បុរស​បែលហ្ស៊ិក​ជាប់​សង្ស័យ​ក្នុង​រឿង​ឃាតកម្ម​ស្ត្រី​ទេសចរ​បារាំង​ត្រូវ​ដោះលែង​នៅ​ក្រៅ​ឃុំ


20140507_10c
លោក Oliver ត្រូវសាលាឧទ្ធរណ៍ដោះលែងឲ្យនៅក្រៅឃុំ សហការី

ភ្នំពេញៈ បុរស​ជាតិ បែលហ្ស៊ិក ម្នាក់​ដែល​សាលា​ដំបូង ខេត្ត​កំពត ឃុំ​ខ្លួន​បណ្តោះ​អាសន្ន​ជាង​មួយ​ឆ្នាំ​ពាក់​ព័ន្ធ​ឃាតកម្ម​លើ​ស្រ្តី​ទេសចរ​ជនជាតិ បារាំង កាល​ពី ខែ​កុម្ភៈ ឆ្នាំ​២០១៣ ត្រូវ​សភា​ស៊ើប​សួរ​សាលា​ឧទ្ធរណ៍​សម្រេច​ដោះលែង​ឲ្យ​នៅ​ក្រៅ​ឃុំ​បណ្តោះ​អាសន្ន បន្ទាប់​ពី​មេធាវី​ស្នើ​សុំ ២ លើក។

លោក ឃុន សុផល មេធាវី​ការពារ​ជន​សង្ស័យ​ជាតិ បែលហ្ស៊ិក ប្រាប់​ថា កូន​ក្តី​លោក​ឈ្មោះ Oliver អាយុ ៤១​ឆ្នាំ ជនជាតិ បែលហ្ស៊ិក ដែល​ត្រូវ​សាលា​ដំបូង ខេត្ត​កំពត ដាក់​ឃុំ​ក្នុង​ពន្ធនាគារ ជាង​មួយ​ឆ្នាំ​ហើយ​នោះ​ត្រូវ​បាន​សភា​ស៊ើប​សួរ​សាលា​ឧទ្ធរណ៍​ដោះលែង​ឲ្យ​គាត់​នៅ​ក្រៅ​ឃុំ​ហើយ កាល​ពី​ពាក់​កណ្តាល ខែ​មេសា ម៉្លេះ។

លោក​ឲ្យ​ដឹង​ថា ការ​សម្រេច​ដោះលែង​កូន​ក្តី​លោក​នេះ​ក៏​ព្រោះ​តែ​ខាង​សភា​ស៊ើប​សួរ​សាលា​ឧទ្ធរណ៍​មិន​បាន​រក​ឃើញ​ភ័ស្តុតាង​ណា​មួយ​ដើម្បី​ដាក់​បន្ទុក​លើ​កូន​ក្តី​លោក។

លោក​មេធាវី​បន្ត​ថា៖ «យើង​ព្យាយាម​ដាក់​ពាក្យ​ស្នើ​សុំ​ឲ្យ​គាត់​នៅ​ក្រៅ​ឃុំ​មក​សាលា​ឧទ្ធរណ៍ ២ លើក​ហើយ​លើក​ចុង​ក្រោយ​យើង​បាន​ជោគជ័យ។ ខ្ញុំ​គិត​ថា តុលាការ​ផ្តល់​យុត្តិធម៌​ដល់​យើង ហើយ​កូន​ក្តី​ខ្ញុំ​នឹង​ចូល​ខ្លួន​នៅ​រាល់​ពេល​ដែល​តុលាការ​ហៅ​គាត់»។

លោក ហុង សុគុណវឌ្ឍនា ចៅក្រម​សាលា​ដំបូង ខេត្ត​កំពត ដែល​កាន់​សំណុំ​រឿង​នេះ​កាល​ពី​ម្សិលមិញ​បាន​ឲ្យ​ដឹង​ថា ថ្វី​ដ្បិត​តែ​បុរស​សង្ស័យ​ជាតិ បែលហ្ស៊ិក នោះ​ស្ថិត​នៅ​ក្រៅ​ឃុំ​ហើយ​សំណុំ​រឿង​នៃ​ការ​ស៊ើប​សួរ​បាន​បិទ​មែន​តែ​ប្រសិន​បើ​មាន​ភ័ស្តុតាង​និង​សាក្សី​បំភ្លឺ​ថ្មី​ទៀត នីតិវិធី​ឯ​ការ​ស៊ើប​សួរ​នឹង​ដំណើរការ​បន្ត​ដដែល។

គួរ​រំឭក​ថា ស្រ្តី​រងគ្រោះ​ជនជាតិ បារាំង ឈ្មោះ Ophelie អាយុ ២៥​ឆ្នាំ ជា​អ្នក​ទេសចរ​ដែល​បាន​ចូល​ស្នាក់នៅ​ផ្ទះ​សំណាក់ Les Manguiers និង​ត្រូវ​បាន​គេ​ឃើញ​នាង​ជិះ​កង់​ចេញ​តែ​ម្នាក់​ឯង ហើយ​ក៏​បាត់​ខ្លួន​រហូត​ដល់​គេ​ប្រទះ​ឃើញ​សព​ត្រូវ​គេ​វាយ​ស្លាប់​អណ្តែត​ទឹក ដោយ​មាន​ស្នាម​ដាច់​រយះ​ក្បាល​និង​ដៃ។ ក្រោយ​មក​ជន​សង្ស័យ​ឈ្មោះ Oliver អាយុ ៤១​ឆ្នាំ ជា​ជនជាតិ បែលហ្ស៊ិក ដែល​បើក​ហាង​នៅ ក្រុង​កំពត ត្រូវ​បាន​នគរបាល​ខេត្ត​ចាប់​ឃាត់​ខ្លួន​នៅ​ផ្ទះ​របស់​គាត់​និង​ឃុំ​ខ្លួន​ក្នុង​ពន្ធនាគារ ហើយ​ត្រូវ​សាលា​ដំបូង​កោះ​ហៅ​សាកសួរ​ជាច្រើន​លើក​មាន​ទាំង​សាក្សី​ខាង​ជន​រងគ្រោះ​និង​ទាំង​ខាង​ជន​សង្ស័យ​ផង។

លោក Oliver ដែល​ទើប​ត្រូវ​បាន​ដោះលែង​ឲ្យ​នៅ​ក្រៅ​ឃុំ​មិន​អាច​ទាក់​ទង​បាន​ទេ កាល​ពី​ម្សិលមិញ៕

ព័ត៌មានថ្មីៗ