ភ្នំពេញៈ ការនាំចេញសម្លៀកបំពាក់វាយនភណ្ឌ និងស្បែកជើង (GTF) របស់កម្ពុជាក្នុងរយៈពេល ៩ ខែ ឆ្នាំ ២០១៩ កើនឡើង ១៣ ភាគរយ ធៀបរយៈពេលដូចគ្នាកាលពីឆ្នាំទៅ។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
របាយការណ៍បង្ហាញការនាំចេញផលិតផលក្នុងឧស្សាហកម្ម GTF នៅរយៈពេល ៩ ខែដំបូងឆ្នាំនេះកើនឡើង ១៣,១៨ ភាគរយ ឬជាង ៧,៩៧៣ ពាន់លានដុល្លារធៀបនឹងរយៈពេលដូចគ្នាកាលពីឆ្នាំមុន។
ក្នុងអំឡុងពេលនេះការនាំចេញទៅអាមេរិកមានប្រហែល ២,៥ ពាន់លានដុល្លារ ខណៈការនាំចេញទៅសហភាពអឺរ៉ុបមានចំនួន ២,៤ ពាន់លានដុល្លារ។ របាយការណ៍បង្ហាញថា ការនាំចេញទៅអង់គ្លេសមានប្រមាណ ៦៧០ លានដុល្លារជប៉ុន ៧១១ លានដុល្លារ រដ្ឋសមាជិកអាស៊ាន ១២១ លានដុល្លារ និងប្រទេសផ្សេងទៀត ១,៥ ពាន់លានដុល្លារ។ នេះបើតាមរបាយការណ៍នេះ។
លោក កាំង ម៉ូនីកា អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្ដិ៍កាលពីថ្ងៃអង្គារ ដែលយោងដល់ទិន្នន័យដែលធ្វើបច្ចុប្បន្នភាពថ្មីបំផុតបានពីគយការនាំចេញរបស់កម្ពុជាក្នុងរយៈពេល ៩ ខែដំបូងនៅតែធ្វើបានល្អប្រសើរ។ លោកថ្លែងថា៖ «ខ្ញុំអាចនិយាយថាខ្លួនអាស្រ័យលើកត្តាជាច្រើនរួមបញ្ចូលគ្នា។ ការបន្តធ្វើការងារយ៉ាងខ្លាំង និងវៃឆ្លាត និងការបន្តការកែទម្រង់ ដើម្បីអាចប្រកួតប្រជែងបាន»។
បើតាមលោក កាំង ម៉ូនីកា ដើម្បីទទួលបានទិន្នន័យច្បាស់លាស់ក្រុមហ៊ុននាំចេញទាំងអស់តម្រូវឲ្យចុះបញ្ជីក្នុងប្រព័ន្ធ REX របស់សហភាពអឺរ៉ុបដែលអនុញ្ញាតឲ្យក្រុមហ៊ុននាំចេញប្រកាសប្រភពដើមផលិតផលរបស់ពួកគេដោយខ្លួនឯងតាមរយៈសេចក្ដីប្រកាសប្រភពដើមនៅលើវិក្កយបត្រពាណិជ្ជកម្មរបស់ពួកគេដោយមិនចាំបាច់មានវិញ្ញាបនបត្របានពី MOC នោះទេ។
លោកបញ្ជាក់ថា៖ «បន្ទាប់មកពួកគេត្រូវតែធ្វើការប្រកាសការនាំចេញរបស់ពួកគេដល់ MOC ក្នុងរយៈពេល ១ ខែប៉ុន្តែរោងចក្រមួយចំនួន មិនបានធ្វើដូច្នេះទេ»។
លោកបន្តថា ដោយសារតែហេតុនេះហើយទើបធ្វើឲ្យទិន្នន័យកន្លងមកចេញដោយក្រសួងពាណិជ្ជកម្មបង្ហាញពីការធ្លាក់ចុះ។ លោកថ្លែងថា៖ «ដូច្នេះហើយទិន្នន័យរបស់ MOC ក្នុងរយៈពេល ៦ ខែដំបូងគឺទាប និងតម្លៃនាំចេញទៅសហភាពអឺរ៉ុបត្រូវបានមើលឃើញដោយមិនត្រឹមត្រូវ ដោយសារតែការធ្លាក់ចុះប្រហែល ៦ ភាគរយ»។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា កំណើនការនាំចេញនេះបានរួមចំណែកភាគច្រើនដល់ការកើនឡើងក្រុមវិនិយោគិនមកកម្ពុជាក្នុងរយៈពេលប៉ុន្មានឆ្នាំថ្មីៗនេះ។ លោកថ្លែងថា៖ «ភាគច្រើននៃរោងចក្រចិនមកកម្ពុជា វាបានជំរុញកំណើនការនាំចេញរបស់យើង វាជាសញ្ញាដ៏ល្អមួយថា សេដ្ឋកិច្ចប្រទេសនេះកំពុងរីកចម្រើនយ៉ាងរហ័ស»។
មូលនិធិរូបិយវត្ថុអន្តរជាតិ (IMF) កាលពីពាក់កណ្ដាលខែតុលាបានឲ្យដឹងថា ទោះបីជាហានិភ័យខាងក្រៅ និងភាពតានតឹងផ្នែកពាណិជ្ជកម្មបច្ចុប្បន្នរវាងប្រទេសមហាអំណាច ២ គឺអាមេរិក និងចិននៅតែមានជាពិសេសលទ្ធភាពការព្យួរប្រព័ន្ធអនុគ្រោះពន្ធ (EBA) ពីសហភាពអឺរ៉ុបក៏ដោយ ក៏កម្ពុជានៅតែមានកំណើនដ៏រឹងមាំនៅឆ្នាំនេះក្នុងចំនួន ៧ ភាគរយ។ IMF ឲ្យដឹងថា៖ «ចក្ខុវិស័យសេដ្ឋកិច្ចរបស់ប្រទេសកម្ពុជាគឺវិជ្ជមាន ទោះបីជាមានហានិភ័យធ្លាក់ចុះសំខាន់ៗក៏ដោយ។ បរិយាកាសម៉ាក្រូសេដ្ឋកិច្ចប្រកបដោយស្ថិរភាពប្រតិបត្តិការកំណើនដ៏រឹងមាំ និងការបន្តការកែទម្រង់រចនាសម្ព័ន្ធបានរួមចំណែកដល់ការរីកចម្រើនដ៏សំខាន់ឆ្ពោះទៅរកទិសដៅអភិវឌ្ឍន៍ប្រកបដោយចីរភាព»។
របាយការណ៍ឆ្នាំ ២០១៨ របស់ធនាគារជាតិនៃកម្ពុជាឲ្យដឹងថា ការនាំចេញសម្លៀកបំពាក់ និងស្បែកជើងរបស់ប្រទេសកម្ពុជាមានតម្លៃ ១០ ពាន់លានដុល្លារកើន ២៤ ភាគរយធៀបនឹង ៨ ពាន់លានដុល្លារកាលពីឆ្នាំ ២០១៧៕LA