ក្រុងឡុងដ៍ៈ ក្រុមហ៊ុន Hyundai របស់ប្រទេសកូរ៉េខាងត្បូង និងក្រុមហ៊ុន Kia ដែលជាក្រុមហ៊ុនបុត្រសម្ព័ន្ធរបស់ខ្លួនកាលពីថ្ងៃព្រហស្បតិ៍បានប្រកាសផែនការវិនិយោគដ៏សំខាន់មួយលើក្រុមហ៊ុនទើបបង្កើតថ្មី Arrival ដែលមានមូលដ្ឋាននៅទីក្រុងឡុងដ៍ ដើម្បីផលិតរថយន្តអគ្គិសនីជំនាន់ក្រោយដែលចំណាយតិចជាងរថយន្តម៉ាស៊ីនស្ដង់ដា។
ទឹកប្រាក់ ១០០ លានអឺរ៉ូ (១១០ លានដុល្លារ) ដែលត្រូវបានវិនិយោគលើក្រុមហ៊ុនបច្ចេកវិទ្យាអាយុកាល ៥ ឆ្នាំមួយនេះបានធ្វើឡើង ខណៈដែលក្រុមហ៊ុនផលិតមួយចំនួនបោះបង់ចោលចក្រភពអង់គ្លេស ដោយសារតែភាពមិនច្បាស់លាស់អំពីថា តើប្រទេសនេះនឹងធ្វើពាណិជ្ជកម្មជាមួយបណ្ដាប្រទេសសហភាពអឺរ៉ុបដូចម្ដេច នៅពេលចក្រភពនេះចាកចេញពីប្លុកអឺរ៉ុបនៅខែនេះ។
ក្រុមហ៊ុន Arrival ផ្ដោតការយកចិត្តទុកដាក់លើការរចនា និងការផលិតអ្វីដែលហៅថា រថយន្តអគ្គិសនី Generation 2 ដែលមិនប៉ះពាល់ដល់បរិស្ថានដោយការផលិតចាប់ផ្ដើមពីដំបូងតែម្តងជំនួសឲ្យការផលិតលើរថយន្តម៉ូដែលចាស់ដែលមានស្រាប់។
ក្រុមហ៊ុនទាំង ៣ ឲ្យដឹងក្នុងសេចក្ដីប្រកាសព័ត៌មានរួមមួយថា៖ «រថយន្ត Generation 2 ត្រូវបានដំឡើងដោយប្រើប្រាស់រោងចក្រខ្នាតតូចដែលមានទីតាំងនៅតំបន់ដែលមានតម្រូវការ និងផ្តល់ប្រាក់ចំណេញ»។
ក្រុមហ៊ុន Hyundai និង Kia មានរចនាសម្ព័ន្ធគ្រប់គ្រងរួមគ្នា ប៉ុន្តែកំណត់ទិសដៅទីផ្សារ និងប្រជាសាស្ដ្រខុសគ្នាតិចតួច។
លោក Albert Biermann ប្រធាននាយកដ្ឋានស្រាវជ្រាវ និងអភិវឌ្ឍន៍របស់ Hyundai ថ្លែងថា៖ «ទីផ្សាររថយន្តអេកូមិនប៉ះពាល់ដល់បរិស្ថាននៅអឺរ៉ុបរំពឹងថានឹងរីកចម្រើនរហ័សដោយសារការពង្រឹងបទប្បញ្ញត្តិបរិស្ថាន»។ លោកថា៖ «ភាពជាដៃគូយុទ្ធសាស្ដ្រនេះនឹងផ្ដល់អំណាចដល់ក្រុមហ៊ុនរបស់យើងក្នុងការបង្កើនការផលិតរថយន្តអគ្គិសនី G2 ទូទាំងពិភពលោក»៕ KC
