លោកស្រី រដ្ឋា៖ ម៉ាឡេស៊ីគឺជាទិសដៅទេសចរណ៍ដ៏ពេញនិយមសម្រាប់ប្រជាជនកម្ពុជាដោយសារកត្តាទាក់ទាញជាច្រើន។
ប្រធានគ្រប់គ្រងទីផ្សារនៃក្រុមប្រឹក្សាជំរុញទេសចរណ៍ម៉ាឡេស៊ី លោកស្រី សៅ រដ្ឋា មានភារកិច្ចដ៏ធំនៅចំពោះមុខក្នុងរយៈពេលប៉ុន្មានខែខាងមុខនេះ។
លោកស្រីមានភារកិច្ចផ្សព្វផ្សាយប្រទេស ម៉ាឡេស៊ី ឲ្យបានកាន់តែទូលំទូលាយដល់ប្រជាជនកម្ពុជាឲ្យទៅទស្សនាតំបន់គោលដៅទេសចរណ៍ដែលនៅមិនឆ្ងាយប៉ុន្មានពីព្រះរាជាណាចក្រកម្ពុជា។
សម្រាប់យុទ្ធនាការ «ទស្សនាប្រទេសម៉ាឡេស៊ីឆ្នាំ ២០២០» គោលដៅរបស់លោកស្រីគឺយ៉ាងហោចណាស់មានភ្ញៀវទេសចរកម្ពុជាលើសពី ១០ ម៉ឺននាក់ទៅទស្សនាប្រទេស ម៉ាឡេស៊ី។
លោកស្រី រដ្ឋា មានសុទិដ្ឋិនិយមចំពោះកំណើនទេសចរកម្ពុជាដែលបានទៅទស្សនាប្រទេស ម៉ាឡេស៊ី។ នៅចុងឆ្នាំនេះលោកស្រីមានជំនឿចិត្តថា ប្រទេស ម៉ាឡេស៊ី នឹងទទួលបានភ្ញៀវទេសចរកម្ពុជាប្រមាណ ១០ ម៉ឺននាក់ ខណៈគិតត្រឹម ៥ ខែដំបូងក្នុងឆ្នាំនេះភ្ញៀវទេសចរកម្ពុជាចំនួន ៤៣ ២២១ នាក់ បានទៅទស្សនាប្រទេស ម៉ាឡេស៊ី។
ដោយមានទីតាំងស្ថិតនៅក្នុងតំបន់អាស៊ាន នឹងមានទំនាក់ទំនងល្អ ជាពិសេសមានផលិតផលទេសចរណ៍ដ៏គួរឱ្យទាក់ទាញ សម្រាប់ភ្ញៀវទេសចរចម្រុះទាំងភ្ញៀវទេសចរលក្ខណៈបុគ្គល លក្ខណៈក្រុមគ្រួសារ ឬលក្ខណៈជាក្រុម ប្រទេសម៉ាឡេស៊ីបានក្លាយជាគោលដៅទេសចរណ៍ដ៏ទាក់ទាញសម្រាប់ភ្ញៀវទេសចរទាំងក្នុងតំបន់ និងភ្ញៀវទេសចរមកពីជុំវិញពិភពលោក។
«ប្រទេស ម៉ាឡេស៊ី បានក្លាយជាគោលដៅដ៏ជាក់លាក់រួមជាមួយប្រទេស ថៃ និងវៀតណាម សម្រាប់ភ្ញៀវទេសចរកម្ពុជា។ កត្តាដែលរួមចំណែកដល់ការអភិវឌ្ឍប្រកបដោយភាពវិជ្ជមាននេះគឺរួមមានការធ្វើដំណើរមានរយៈពេលខ្លីរវាងប្រទេសទាំង ២ ដោយចំណាយពេលហោះហើរត្រឹមតែ ២ ម៉ោងប៉ុណ្ណោះ»។
«ទាំងប្រទេស ម៉ាឡេស៊ី និងកម្ពុជា បានប្តេជ្ញាលើកកម្ពស់វិស័យទេសចរណ៍រវាងប្រទេសទាំង ២។ ក្នុងចំណោមលក្ខណសម្បត្តិទាំងអស់នេះគឺភាពស្រដៀងគ្នាដូចជាអាកាសធាតុ ពេលវេលា និងម្ហូប ហាឡាល់សម្រាប់ទេសចរមូស្លីមរបស់យើង»។
លោកស្រី រដ្ឋា បានថ្លែងថា៖ «ចម្ងាយធ្វើដំណើររយៈពេលខ្លី និងមិនតម្រូវឲ្យមានទិដ្ឋាការក្នុងរយៈពេល ៣០ ថ្ងៃ ធ្វើឱ្យភ្ញៀវទេសចរនៃប្រទេសទាំង ២ កាន់តែមានភាពងាយស្រួលសម្រាប់ការស្នាក់នៅទាំងរយៈពេលខ្លី និងរយៈពេលវែង។
លោកស្រីបន្ថែមថា ប៉ុន្តែសម្រាប់ឆ្នាំក្រោយនឹងមានអ្វីពិសេសជាច្រើនទៀត ខណៈប្រទេស ម៉ាឡេស៊ី មានផែនការធំៗ ដើម្បីទាក់ទាញភ្ញៀវទេសចរឲ្យបានប្រមាណ ៣០ លាននាក់។
«សម្រាប់ឆ្នាំក្រោយនឹងមានកម្មវិធីជាច្រើនដែលត្រូវរៀបចំឡើងដើម្បីទាក់ទាញភ្ញៀវទេសចរឱ្យមកទស្សនាប្រទេសម៉ាឡេស៊ីឱ្យបានកាន់តែច្រើន ដើម្បីឈានដល់គោលដៅ ៣០ លាននាក់ ហើយនិងមានផលិតផលថ្មីៗជាច្រើន ដើម្បីបំពេញតម្រូវការជាក់លាក់របស់ភ្ញៀវទេសចរកម្ពុជាដូចជាការដើរទិញទំនិញ ការទៅទស្សនាតំបន់ឆ្នេរ កីឡាវាយកូនគោល ការថែរក្សាសុខភាព ឬអាជីវកម្មជាដើម»។
លោកស្រី រដ្ឋា បន្ថែមថា៖ «សម្រាប់ទីផ្សារកម្ពុជា យើងនឹងចាប់ផ្តើម «យុទ្ធនាការទស្សនាប្រទេស ម៉ាឡេស៊ី ឆ្នាំ ២០២០» នៅក្នុងព្រឹត្តិការណ៍ Cambodia Travel Mart ចាប់ពីថ្ងៃទី ១១-១៣ ខែ តុលា ឆ្នាំ ២០១៩ ហើយក្នុងពេលជាមួយគ្នានេះដែរ យើងនឹងចែកចាយស្ទីកឃ័ររថយន្ត កម្មវិធីសំណួរចម្លើយ និងសកម្មភាពជាច្រើនទៀតក្នុងការសហការជាមួយភ្នាក់ងារទេសចរណ៍ និងប្រព័ន្ធផ្សព្វផ្សាយ»។
លោកស្រី រដ្ឋា សាទរចំពោះយុទ្ធនាការទស្សនាប្រទេស ម៉ាឡេស៊ី ឆ្នាំ ២០២០ នេះហើយគណៈកម្មាធិការទេសចរណ៍កំពុងមមាញឹកក្នុងការរៀបចំដើម្បីធានាថាវានឹងផ្តល់ក្តីរំភើបរីករាយមិនអាចបំភ្លេចបានសម្រាប់ភ្ញៀវទេសចរ។
«មានផលិតផល និងសេវាកម្មថ្មីៗដ៏រំភើបរីករាយជាច្រើនក្នុងអំឡុងពេលស្នាក់នៅរបស់ពួកគេជាមួយនឹងតម្លៃសមរម្យ។ ដើម្បីលើកកម្ពស់រឿងនេះ យើងគ្រោងរៀបចំកម្មវិធី Mega Fam ដ៏ធំសម្រាប់ប្រព័ន្ធផ្សព្វផ្សាយកម្ពុជា អ្នកសរសេរប្លុក និងអ្នកដែលនៅក្នុងឧស្សាហកម្មទេសចរណ៍»។
លោកស្រី រដ្ឋា បន្ថែមថា៖ «យើងរីករាយនៅក្នុងការបង្ហាញប្រទេសម៉ាឡេស៊ីដែលមានលក្ខណៈចម្រុះនៃវប្បធម៌ ប្រជាជន ម្ហូបអាហារ ធម្មជាតិ ហើយពិតណាស់ ប្រជាជន ម៉ាឡេស៊ី គឺមានភាពរួសរាយរាក់ទាក់»៕
