កោះ និងឆ្នេរនៅម៉ាឡេស៊ីផ្តល់សកម្មភាពដ៏រំភើបសម្រាប់អ្នកស្រឡាញ់ធម្មជាតិ ។
ប្រទេស ម៉ាឡេស៊ី កំពុងក្លាយជាគោលដៅទេសចរណ៍ដ៏ពេញនិយមសម្រាប់ពលរដ្ឋកម្ពុជា ខណៈប្រទេសនេះបានមើលឃើញពីកំណើនយ៉ាងខ្លាំងនៃចំនួនភ្ញៀវទេសចរកម្ពុជាកាលពីឆ្នាំមុន។
ភ្ញៀវទេសចរកម្ពុជាសរុបចំនួន ៩០ ០៤២ នាក់ បានទៅទស្សនាប្រទេសម៉ាឡេស៊ីកាលពីឆ្នាំ ២០១៨ កើនឡើងចំនួន ១១៤,៤ ភាគរយ ធៀបនឹងឆ្នាំ ២០១៧។ ភ្ញៀវទេសចរកម្ពុជាកំពុងបន្តកើនឡើងនៅក្នុងឆ្នាំនេះដោយគិតពីខែមករាដល់ខែឧសភា ភ្ញៀវទេសចរកម្ពុជាចំនួន ៤៣ ២២១ នាក់ បានទៅទស្សនាប្រទេសម៉ាឡេស៊ីពោលគឺកើនឡើង ១៩,៤ ភាគរយ ធៀបទៅនឹងរយៈពេលដូចគ្នាកាលពីឆ្នាំមុន។
នាយកប្រតិបត្តិក្រុមហ៊ុន Mekong Discovery Co Ltd លោក Kelvin Tan បានឲ្យកាសែតភ្នំពេញប៉ុស្តិ៍ដឹងថា មានសក្តានុពលដ៏ធំសម្រាប់វិស័យទេសចរណ៍ទៅក្រៅប្រទេសនៅកម្ពុជា ខណៈដែលប្រជាជនកម្ពុជាជាច្រើននៅមិនធ្លាប់បានធ្វើដំណើរទៅក្រៅប្រទេសពីមុន។ និន្នាការនៃការកើនឡើងចំនួនភ្ញៀវទេសចរកម្ពុជាទៅក្រៅប្រទេសនេះ គឺដោយសាតែប្រជាជនមានចំណូលមធ្យមកើនឡើង ហើយប្រទេស ម៉ាឡេស៊ី ក៏អាចទាញយកប្រយោជន៍អំពីកំណើននេះ។
កាលពីឆ្នាំមុនភ្ញៀវទេសចរកម្ពុជាចេញទៅដើរលេងក្រៅប្រទេសមានចំនួន ១ ៩៩៥ ៤៩៩ នាក់ ពោលគឺកើនឡើងចំនួន ១៣,៩ ភាគរយ បើធៀបនឹងឆ្នាំ ២០១៧ ដែលមានភ្ញៀវទេសចរកម្ពុជាចំនួន ១ ៧៥២ ២៦៩ នាក់បានទៅលេងក្រៅប្រទេស។ ចាប់ពីខែមករាដល់ខែមេសាក្នុងឆ្នាំ ២០១៩ នេះភ្ញៀវទេសចរកម្ពុជាចំនួន ៦៦០ ៣៦៤ នាក់បានធ្វើដំណើរទៅក្រៅប្រទេស។
យោងតាមរបាយការណ៍មួយបានឲ្យដឹងថា កម្ពុជា និងម៉ាឡេស៊ី បានព្រមព្រៀងបង្កើតក្រុមជំនាញមួយសម្រាប់កិច្ចសហប្រតិបត្តិការទេសចរណ៍។ ប្រទេសទាំង ២ ក៏គ្រោងនឹងចុះអនុស្សរណៈនៃការយោគយល់គ្នាស្តីពីវិស័យទេសចរណ៍នៅក្នុងដំណើរទស្សនកិច្ចរបស់នាយករដ្ឋមន្ត្រីម៉ាឡេស៊ី លោក ម៉ាហាធៀ ម៉ហាម៉ាដ មកកាន់ប្រទេសកម្ពុជានៅដើមខែកញ្ញាផងដែរ។
ថ្លែងអំពីភ្ញៀវទេសចរបរទេសមកទស្សនាប្រទេសកម្ពុជាលោក Tan បានលើកឡើងថាព្រះរាជាណាចក្រកម្ពុជាកំពុងមានប្រជាប្រិយភាពជាគោលដៅទេសចរណ៍រយៈពេលខ្លីសម្រាប់ភ្ញៀវទេសចរមកពីប្រទេសចិន។ «តាមដែលខ្ញុំដឹង ប្រទេស កម្ពុជា គឺជាប្រទេសមួយក្នុងចំណោមប្រទេសមួយចំនួននៅក្នុងតំបន់ដែលផ្តល់ទិដ្ឋាការពេលមកដល់សម្រាប់ភ្ញៀវទេសចរបរទេសដែលមកទស្សនាកម្ពុជា។ គុណសម្បត្តិមួយទៀតដែលជួយទាក់ទាញភ្ញៀវទេសចរបរទេសគឺមន្ត្រីអន្តោប្រវេសន៍កម្ពុជាធ្វើការមានប្រសិទ្ធភាព ហើយដំណើរការផ្តល់ទិដ្ឋាការមានភាពឆាប់រហ័ស បើធៀបទៅនឹងប្រទេសដទៃទៀតដែលផ្តល់សេវាកម្មដូចគ្នា»។
លោកបានបញ្ជាក់ថា៖ «ដោយមើលឃើញពីភាពងាយស្រួលក្នុងការធ្វើដំណើរមកប្រទេសកម្ពុជា ភ្នាក់ងារទេសចរណ៍ទៅក្រៅប្រទេសនៅក្នុងប្រទេសចិន កំពុងបង្កើនទេសចរណ៍ជាក្រុមមកកាន់កម្ពុជា។ ប្រតិបត្តិករទេសចរណ៍អាចបន្តទទួលបានការកក់កញ្ចប់ទេសចរណ៍ពីអតិថិជនរហូតដល់ ២-៣ ថ្ងៃចុងក្រោយមុនពេលចេញដំណើរ»។
ការកើនឡើងគួរឱ្យកត់សម្គាល់នៃភ្ញៀវទេសចរចិនមកកម្ពុជាគឺបានចាប់ផ្តើមតាំងពី ៥ ឆ្នាំមុនម្ល៉េះដែលគាំទ្រដោយគំនិតផ្តួចផ្តើមគម្រោង «ផ្លូវមួយ ខ្សែក្រវាត់មួយ» របស់រដ្ឋាភិបាលចិនដែលពលរដ្ឋចិនត្រូវបានលើកទឹកចិត្តឱ្យធ្វើការវិនិយោគ និងបង្កើតអាជីវកម្មនៅបរទេស។
លោកបានបន្ថែមថា ដើម្បីទទួល និងស្វាគមន៍ភ្ញៀវទេសចរចិនកម្ពុជាបានអនុវត្តកម្មវិធីស្តីពីការត្រៀមលក្ខណសម្បត្តិទទួលទេសចរចិន «China Ready» សម្រាប់វិស័យទេសចរណ៍ពាក់ព័ន្ធនឹងអាជីវកម្ម។ នៅក្រោមកម្មវិធីនេះបុគ្គលិកសណ្ឋាគារ និងប្រតិបត្តិករទេសចរណ៍ត្រូវបានផ្តល់ការបណ្តុះបណ្តាលជាពិសេសវគ្គសិក្សាភាសាចិនដើម្បីជួយពួកគេក្នុងការផ្តល់សេវាកម្មឲ្យកាន់តែប្រសើរដល់ភ្ញៀវទេសចរចិន។
ម្យ៉ាងវិញទៀតលោក Tan លើកឡើងថាការហូរចូលនៃភ្ញៀវទេសចរចិនក៏បង្កើតឲ្យមានសេវាកម្មទេសចរណ៍ប្រភេទ Zero-Dollar Tour កាន់តែច្រើនផងដែរ។ ប្រតិបត្តិករទេសចរណ៍ប្រភេទ Zero-Dollar Tour រៀបចំដំណើរទេសចរណ៍ដោយមិនគិតប្រាក់កម្រៃ ប៉ុន្តែពួកគេនាំភ្ញៀវទៅកន្លែងដែលលក់របស់របរថ្លៃហួសហេតុ ដូចជាកន្លែងលក់វត្ថុអនុស្សាវរីយ៍ ម្ហូបអាហារ និងកន្លែងស្នាក់នៅជាដើមដើម្បីយកកម្រៃជើងសា។
លោកថ្លែងថា៖ «ពួកគេគួរតែជួលប្រតិបត្តិករទេសចរណ៍ដែលបានចុះបញ្ជីត្រឹមត្រូវដើម្បីជាការធានាសុវត្ថិភាព និងគុណភាពនៃសេវាកម្មនៅពេលពួកគេធ្វើដំណើរ»៕
