នាំង


កំពង់ឆ្នាំងៈ ដុំ​ឈើ​ម្រះព្រៅ​ចំនួន ៩ដុំ​ធំ​បង្កប់​ក្រោម​បាវ​ប្រហុក​ដឹក​តាម​រថយន្ត​មួយគ្រឿង​ត្រូវ​សមត្ថកិច្ច​ប្រឆាំង​បទល្មើស​សេដ្ឋកិច្ច​ខេត្ត​ស្ទាក់​ចាប់បាន​កាលពី​ថ្ងៃត្រង់​ថ្ងៃ​​​ម្សិលមិញ​ក្នុង​ក្រុង-ខេត្ត​កំពង់ឆ្នាំង។

លោក គឹម សារ៉េត មន្ត្រី​ការិយាល័យ​កណ្តាល​ប្រឆាំង​បទល្មើស​សេដ្ឋកិច្ច​ខេត្តកំពង់ឆ្នាំង​ឲ្យ​ដឹងថា ឈើ​ម្រះព្រៅ​ចំនួន១០ដុំ​មាន​មុខកាត់​ប្រហែល ៣តឹក ​ប្រវែង​កន្លះ​ម៉ែត្រ​ត្រូវ​សមត្ថកិច្ច​ស្ទាក់​ចាប់បាន​នៅ​ចំណុច​មុខ​ភោជនីយដ្ឋាន​ទន្លេសាប​ក្នុងភូមិ​ត្រពាំង​គង​សង្កាត់​ផ្អេ​រ​ក្រុង-ខេត្តកំពង់ឆ្នាំង ។

លោក​ប្រាប់ថា«ឈ្មួញ​បង្កប់​ឈើ​ក្រោម​បាវ​ហើយ​កម្លាំង​សម្ងាត់​យើង​ឲ្យ​ការណ៍​តែ​យើង​ចាប់​បានតែ​ឈើ​និង​ឡាន​ទេ» ។

លោក​ឲ្យ​ដឹង​បន្តថា រថយន្ត​ល្មើស​ម៉ាក​នីសា​ន់​ពាក់​ស្លាក​ចាស់​លេខ​ង 2-590 ភ្នំពេញ ​បើក​មកពី​ទិស​ខាងជើង​ដែល​ទំនង​មកពី​ខេត្តពោធិ៍សាត់​ឆ្លងកាត់​ក្រុង​កំពង់ឆ្នាំង​និង​មាន​គោលដៅ​បើក​ទៅ​ខេត្តកំពង់ចាម​និង​ចូល​ក្រុងភ្នំពេញ។ លុះ​បើក​មកដល់​ចំណុច​មុខ​ភោជនីយដ្ឋាន​ទន្លេសាប​ក៏ត្រូវ​សមត្ថកិច្ច​ស្ទាក់ចាប់​តែម្តង​ចំណែកឯ​អ្នកបើកបរ​និង​ព្រូឡាន​បាន​រត់​គេចខ្លួនបាត់ ។

លោក​ប្រាប់ថា ទាំង​វត្ថុតាង​ឈើ​និង​រថយន្ត​ត្រូវ​សមត្ថកិច្ច​យកទៅ​រក្សាទុក​នៅ​ខណ្ធ​រដ្ឋបាល​ព្រៃឈើ​ខេត្ត​កំពង់​ឆ្នាំង​ដើម្បី​រៀបចំ​ឯកសារ​បញ្ជូនទៅ​សាលាដំបូង​ខេត្តកំពង់ឆ្នាំង​តាម​នីតិវិធី​ច្បាប់ ៕

ព័ត៌មានថ្មីៗ