ក្រុងសេអ៊ូលៈ ប្រធានក្រុមហ៊ុនគ្រឿងសម្អាងដ៏ធំរបស់ប្រទេសកូរ៉េខាងត្បូង បានលាលែងពីតំណែងកាលថ្ងៃអាទិត្យ បន្ទាប់ពីប្រឈមនឹងការប្រឆាំងយ៉ាងខ្លាំងចំពោះទង្វើនៃការបង្ខំឲ្យបុគ្គលិករបស់លោកមើលវីដេអូ YouTube ដែលសរសើរប្រទេសជប៉ុនក្នុងពេលដែលកើតមានសង្គ្រាមពាណិជ្ជកម្មរវាងប្រទេសទាំង ២។
វីដេអូឃ្លីប ដែលបានចាក់ផ្សាយនៅក្នុងកិច្ចប្រជុំប្រចាំខែមួយដែលមានការចូលរួមពីបុគ្គលិកប្រហែល ៧០០ នាក់របស់ក្រុមហ៊ុន Kolmar Korea កាលពីសប្ដាហ៍មុន រិះគន់ការឆ្លើយតបរបស់លោកប្រធានាធិបតី Moon Jae-in ទៅនឹងបទប្បញ្ញត្តិពាណិជ្ជកម្មរបស់ជប៉ុន និងសរសើរលោកនាយករដ្ឋមន្ដ្រី ស៊ីនហ្សូ អាបេ សម្រាប់ «ការមិនដាល់លោក Moon ចំកណ្ដាលមុខ»។
វីដេអូនេះក៏សំដៅដល់សេដ្ឋកិច្ចដែលជាប់គាំងរបស់ប្រទេសវ៉េណេស៊ុយអេឡា ជាទីដែល «ស្ដ្រីជាច្រើននឹងក្លាយខ្លួនទៅជាស្ដ្រីពេស្យាដែលមានតម្លៃខ្លួនត្រឹមតែ ៧ ដុល្លារប៉ុណ្ណោះ» ហើយវីដេអូនេះបន្ថែមថា ប្រទេសកូរ៉េខាងត្បូងនៅមិនឆ្ងាយពីការជួបវាសនាស្រដៀងគ្នានេះនោះទេ។
ករណីនេះបានបណ្ដាលឲ្យមានការខឹងសម្បាជាសាធារណៈ និងបានអំពាវនាវឲ្យមានការធ្វើពហិការទិញផលិតផលរបស់ក្រុមហ៊ុននេះដែលផ្គត់ផ្គង់យីហោគ្រឿងសម្អាងជាច្រើនទូទាំងពិភពលោក។
លោក Yoon Dong-han ប្រធានក្រុមហ៊ុន Kolmar Korea បានសុំអភ័យទោសកាលពីថ្ងៃអាទិត្យចំពោះទង្វើ «ញុះញង់ឲ្យមានបញ្ហា» និងបានឲ្យដឹងថា លោកនឹងលាលែងពីតំណែងរបស់ខ្លួន។
លោកបានមានប្រសាសន៍ថា៖ «ខ្ញុំសុំអភ័យទោសចំពោះអតិថិជន និងប្រជាជនកូរ៉េដែលទុកចិត្ត និងស្រឡាញ់ផលិតផលរបស់យើង»។ លោកបានបន្ថែមថា៖ «ជាពិសេសខ្ញុំចង់សុំអភ័យទោសដោយស្មោះស្ម័គ្ររបស់ខ្ញុំដល់ស្ដ្រីទាំងនោះ»៕ LA