តន្ដ្រីករ ៤​នាក់ ស្លាប់​របួស ៩ ក្នុង​គ្រោះថ្នាក់​ចរាចរ


កំពង់ចាមៈ សិល្បករ​នៃ​វង់​ភ្លេង​សម័យ​ដើរ​ត្រាច់ចរ​តាម​រោងការ​ចំនួន ៤​នាក់ បាន​ស្លាប់​និង ៩ នាក់​ទៀត​បាន​រង​របួស​ធ្ងន់​ស្រាល​ក្នុង​ឧបទ្ទវហេតុ​គ្រោះថ្នាក់​ចរាចរណ៍​រថយន្ត​បុក​គ្នា​កាល​ពី​រំលង​អាធ្រាត្រ​យប់​ថ្ងៃ​អាទិត្យ​ឆ្លង​ចូល​ថ្ងៃ​ចន្ទ នៅ​លើ​កំណាត់​ផ្លូវ​ជាតិ​លេខ ៧១ ក្នុង ភូមិ​ដូនធី ឃុំ​បុសខ្នុរ ស្រុក​ចម្ការលើ ខេត្ត​កំពង់ចាម។

លោក លឹម សុធី អធិការ​រង​នគរបាល ស្រុក​ចម្ការលើ ទទួល​បន្ទុក​ផ្នែក​សណ្តាប់ធ្នាប់​បាន​ឲ្យ​ដឹង​ថា ជន​រងគ្រោះ​មាន​ឈ្មោះ ស៊ុន ឌីណា ភេទ​ប្រុស អាយុ ២៧​ឆ្នាំ មាន​លំនៅ​ក្នុង ភូមិ-ឃុំ កោះ​សំរោង ស្រុក​កំពង់សៀម ខេត្ត​កំពង់ចាម ជា​តៃកុង​ឡាន​និង​ម្ចាស់​អក​កាដង់ និង​ស្ត្រី​អ្នក​ចម្រៀង ឈ្មោះ ស្រី យ៉ាន អាយុ ២៥​ឆ្នាំ នៅ ទីក្រុង​ភ្នំពេញ និង​ឈ្មោះ ស្រី ហ៊ីន អាយុ ២៨​ឆ្នាំ រស់​នៅ ស្រុក​ឆ្លូង ខេត្ត​ក្រចេះ បាន​ស្លាប់​ភ្លាម​នៅ​នឹង​កន្លែង​កើត​ហេតុ​តែ​ម្តង ហើយ​ម្នាក់​ទៀត​បាន​ស្លាប់​ពេល​ដឹក​ទៅ​កាន់​មន្ទីរពេទ្យ​ខេត្ត​ខណៈ​អ្នក​រួម​ដំណើរ ៦​នាក់ រង​របួស​ធ្ងន់ និង ២ នាក់​រង​របួស​ស្រាល​ត្រូវ​បញ្ជូន​ទៅ​សង្គ្រោះ។

លោក​បន្ត​ថា៖ «គ្រោះថ្នាក់​នេះ​មក​ពី​ពួក​គេ​បើកបរ​មិន​ប្រុង​ប្រយ័ត្ន។ សមត្ថកិច្ច​ជំនាញ​យើង​ពិនិត្យ​វាស់វែង​នៅ​កន្លែង​កើត​ហេតុ​សន្និដ្ឋាន​ថា មក​ពី​ភាគី​ទាំង ២ បើក​ល្បឿន​លឿន ហើយ​ចាំង​ភ្លើង​ហ្វា​ដាក់​គ្នា​ទើប​បាន​ជួប​គ្រោះថ្នាក់​គួរ​ឲ្យ​រន្ធត់​បែប​នេះ»។

លោក​អធិការ​រង​បន្ត​ថា គ្រោះថ្នាក់​ចរាចរណ៍​នេះ​កើត​ឡើង​ម៉ោង ១:៤៥ នាទី​រំលង​អាធ្រាត្រ​ឆ្លង​ចូល​ថ្ងៃ​ចន្ទ នៅ​លើ​បណ្តោយ​ផ្លូវ​លេខ ៧១ នៅ​ក្នុង ភូមិ​ដូនធី ឃុំ​បុសខ្នុរ ស្រុក​ចម្ការលើ ខេត្ត​កំពង់ចាម ដែល​មាន​រថយន្ត​ក្រុម​វង់​តន្រ្តី​សម័យ​ម៉ាក​កូរ៉េ​ពណ៌​ស ពាក់​ស្លាក​លេខ ភ្នំពេញ 2C- 2624 ចេញ​ពី​ជើង​ទៅ​ត្បូង​បាន​បុក​ជាមួយ​នឹង​រថយន្ត​មួយ​ទៀត​ម៉ាក​កូរ៉េ​ពណ៌​ស ភ្លៅ ៥ ពាក់​ស្លាក​លេខ​ភ្នំពេញ 3B- 8792 ដែល​បើក​បញ្ច្រាស​ទិស​គ្នា។

លោក​ប្រាប់​ឲ្យ​ដឹង​ទៀត​ថា ករណី​គ្រោះថ្នាក់​នោះ ខាង​ភាគី​រថយន្ត​ដឹក​អ្នក​ចម្រៀង តៃកុង​ត្រូវ​កៀប​ស្លាប់​ក្នុ​ង​កាប៊ីន រីឯ​ខាង​រថយន្ត​ធំ​ក៏​ដូច​គា្ន​ដែរ​​តែ​ត្រឹម​រង​របួស​ធ្ងន់ ហើយ​អ្នក​រង​របួស​ទាំង​អស់​ត្រូវ​បាន​ដឹក​ទៅ​សង្គ្រោះ​នៅ​មន្ទីរពេទ្យ​បង្អែក ខេត្ត​កំពង់ចាម ទាំង​កណ្តាល​អាធ្រាត្រ។

លោក​បញ្ជាក់​ទៀត​ថា គ្រោះថ្នាក់​នេះ​មិន​ទាន់​ដឹង​ថា ខាង​ណា​ខុស​ខាង​ណា​ត្រូវ​នៅ​ឡើយ​ទេ ព្រោះ​រថយន្ត​ទាំង ២ គ្រឿង​បុក​គ្នា​ធ្លាក់​ពី​ផ្លូវ​កៅស៊ូ​ខ្ទាត​ទៅ​ក្រោម​ថ្នល់ ១០ ម៉ែត្រ​រៀងៗ​ខ្លួន​ឯណោះ។ ឥឡូវ​រថយន្ត​ទាំង ២ គ្រឿង​ត្រូវ​សមត្ថកិច្ច​ស្ទូច​យក​ទៅ​រក្សា​ទុក​នៅ​អធិការដ្ឋាន​នគរបាល ស្រុក​ចម្ការលើ ដើម្បី​ទុក​ដោះស្រាយ​តាម​ផ្លូវ​ច្បាប់។

លោក ខន រ៉ាដែត អ្នក​បើក​រថយន្ត​សង្គ្រោះ​នៃ​មន្ទីរពេទ្យ ខេត្ត​កំពង់ចាម ដែល​ដឹក​អ្នក​របួស​ផ្ទាល់​បាន​ឲ្យ​ដឹង​ថា អ្នក​របួស​ក្នុង​គ្រោះថ្នាក់​នេះ​មាន​ខ្លះ​បាក់​ជើង បែក​ក្បាល និង​រយះ​ដាច់​ដៃ​ជើង ហើយ​ក្នុង​នោះ​ស្រ្តី​ម្នាក់​បាន​ស្លាប់​ពេល​ដឹក​ទៅ​ដល់​មន្ទីរពេទ្យ​តែ​លោក​មិន​ស្គាល់​ឈ្មោះ​គាត់​ទេ។

ក្រុម​អ្នក​រង​របួស​មិន​អាច​ទាក់ទង​សួរ​បញ្ជាក់​ពី​ហេតុការណ៍​ដ៏​រន្ធត់​នេះ​បាន​ទេ កាល​ពី​ម្សិលមិញ៕

ព័ត៌មានថ្មីៗ