ក្រុងម៉ាឌ្រីដៈ ទេសចរណ៍ពិភពលោកបានធ្លាក់ចុះនៅឆ្នាំ ២០១៩ ដោយសារការថមថយសេដ្ឋកិច្ចពិភពលោក ជាពិសេសនៅទ្វីបអឺរ៉ុប និងអាស៊ីជាទីដែលកើតមានភាពមិនប្រាកដប្រជាមានការទាក់ទងទៅនឹង Brexit ហើយបាតុកម្មក្នុងទីក្រុងហុងកុងក៏បានដាក់បន្ទុកដល់វិស័យទេសចរណ៍ផងដែរ។ នេះបើយោងតាមទីភ្នាក់ងារទេសចរណ៍របស់អង្គការសហប្រជាជាតិកាលពីថ្ងៃចន្ទ។
អង្គការទេសចរណ៍ពិភពលោក (UNWTO) ដែលមានមូលដ្ឋាននៅទីក្រុងម៉ាឌ្រីដបានឲ្យដឹងក្នុងសេចក្តីថ្លែងការណ៍មួយថា ចំនួនការមកដល់របស់ភ្ញៀវទេសចរអន្តរជាតិបានកើនឡើង ៤ ភាគរយ កាលពីឆ្នាំមុនដល់ ១,៥ ពាន់លាននាក់ ដែលជាអត្រាទាបបំផុតរបស់ខ្លួនគិតចាប់ពីឆ្នាំ ២០១៦ មក។
លោក Sandra Carvao ប្រធានផ្នែកប្រមូលព័ត៌មានរបស់អង្គការ UNWTO បានប្រាប់សន្និសីទសារព័ត៌មានមួយថា៖ «នេះគឺជាកំណើនមួយដែលយើងអាចចាត់ទុកថាជាកំណើនខ្លាំង ពីព្រោះវាស្ថិតក្នុងកម្រិតមធ្យមជាប្រវត្តិសាស្ត្រ ប៉ុន្តែយើងមើលឃើញការធ្លាក់ចុះតិចតួចធៀបនឹងរយៈពេល ២ ឆ្នាំចុងក្រោយ»។
ចំនួនភ្ញៀវទេសចរបានកើនឡើង ៦ ភាគរយ ក្នុងឆ្នាំ ២០១៨ និងកើនឡើង ៧ ភាគរយ នៅឆ្នាំ ២០១៧ ខណៈដែលអ្នកដើរលម្ហែកាយបានវិលទៅរកទិសដៅទេសចរណ៍ដែលមានពន្លឺថ្ងៃនៅតំបន់មេឌីទែរ៉ានេភាគខាងកើតដូចជាប្រទេស តួកកី និងអេហ្ស៊ីប បន្ទាប់ពីពួកគេស្ថិតនៅឆ្ងាយពីតំបន់ទាំងនេះអស់រយៈពេលប៉ុន្មានឆ្នាំ ដោយសារតែក្តីបារម្ភពីសន្តិសុខ។ ចំនួនភ្ញៀវទេសចរបានកើនឡើង ៤ ភាគរយ នៅឆ្នាំ ២០១៦។
អង្គការ UNWTO បានព្យាករថា ទេសចរណ៍ពិភពលោកនឹងកើនឡើងពី ៣ ទៅ ៤ ភាគរយ នៅឆ្នាំនេះដែលត្រូវបានគាំទ្រដោយព្រឹត្តិការណ៍កីឡា និងវប្បធម៌ធំៗនានាដូចជាកីឡាអូឡាំពិកក្រុងតូក្យូនៅប្រទេស ជប៉ុន ជាដើម។
លោក Carvao បានថ្លែងថា ការថមថយសេដ្ឋកិច្ចក្នុងទីផ្សារសំខាន់ៗជាច្រើនដូចជាអាល្លឺម៉ង់ និងការដួលរលំក្រុមហ៊ុនទេសចរណ៍ Thomas Cook ដែលជាក្រុមហ៊ុនទេសចរណ៍ដែលមានវ័យចំណាស់បំផុតក្នុងពិភពលោកបានចូលរួមចំណែកដល់ការធ្លាក់ចុះរបស់វិស័យនេះកាលពីឆ្នាំមុន។
អ្នកស្រីបានបន្ថែមថា ការចាកចេញរបស់ចក្រភពអង់គ្លេសពីសហភាពអឺរ៉ុប បានបង្កើតឲ្យមាន «ភាពមិនប្រាកដប្រជាខ្លាំង» និង «បានបង្កផលប៉ះពាល់ដល់សេដ្ឋកិច្ចរបស់ខ្លួនដែលបានប៉ះពាល់ដល់តម្លៃរូបិយប័ណ្ណរបស់ប្រទេសនេះ» ដែលបង្កឲ្យជនជាតិអង់គ្លេសកាន់តែតិចជាងមុនធ្វើដំណើរកម្សាន្តនៅក្រៅប្រទេស។
ការមកដល់របស់ភ្ញៀវទេសចរក្នុងទ្វីបអឺរ៉ុបបានកើនឡើង ៤ ភាគរយ ក្នុងឆ្នាំ ២០១៩ ធ្លាក់ចុះពីកំណើន ៦ ភាគរយ ក្នុងឆ្នាំ ២០១៨។
ទ្វីបអឺរ៉ុបនៅតែជាតំបន់ដែលមានមនុស្សទៅទស្សនាច្រើនបំផុតក្នុងពិភពលោកដែលមានចំណែក ៥១ ភាគរយ នៃការមកដល់របស់ភ្ញៀវទេសចរអន្តរជាតិកាលពីឆ្នាំមុន ឬស្មើនឹង ៧៤៣ លាននាក់។
ការមកដល់របស់ភ្ញៀវទេសចរក្នុងតំបន់អាស៊ីប៉ាស៊ីហ្វិកបានកើនឡើង ៥ ភាគរយ ធៀបនឹងកំណើន ៧ ភាគរយ នៅឆ្នាំ ២០១៨ ខណៈពេលដែលទីក្រុងហុងកុងរងគ្រោះដោយសារបាតុកម្ម៕ KC