ទេសចរ ៦ខែ កើន​ឡើង​ជាង​ ២​លាន​នាក់


130802_12
ទេសចរជាតិ និងអន្តរជាតិដែលមកទស្សនាប្រាសាទអង្គរវត្តនាពេលកន្លងមក ភ្នំពេញ ប៉ុស្តិ៍

ភ្នំពេញៈ កម្ពុជា​ទទួល​បាន​ភ្ញៀវ​​ទេសចរ​ជាង​ ២ លាន​នាក់​ក្នុង​រយៈពេល​ ៦ខែ​ដំបូង ឆ្នាំ​នេះ​ដោយ​មាន​កំណើន​ ១៩ ​ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន ខណៈ​មន្ត្រី​អះ​អាង​ថា ចំនួន​ភ្ញៀវ​ទេសចរ​នឹង​មាន​កំណើន​រហូត​ដល់​ទៅ​ជាង​ ៤ ​លាន​នាក់​នៅ​ឆ្នាំ​នេះ។

លោក ថោង ខុន រដ្ឋមន្ត្រី​ក្រសួង​ទេសចរណ៍ បាន​និយាយ កាល​ពី​ថ្ងៃ​ម្សិល​មិញ​ថា កំណើន​ភ្ញៀវ​ទេសចរ​អន្តរជាតិ​មាន​រហូត​ដល់​ជាង​ ២ ​លាន​នាក់​ក្នុង រយៈ​ពេល​ ៦​ ខែ​ដោយ​ឡើង​ពី​ចំនួន​ជាង​ ១,៧ ​លាន​នាក់​បើ​ធៀប​នឹង​រយៈពេល​ដូច​គ្នា ​កាល​ពី​ឆ្នាំ​ទៅ។

លោក​បន្ត​ថា តាម​ការ​ព្យាករ ចំនួន​ភ្ញៀវ​​ទេសចរ​បរទេស​នឹង​ឡើង​ដល់​ ៤,១ ​លាន​នាក់​ត្រឹម​ដំណាច់​ឆ្នាំ​នេះ។ វិស័យ​ទេសចរណ៍​កម្ពុជា​គ្មាន​រង​ផល​ប៉ះពាល់​ដោយសារ​ការ​បោះ​ឆ្នោត​ទេ។ បើ​ទោះ​បី​ជា​កម្ពុជា​ធ្លាប់​មាន​បទ​ពិសោធ​ជាប់​គាំង​នយោបាយ​ជិត​មួយ ឆ្នាំ​ក្នុង​អាណត្តិ​ទី​បី​ហើយ​ក៏​​ធ្លាប់​ជួប​ប្រទះ​អំពើ​ហិង្សា​ដោយ​ការ​ វាយ​ប្រហារ​គ្រាប់​បែក​ក្នុង​ក្បួន​បាតុកម្ម​ក្នុង​ឆ្នាំ​ ១៩៩៨ បន្ទាប់​ពី​ការ​បោះ​ឆ្នោត​ក៏​ដោយ។

លោក​បន្ថែមថា៖​ «​អំឡុង​ពេល ​និង​ក្រោយ​ពេល​បោះ​ឆ្នោត​ [ឆ្នាំ​នេះ] គ្មាន​ផល​ប៉ះ​ពាល់​ដល់​វិស័យ​ទេសចរណ៍​ទេ​ ប៉ុន្តែ​ចំនួន​ភ្ញៀវ​មាន​កំណើន​យឺត​តិច​ដោយសារ​ជា​រដូវ​ភ្លៀង»។

ទោះ​ ជា​បែប​នេះ​ក្តី​ ការ​ធ្វើ​បាតុ​កម្ម​ដោយ​អ្នក​នយោបាយ​នឹង​ធ្វើ​ឲ្យ​ប៉ះ​ពាល់​អារម្មណ៍​ ភ្ញៀវ​ទេសចរ។ លោក​ថ្លែង​ថា៖ ​«ខ្ញុំចង់​​ឲ្យ​ស្ថាន​ភាព​​មាន​ស្ថិរ​ភាព​​ ហើយ​​ បើមាន​បាតុកម្ម​​ វា​នឹង​ប៉ះពាល់​ដល់​អាម្មរណ៍​ទេសចរ។ ​យើង​ជា​ខ្មែរ​​ ត្រូវ​ការ​ថែ​រក្សា​​អ្វី​ដែល​យើង​មាន​ទាំង​អស់​គ្នា»។

លោក ​ហូ វណ្ឌី ​សហ​ប្រធាន​ក្រុម​ការងារ​ទេសចរណ៍​ផ្នែក​ឯកជន បាននិ​យាយ​ថា​ វិស័យ​ទេសចរណ៍​កម្ពុជា​នៅ​តែ​មាន​កំណើន​ក្នុង​កម្រិត​ណាមួ​យ​ ទោះ​បី​អាច​នឹង​ជួប​វិបត្តិ​នយោបាយ​នៅ​ពេល​ខាង​មុខ​ក្ដី​ តែ​រហូត​មក​ដល់​ពេល​នេះ​មិន​ទាន់​មាន​សញ្ញា​ណា​មួយ​បញ្ជាក់​ថា វា​រង​ផល​ប៉ះ​ពាល់​នោះ​ទេ។

លោក​បន្ត​ថា ក្នុង​នាម​វិស័យ​ឯក​ជន ​ក្តី​ប្រាថ្នាគឺ​ចង់​ឲ្យ​បង្កើត​រដ្ឋាភិបាល​ឲ្យ​បាន​ឆាប់​តាម​ដែល​អាច​ ធ្វើទៅ​បាន។

លោក​ថ្លែង​ថា៖ «ទៅ​ថ្ងៃ​ខាង​មុខ​បើ​មាន​ផល​ប៉ះ​ពាល់ ឧស្សាហកម្ម​ទេសចរណ៍​នឹង​ប៉ះ​ពាល់​មុន​គេ បន្ទាប់​មក​ទើប​ប៉ះ​ពាល់​ទៅ​លើ​វិស័យ​ផ្សេងៗ​ទៀត»៕

ព័ត៌មានថ្មីៗ