ចំណាយ​លើ​ការ​នាំ​ចូល​កើន​ឡើង


ភ្នំពេញៈ កម្ពុជា​ចំណាយ​លើក​ការ​នាំ​ចូល​យាន​ជំនិះ​គ្រប់​ប្រភេទ​បាន​ឡើង​ជាង ៣៨ ភាគរយ​ក្នុង​រយៈ​ពេល ៦ ខែ​ឆ្នាំ​នេះ​បើ​ប្រៀប​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​កន្លង​ទៅ។

តួលេខ ក្រសួង​ពាណិជ្ជកម្ម​បង្ហាញ​ថា កម្ពុជា​បាន​ចំណាយ​ទឹក​ប្រាក់​ជាង ៣៣១ លាន​ដុល្លារ​ទិញ​យាន​ជំនិះ​គ្រប់​ប្រភេទ ៤០០ ៣១៨ គ្រឿង​ក្នុង​រយៈ​ពេល ៦ ខែ ខណៈ​ឆមាស​ទី១ ឆ្នាំ ២០១២ បាន​ចំណាយ ២៣៩,២ លាន​ដុល្លារ សម្រាប់​នាំ​ចូល​យានជំនិះ ៤៨៦ ៨២៧ គ្រឿង។

ការ​នាំ​ចូល​យានយន្ត​បាន​ធ្លាក់​ចុះ​ជិត ១៨ ភាគរយ ក្នុង​រយៈ​ពេល​នេះ។ ប៉ុន្តែ​អ្នក​ជំនួញ​ក្នុង​ទីផ្សារ​រថយន្ត​បាន​ឲ្យ​ដឹង​ថា ទីផ្សារ​រថយន្ត​មាន​កំណើន​ខ្ពស់​នៅ​ក្នុង​ឆមាស​ទី​មួយ​នេះ។

លោក គង់ នួន អគ្គ​នាយក​ក្រុមហ៊ុន គង់ នួន នីហរ័ណ អាហរ័ណ ខូអិលធីឌី ដែល​នាំ​ចូល​រថយន្ត​ម៉ាក Camry មក​កាន់​ទីផ្សារ​កម្ពុជា បាន​ប្រាប់ ភ្នំពេញ ប៉ុស្តិ៍ កាល​ពី​ថ្ងៃ​ម្សិលមិញ​ថា លោក​មិន​បាន​ដឹង​ពី​ស្ថានភាព​គ្រប់​យាន​ជំនិះ​នោះ​ទេ តែ​ជា​ទូទៅ​ទីផ្សារ​រថយន្ត​បាន​កើន​ឡើង។

លោក​បន្ត​ថា ក្រុមហ៊ុន​បាន​លក់​អស់​រថយន្ត​ប្រមាណ​ជា ៩០០ គ្រឿង​ក្នុង​ឆ្នាំ ២០១២។ ដោយ​ឡែក​ក្នុង​រយៈ​តែ​មួយ​ឆមាស​ដើម​ឆ្នាំ ២០១៣ ក្រុមហ៊ុន​លក់​រថយន្ត​អស់​ប្រមាណ ៦០០ គ្រឿង។

លោក សេង វឹង នាយក​ចែក​ចាយ​រថយន្ត និង​គ្រឿង​ចក្រ R.M Asia Co., Ltd និយាយ​ថា ទីផ្សារ​រថយន្ត គ្រឿង​យន្ត​កសិកម្ម និង​គ្រឿង​ចក្រ កើន​ឡើង​ខ្ពស់។ លោក​បន្ត​ថា៖ «ទីផ្សារ​រថយន្ត​នឹង​មាន​ផល​ប៉ះពាល់​តិច​តួច​ដោយ​សារ​រាជ​រដ្ឋាភិបាល​ថ្មី​មិន​ទាន់​កើត​ឡើង»។

លោក ឃួន សាវុធ ប្រធាន​ការិយាល័យ​ស្ថិតិ​នៃ​អគ្គ​នាយកដ្ឋាន កាំកុងត្រូល បាន​និយាយ​ថា ការ​ចំណាយ​កើន​ឡើង​ដោយ​សារ​មាន​ការ​នាំ​ចូល​ប្រភេទ​រថយន្ត​ទំនើប​ច្រើន​ជាង​រថយន្ត​ជជុះ៕

ព័ត៌មានថ្មីៗ