យន្តហោះប្រភេទ A220 របស់ក្រុមហ៊ុន Airbus ក្នុងពិព័រណ៍យន្តហោះនៅប្រទេសចិន។ រូបថត AFP
ក្រុងម៉ូបាលៈ ក្រុមហ៊ុនផលិតយន្តហោះ Airbus របស់អឺរ៉ុប កាលពីថ្ងៃពុធបានចាប់ផ្ដើមដំណើរការចង្វាក់ដំឡើងទី ២ របស់ខ្លួននៅរដ្ឋអាឡាបាម៉ានៅភាគខាងត្បូងនៃសហរដ្ឋអាមេរិក ជាទីដែលក្រុមហ៊ុននេះគ្រោងនឹងផលិតយន្តហោះ A220 ធុនតូចរបស់ខ្លួន ខណៈក្រុមហ៊ុនស្វែងរកការដណ្ដើមយកចំណែកទីផ្សារពីក្រុមហ៊ុន Boeing ដែលជាគូប្រជែង។
ក្នុងពិធីបើកដំណើរការនៅទីក្រុងម៉ូបាល រដ្ឋអាឡាបាម៉ា ជាទីដែលក្រុមហ៊ុនបានបើករោងចក្រមួយរួចហើយនៅឆ្នាំ ២០១៥ ដើម្បីផលិតយន្តហោះដឹកអ្នកដំណើរ A320 នោះ លោក Jeff Knittel អគ្គនាយកក្រុមហ៊ុន Airbus Americas បានថ្លែងថា៖ «យើងបន្តរីកចម្រើន»។
លោកបន្ថែមថា នៅពេលនេះយន្តហោះរបស់យើងជាង ១ ៥០០ គ្រឿង កំពុងហោះហើរនៅអាមេរិក»។
ផលិតកម្មនៅរោងចក្រតម្លៃ ៣០០ លានដុល្លារនេះ ត្រូវបានរំពឹងថា នឹងចាប់ផ្ដើមនៅត្រីមាសទី ៣ ឆ្នាំនេះ ជាមួយនឹងការចែកចាយយន្តហោះ A220 ដំបូងគ្រោងធ្វើឡើងនៅឆ្នាំ ២០២០។ រោងចក្រនេះរំពឹងថានឹងផលិតយន្តហោះបាន ៤ គ្រឿងក្នុង ១ ខែ។
ក្រុមហ៊ុន Airbus បានឲ្យដឹងថា ក្រុមហ៊ុនរកប្រាក់បាន ៤៨ ពាន់លានដុល្លារពីការចំណាយនៅសហរដ្ឋអាមេរិកក្នុងវិស័យដែលជាប់ទាក់ទងនឹងយន្តហោះ និងអវកាសកាលពីឆ្នាំ ២០១៧ ដែលបាន ការងារធ្វើជាង ២៧៥ ០០០ នាក់។
លោក Knittel ថ្លែងថា៖ «យើងមិនមែនកំពុងប្រកួតប្រជែងជាមួយសហរដ្ឋអាមេរិកនោះទេ។ យើងកំពុងប្រកួតប្រជែងនៅក្នុងសហរដ្ឋអាមេរិក»។
កាលពីឆ្នាំ ២០១៧ ក្រុមហ៊ុន Airbus បានទិញចង្វាក់ផលិតយន្តហោះ A220-300 ដែលយន្តហោះនេះ ក្រុមហ៊ុនផលិតយន្ត Bombardier របស់កាណាដាបានអភិវឌ្ឍទៅជាយន្តហោះស៊េរី CSeries របស់ខ្លួន និងដែលជាយន្តហោះតំណាងឲ្យជំនាន់ថ្មីមួយ ដែលបានបង្កើតឡើងសម្រាប់ក្រុមហ៊ុនអាកាសចរណ៍ជាច្រើន ដែលស្វែងរកយន្តហោះមានកន្លែងអង្គុយពី ១០០ ទៅ ១៥០ កៅអី។
ក្រុមហ៊ុន Bombardier បានតស៊ូជម្នះទទួលបានអតិថិជនក្នុងការប្រជែងលក់យន្តហោះក្នុងទីផ្សារ ទោះបីជាយន្តហោះរបស់ខ្លួន បានផ្ដល់ការសន្សំប្រេងឥន្ធនៈ ស្រដៀងគ្នានឹងយន្តហោះខ្នាតធំលំដាប់ថ្មី ដែលបានលក់ដោយក្រុមហ៊ុន Airbus និងក្រុមហ៊ុន Boeing ក៏ដោយ៕ AFP/LA
