ការនាំចេញរ៉ែកម្ររបស់ចិនធ្លាក់ចុះ ១៦% ក្នុងគ្រាដែលមានការបង្កើនការផ្ដោតការយកចិត្តទុកដាក់លើការអភិរក្សធនធានក្នុងស្រុក និងការអភិវឌ្ឍរ៉ែគុណភាពខ្ពស់។ សហការី
ក្រុងប៉េកាំងៈ ក្រុមមន្ដ្រី និងអ្នកជំនាញបានឲ្យដឹងថា ចិនដែលជាប្រទេសផលិតរ៉ែកម្រឈានមុខគេក្នុងពិភពលោក បានមើលឃើញការធ្លាក់ចុះ ១៦ ភាគរយ ក្នុងការនាំចេញរ៉ែកម្រកាលពីខែឧសភា ក្នុងគ្រាដែលមានការបង្កើនការផ្ដោតការយកចិត្តទុកដាក់លើការអភិរក្សធនធានក្នុងស្រុក និងការអភិវឌ្ឍរ៉ែគុណភាពខ្ពស់។
យោងតាមអគ្គរដ្ឋបាលគយ ការនាំចេញរ៉ែកម្រដោយប្រទេស ចិន បានធ្លាក់ចុះមកនៅត្រឹម ៣ ៦៤០ តោន កាលពីខែឧសភា ធៀបនឹង ៤ ៣២៩ តោនកាលពីខែមេសា។ ក្នុងរយៈពេល ៥ ខែដំបូង ប្រទេស ចិន បាននាំចេញរ៉ែកម្រ ១៩ ២៦៦,៨ តោន ធ្លាក់ចុះ ៧,២ ភាគរយធៀបនឹងរយៈពេលដូចគ្នានៅក្នុងរយៈពេល ៥ ខែដំបូងឆ្នាំមុន។
លោក Cui Fan សាស្ដ្រាចារ្យនៅសាកលវិទ្យាល័យពាណិជ្ជកម្ម និងសេដ្ឋកិច្ចអន្តរជាតិ បានថ្លែងថា៖ «ការធ្លាក់ចុះការនាំចេញរ៉ែកម្ររបស់ចិន គឺដោយសារតែការអភិរក្សធនធានក្នុងស្រុក និងការការពារបរិស្ថាន ហើយវាស្របជាមួយនឹងតម្រូវការលើកកម្ពស់ការអភិវឌ្ឍប្រកបដោយគុណភាពខ្ពស់របស់ចិន»។
លោក Cui ឲ្យដឹងថា ភាពតានតឹងផ្នែកពាណិជ្ជកម្មកាន់តែខ្លាំងឡើងរវាងប្រទេស ចិន និងអាមេរិក ក៏បានធ្វើឲ្យមានផលប៉ះពាល់អវិជ្ជមានលើចង្វាក់ផ្គត់ផ្គង់ពិភពលោកផងដែរ ជាពិសេសលើទំនិញប្រើប្រាស់ ដូចជាប្រេងឆៅ សណ្ដែកសៀង និងរ៉ែកម្រ។
លោក Cui បន្ថែមថា៖ «ការពឹងផ្អែកយ៉ាងខ្លាំងរបស់ទីផ្សារជាច្រើនលើការផ្គត់ផ្គង់របស់ប្រទេស ចិន បានធ្វើឲ្យអស់រ៉ែក្នុងប្រទេស និងបានបណ្ដាលមានផលប៉ះពាល់ដល់បរិស្ថាន។ ដល់ពេលវេលាសម្រាប់ពួកគេក្នុងការបង្កើនការផ្គត់ផ្គង់ពីប្រទេសផលិតផ្សេងទៀត ដូចជារុស្ស៊ី ហ្គ្រោអង់ឡង់ (Greenland) និងបណ្ដាប្រទេសអាហ្វ្រិកមួយចំនួនទៀត ដើម្បីឆ្លើយតបតម្រូវការរបស់ពួកគេហើយ»៕ People''s Daily/LA
