កំណើន​សេដ្ឋកិច្ច​នឹង​រង​ផល​ប៉ះពាល់


130809_11
លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មកម្ពុជាថ្លែងក្នុងការបើកពិព័រណ៍គ្រឿងយន្តកាលពីថ្ងៃម្សិលមិញ ហេង ជីវ័ន

ភ្នំពេញៈ មន្ត្រី​ជាន់​ខ្ពស់​កម្ពុជា​បាន​ព្រមាន​ថា​កំណើន​សេដ្ឋកិច្ច​កម្ពុជា​នឹង​រង​ផល​ប៉ះពាល់​ពី​មាន​ភាព​វិកវរ​នយោបាយ​ក្រោយ​ពី​ការ​បោះឆ្នោត​នេះ។

លោក ចម ប្រសិទ្ធ រដ្ឋ​មន្ត្រី​ក្រសួង​ពាណិជ្ជកម្ម​បាន​ថ្លែង​ក្នុង​ឱកាស​បើក​ពិព័រណ៍ ឧស្សាហកម្ម​ប្រចាំ​ឆ្នាំ​ចំនួន​ពីរ​កាល​ពី​ថ្ងៃ​ម្សិលមិញ​ថា សេដ្ឋកិច្ច​កម្ពុជា និង​រក្សា​កំណើន​បាន​ដូច​ឆ្នាំ​កន្លង​ទៅ​បើ​គ្មាន​កលយុគ​កើត​ឡើង ក្រោយ​ថ្ងៃ​បោះឆ្នោត។

លោក​ថ្លែង​ថា៖ «សេដ្ឋកិច្ច​កម្ពុជា កំពុង​បាន​បន្ត​ទទួល​បាន​នូវ​កំណើន​ដ៏​ខ្ពស់​ក្នុង​ឆ្នាំ ២០១២ គឺ ៧,៦ ភាគរយ និង​ត្រូវ​គេ​រំពឹង​ថា​នឹង​កើន​ឡើង​ចំនួន​ប្រហាក់​ប្រហែល​នៅ​ឆ្នាំ ២០១៣ នេះ​បើ​សិន​ជា​គ្មាន​ការ​រំជើប​រំជួល​ក្រោយ​ការ​បោះឆ្នោត»។

លោក ចម ប្រសិទ្ធ ទំនង​ជា​ចង់​សំដៅ​ដល់​លទ្ធភាព​ដែល​អាច​កើត​មាន​ការ​ធ្វើ​មហា​បាតុកម្ម របស់​បក្ស​ប្រឆាំង​ជំទាស់​នឹង​លទ្ធផល​បោះឆ្នោត ដែល​នឹង​ឈាន​ទៅ​ដល់​អស្ថិរភាព​សង្គម និង​ធ្វើ​ឲ្យ​ប៉ះពាល់​ដល់​សេដ្ឋកិច្ច​ធ្ងន់​ធ្ងរ​។

លោក​បន្ត​ថា៖ «បើ​សិន​គេ​ចង់​បំផ្លាញ​សេដ្ឋកិច្ច គេ​ត្រូវ​ធ្វើ​បាតុកម្ម​ឲ្យ​ច្រើន​ដើម្បី​បំផ្លាញ​។ ដូច​យើង​ឃើញ​រួច​ហើយ កាល​ណា​មាន​បាតុកម្ម​មាន​អ្នក​ធ្វើ​បាតុកម្ម​ពិត​ប្រាកដ និង​អ្នក​ឆ្លៀត​ឱកាស​ពី​បាតុកម្ម។ អ្នក​ដែល​ទាមទារ​ធ្វើ​បាតុកម្ម​អត់​បាន​គិត​ដល់​ផល​នៃ​បាតុកម្ម​នោះ​ទេ។ កាល​ណា​បាតុកម្ម​បែក​មនុស្ស​ចូល​ប្លន់​តាម​ហាង»។

លោក​ថ្លែង​ថា៖ «គោលការណ៍​របស់​យើង​គឺ​រដ្ឋាភិបាល​ស្នើ​ឲ្យ​មាន​ស្ថិរភាព និង អំពាវនាវ​ឲ្យ​ដោះស្រាយ​ដោយ​សន្តិវិធី»។

លោក​លើក​ឡើង​ថា ការ​កើន​ឡើង​សេដ្ឋកិច្ច​ក្នុង​ពេល​កន្លង​មក ជា​លទ្ធផល​នៃ​តម្រូវ​ការ​ក្រៅ​ប្រទេស​កើន​ឡើង​និង​សក្តានុពល​សម្រាប់​ឱកាស​ធុរកិច្ច​នៅ​ក្នុង​ប្រទេស​មាន​ភាព​ទូលំ​ទូលាយ​។ លោក​បន្ត​ថា គោល​នយោបាយ​រដ្ឋាភិបាល​មិន​មែន​ផ្តោត​ទៅ​លើ​ទំនិញ​នាំ​ចេញ​តែ​មួយ​នោះ​ទេ ប៉ុន្តែ​គោល​នយោបាយ​ធ្វើ​ពិពិធកម្ម​ទំនិញ​នាំ​ចេញ​ឲ្យ​បាន​ច្រើន​ប្រភេទ។

លោក កង ច័ន្ទតារារ័ត្ន នាយក​វិទ្យាស្ថាន​សិក្សា​ការ​អភិវឌ្ឍ​កម្ពុជា បាន​និយាយ តាម​រយៈ​បទ​ពិសោធ​ដែល​ទទួល​បាន​ពី​ការ​បោះឆ្នោត​ក្នុង​អាណត្តិ​កន្លង​មក​ទំនុក​ចិត្ត​វិនិយោគិន​មាន​មិន​ខ្ពស់​ទេ​សម្រាប់​ទីផ្សារ​កម្ពុជា​។ លោក​បន្ត​ថា៖ «យើង​មើល​ឃើញ​តាំង​ពី​ដើម​ឆ្នាំ​មក ការ​វិនិយោគ​ពី​ក្រៅ​ប្រទេស​នៅ​ប្រទេស​របស់​យើង​មិន​ទាន់​មាន​សញ្ញា​ថា ជា​ក្តី​សង្ឃឹម [សម្រាប់​កំណើន​សេដ្ឋកិច្ច] នៅ​ឡើយ»។

លោក​បន្ថែម​ថា បើ​បញ្ហា​នយោបាយ​នៅ​តែ​បន្ត​បន្ទាប់​ពី​ការ​បោះឆ្នោត ការ​បញ្ជា​ទិញ​ផលិតផល​វាយនភ័ណ្ឌ​ពី​ទីផ្សារ​អាមេរិក​អាច​នឹង​ធ្លាក់​ចុះ ក្នុង​វិស័យ​កាត់ដេរ​នៅ​ក្នុង​ករណី​អាមេរិក​លូក​ដៃ​នៅ​ក្នុង​កិច្ចការ​នយោបាយ​ចុង​ក្រោយ​នេះ ព្រោះ​ទីផ្សារ​ធំ​របស់​កម្ពុជា​ពឹង​ទីផ្សារ​សហរដ្ឋ​អាមេរិក។

លោក​បន្ត​ថា៖ «ខ្ញុំ​ជឿ​ជាក់​ថា បើ​យើង​មិន​មាន​ភាព​កក់ក្តៅ​នៅ​ក្នុង​ទំនាក់​ទំនង​ការ​ទូត​ជាមួយ សហរដ្ឋ​អាមេរិក​ទេ​វា​អាច​ប៉ះពាល់​ដល់​ការ​អនុគ្រោះ​លើ​វិស័យ​កាត់ដេរ​របស់​យើង​។ វិស័យ​កាត់ដេរ​របស់​យើង​មិន​ទាន់​បាន​ទទួល​ការ​ប្រកួត​ក្នុង​ទីផ្សារ​អាមេរិក​ក្នុង​ស្ថានភាព​ពេញ​លេញ​ដូច​គេ​ដូច​ឯង​នៅ​ឡើយ​ទេ​ព្រោះ​យើង​ស្ថិត​ក្នុង​ប្រព័ន្ធ​អនុគ្រោះ​នៅ​ឡើយ»។

លោក​បន្ថែម​ថា ជំហរ​អាមេរិក​មាន​ឥទ្ធិពល​ដល់​សហភាព​អឺរ៉ុប​ផង​ដែរ​។ លោករ​ដ្ឋ​មន្ត្រី​បន្ត​ថា៖ «បើ​អាមេរិក​មិន​ត្រូវ សហគមន៍​អឺរ៉ុប​នឹង​ដើរ​តាម។ ពេល​នោះ​ហើយ​វា​ធ្វើ​ឲ្យ​អារម្មណ៍​អ្នក​វិនិយោគ​ក្នុង​វិស័យ​កាត់ដេរ មិន​ទាន់​កក់ក្តៅ​ទេ»។

លោក សុន ឆ័យ ប្រធាន​ក្រុម​អ្នក​តំណាង​រាស្ត្រ គណបក្ស​សង្គ្រោះ​ជាតិ​បាន​ថ្លែង​ថា វិស័យ​សំខាន់​នៃ​សេដ្ឋកិច្ច​ដូចជា​វិស័យ​ទេសចរណ៍ កសិកម្ម និង​វិស័យ​កាត់ដេរ។ លោក​ជឿ​ជាក់​ថា​កំណើន​អាច​នៅ​តែ​សម្រេច​បាន​ពី​អ្វី​ដែល​ព្យាករ​ដោយ​អ្នក​ជំនាញ។

លោក​បាន​បន្ត​ថា៖ «ប៉ុន្តែ​ស្ថិរភាព​របស់​កម្ពុជា​មិន​អាច​ជា​បញ្ហា​នោះ​ទេ សេដ្ឋកិច្ច​របស់​ប្រទេស​អាច​មាន​ភាព​ប្រសើរ​ឡើង​ប្រសិន​បើ​គណបក្ស​ប្រឆាំង​ឈ្នះ​ការ​បោះឆ្នោត ហើយ​កាន់​តំណែង​ក្នុង​រដ្ឋាភិបាល»។

លោក​បន្ត​ថា៖ «ដូច្នេះ​យើង​នឹង​ប្ដេជ្ញា​ចិត្ត​ប្រយុទ្ធ​ប្រឆាំង​អំពើ​ពុករលួយ​ប្ដេជ្ញា​ចិត្ត​លើ​ការ​ផលិត​កាន់​តែ​ល្អ​ប្រសើរ​ឡើង​។ គោល​នយោបាយ​របស់​គណបក្ស​ប្រជាជន​កម្ពុជា សេដ្ឋកិច្ច​របស់​រដ្ឋាភិបាល​ពឹង​លើ​ការ​នាំ​ចូល​ទំនិញ​និង​ពឹង​លើ​កម្ចី​ពី​ចិន»៕

ព័ត៌មានថ្មីៗ