ការស្រឡាញ់ខ្លួនឯងជាការគិតគូរ និងផ្គត់ផ្គង់តម្រូវការខ្លួនជាចម្បង។
ក្រុងឡុងដ៍: ដំណឹងល្អសម្រាប់អ្នកដែលចូលចិត្តធ្វើល្អចំពោះខ្លួនឯង។ អ្នកស្រាវជ្រាវក៏បានណែនាំថា ការផ្ដល់ឲ្យខ្លួនឯងនូវក្ដីស្រឡាញ់មិនត្រឹមតែល្អដល់សុខភាពផ្លូវចិត្តប៉ុណ្ណោះទេ ថែមទាំងប្រសើរដល់ផ្លូវកាយថែមទៀតផង។
ការសិក្សានៅសាកលវិទ្យាល័យ Exeter និង Oxford បានតាមដាននិស្សិត ១៣៥ នាក់ដោយបែងចែកជាក្រុមស្រឡាញ់ខ្លួនឯង និងក្រុមមិនសូវអើពើនឹងខ្លួនឯង។
ការស្រឡាញ់ខ្លួនឯងគឺជាការចំណាយ ផ្គត់ផ្គង់តម្រូវការផ្ទាល់ខ្លួនមានជំនឿចិត្តលើខ្លួន និងផ្ដល់តម្លៃឲ្យខ្លួនឯង ដោយមិនខ្វាយខ្វល់ពីទស្សនៈអ្នកដទៃ។
វេជ្ជបណ្ឌិត Anke Karl សាស្ត្រាចារ្យជាន់ខ្ពស់ផ្នែកចិត្តវិទ្យាដែលដឹកនាំការសិក្សានេះបានឲ្យដឹងថា៖ «ការយល់យើញរបស់ខ្ញុំគឺថាមនុស្សដែលងាយនឹងប្រឈមការបាក់ទឹកចិត្តតែងតែរងឥទ្ធិពលពីគំនិតអវិជ្ជមាន និងមានការបារម្ភគិតគូរពីអ្នកដទៃច្រើនមិនសូវខ្វល់ពីខ្លួនឯង»។
ក្រុមដែលស្រឡាញ់ខ្លួនឯង និងមិនសូវខ្វល់ពីអ្នកដទៃបានបង្ហាញសញ្ញានឹងនរផ្នែកអារម្មណ៍មានចង្វាក់បេះដូងលោតទាបថេរ និងមិនសូវបែកញើស។ យ៉ាងណាមិញសញ្ញាទាំងនេះមិនអាចបង្ហាញពីទំនាក់ទំនងរវាងការស្រឡាញ់ខ្លួនឯង និងស្ត្រេសដែលជាផ្នែកមួយនៃហានិភ័យនៃជំងឺបាក់ទឹកចិត្តនោះទេ។ ការសិក្សានេះក៏តាមដានតែនិស្សិតមានសុខភាពល្អ។
ដូច្នេះហើយក្រុមអ្នកវិទ្យាសាស្ត្រគ្រោងនឹងធ្វើការសិក្សាទ្រង់ទ្រាយធំ និងពិសោធតាមដានឲ្យទូលំទូលាយលើមនុស្សច្រើនជាងនេះ ដើម្បីបញ្ជាក់ឲ្យដឹងថា តើការស្រឡាញ់ខ្លួនឯងពិតជាជួយដល់សុខភាពផ្លូវកាយ និងចិត្តខ្លាំងកម្រិតណា?
