«ខ្ញុំមានជំនឿយ៉ាងមុតមាំថា កិច្ចខិតខំប្រឹងប្រែងរបស់យើងទាំងអស់គ្នាជាមួយនឹងភាគីពាក់ព័ន្ធនឹងជួយលើកកម្ពស់រូបិយវត្ថុក្នុងស្រុកជាលំដាប់ជាពិសេសពង្រឹងប្រាក់រៀលជានិមិត្តរូបនៃអធិបតេយ្យជាតិ ហើយដែលអំណោយផលដល់គោលនយោបាយម៉ាក្រូសេដ្ឋកិច្ច និងជាគ្រឹះដ៏រឹងមាំនៃភាពធន់របស់សេដ្ឋកិច្ចកម្ពុជា។»
ឯកឧត្ដម ជា ចាន់តូ ទេសាភិបាល ធនាគារជាតិនៃកម្ពុជា
|
«តុល្យភាពនៃរូបិយវត្ថុ ២ នឹងជួយកាត់បន្ថយការខាតបង់ពីអត្រាប្តូរប្រាក់បរទេស ប៉ុន្តែអត្ថប្រយោជន៍ច្រើនបំផុត គឺមោទនភាពជាតិដែលយើងជាប្រជាជនកម្ពុជា ហើយយើងមានប្រតិបត្តិការអាជីវកម្មរបស់យើងជាប្រាក់រៀលដើម្បីលើកកម្ពស់ និងគាំទ្រប្រាក់រៀល»។
លោក អ៊ិន ចាន់នី អគ្គនាយក ធនាគារអេស៊ីលីដា
|
«គោលនយោបាយរូបិយវត្ថុប្រកបដោយប្រសិទ្ធភាពខ្ពស់នឹងជួយជំរុញកំណើនសេដ្ឋកិច្ច និងអាចជួយទប់ស្កាត់រាល់បញ្ហាជាយថាភូតនានា។ ក្នុងរយៈពេលយូរអង្វែង វានឹងផ្តល់ផលវិជ្ជមានសម្រាប់ស្ថិរភាពសេដ្ឋកិច្ចក៏ដូចជាស្ថិរភាពតម្លៃទំនិញ និងសេវាកម្មផងដែរ»។
លោក ប៊ុន យីន ប្រធាននាយកប្រតិបត្តិរបស់ធនាគារ CIMB កម្ពុជា
|
«បន្ទាប់ពីយើងបានចាប់ផ្តើមបិទស្លាកទំនិញជាប្រាក់រៀលដែលតម្រូវដោយធនាគារជាតិ យើងមើលឃើញការចាយប្រាក់រៀលកើនឡើង ពីព្រោះអតិថិជនយល់ថាទំនិញដែលបិទស្លាកជាប្រាក់រៀលមានតម្លៃថោកជាង បើធៀបនឹងប្រាក់ដុល្លារ»។
លោកស្រី ផេតធី ហេង ប្រធានប្រតិបត្តិផ្សារទំនើបឡាក់គី
|
«ការប្រើប្រាស់រូបិយវត្ថុជាតិនៅតំបន់ជនបទបានកើនឡើងយ៉ាងខ្លាំង ដែលបង្ហាញថាប្រជាជនកម្ពុជារីករាយក្នុងការចាយវាយប្រាក់រៀល។ ទាំងអស់នេះគឺជាភ័ស្តុតាងដែលបង្ហាញថា ការប្រើប្រាស់ប្រាក់រៀលកំពុងក្លាយទៅជាបទដ្ឋានមួយនៅក្នុងទីផ្សារ»។
លោក Han Peng Kwang នាយកគ្រប់គ្រងទូទៅ ធនាគារ Phillip Bank Plc
|
«ដោយសារតែសេដ្ឋកិច្ចបច្ចុប្បន្នមានទំនោរលើការប្រើប្រាស់ប្រាក់ដុល្លារ ទើបធ្វើឲ្យជម្រើសនៃការអនុវត្តគោលនយោបាយរូបិយវត្ថុនៅមានកម្រិតខ្លាំង។ អ្វីដែលសំខាន់បំផុតនោះគឺត្រូវប្រាកដថាប្រាក់រៀលនៅតែបន្តមានស្ថិរភាព»។
លោក នាក់ សមសែន ប្រធានផ្នែកស្រាវជ្រាវនៅក្រុមហ៊ុន Nuppun Research and Consulting
|
«បើនិយាយអំពីចំណាយប្រតិបត្តិការវិញ គឺគ្រឹះស្ថានមីក្រូហិរញ្ញវត្ថុដែលមានប្រាក់រៀលច្រើនត្រូវចំណាយខ្ពស់ដោយសារតម្រូវការបុគ្គលិកបន្ថែម សម្រាប់រាប់លុយ ការដឹកជញ្ជូន និងបញ្ហានៃការទុកដាក់ជាដើម»
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា
|
«ក្នុងនាមឧស្សាហកម្មធានារ៉ាប់រង យើងសូមអបអរសាទរដល់កិច្ចខិតខំប្រឹងប្រែងរបស់ធនាគារជាតិនៃកម្ពុជាក្នុងការព្យាយាមលើកកម្ពស់រូបិយប័ណ្ណក្នុងស្រុកនៅក្នុងប្រតិបត្តិការប្រចាំថ្ងៃរបស់យើង ខណៈពេលដែលយើងនៅតែប្រើប្រាស់ប្រាក់ដុល្លារអាមេរិកក្នុងប្រតិបត្តិការភាគច្រើនរបស់យើង អ្វីៗបានចាប់ផ្តើមផ្លាស់ប្តូរក្នុងរយៈពេលប៉ុន្មានឆ្នាំចុងក្រោយនេះ ព្រោះយើងតែងតែផ្តល់ជម្រើសសម្រាប់អតិថិជនដើម្បីទូទាត់ជាប្រាក់រៀល។ ទំហំនៃការទូទាត់ជាប្រាក់រៀលក៏បានកើនឡើង ហើយរំពឹងថានឹងមានកាន់តែច្រើននាពេលអនាគត។»
លោក យក់ ចំរើនឫទ្ធិ នាយកគ្រប់គ្រង ក្រុមហ៊ុន ធានារ៉ាប់រង ហ្វតតេ
|
«ក្រុមហ៊ុនព្រូដិនសលកម្ពុជាមានសេចក្តីសោមនស្សក្នុងការចូលរួមអបអរសាទរទិវាប្រាក់រៀលនាថ្ងៃទី ២៥ មីនា នេះ។ ការកើនឡើងនៃការប្រើប្រាស់ប្រាក់រៀលក្នុងប្រតិបត្តិការហិរញ្ញវត្ថុក្នុងចំនួនទឹកប្រាក់តិច ឬច្រើនក្តី វាជាសញ្ញាជំរុញទឹកចិត្តមួយសម្រាប់សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់កម្ពុជា ហើយក្នុងនាមជាក្រុមហ៊ុនដែលផ្តល់សេវាហិរញ្ញវត្ថុមួយ យើងខ្ញុំសូមស្វាគមន៍នូវដំណើរវិវឌ្ឍនេះ ហើយលើកទឹកចិត្តបន្ថែមក៏ដូចជាការប្រើប្រាស់ប្រាក់រៀលនេះឱ្យកាន់តែច្រើន និងយ៉ាងទូលំទូលាយ»៕
លោក David Nutman អគ្គនាយក ក្រុមហ៊ុនព្រូដិនសលកម្ពុជា
|
«តាមទស្សនៈរបស់យើង ខ្ញុំគិតថាក្រុមហ៊ុន Grab ដើរតួនាទីយ៉ាងសំខាន់នៅក្នុងតំបន់ ហើយនៅគ្រប់ប្រទេសដែលយើងទៅដល់ គឺយើងប្រើប្រាស់រូបិយប័ណ្ណជាតិរបស់ប្រទេសទាំងនោះ»។
លោក Ron Wong អគ្គនាយកក្រុមហ៊ុន Grab (Cambodia) Co.,Ltd ប្រចាំកម្ពុជា
|
«ក្រុមហ៊ុននានាដែលកំពុងដំណើរការនៅក្នុងប្រទេសកម្ពុជាគួរតែយកចិត្តទុកដាក់ចំពោះការប្រើប្រាស់ប្រាក់រៀលដែលជាមធ្យោបាយមួយដើម្បីបញ្ជាក់ពីការកើនទ្បើងនៃប្រាក់រៀលដ៏គួរឲ្យកត់សម្គាល់នាពេលអនាគត។ ក្រុមហ៊ុន ផាយ ផេ យើងខ្ញុំប្តេជ្ញាចិត្តក្នុងការលើកកម្ពស់ការប្រើប្រាស់ប្រាក់រៀលដោយមិនប្រើក្រដាសប្រាក់ ហើយអ្នកប្រើប្រាស់អាចធ្វើការដាក់ប្រាក់ ចំណាយ និងដកប្រាក់រៀលពីគណនី ផាយ ផេ របស់គេដោយផ្ទាល់ទូទាំងប្រទេសកម្ពុជា»។
លោក Tomas Pokorny នាយកប្រតិបត្តិនៃក្រុមហ៊ុន Pi Pay
|