ពឹងផ្អែកការនាំចូលជាការបម្រើសេដ្ឋកិច្ចបរទេស
ភ្នំពេញៈ ផ្តើមចេញពីភាពម្ចាស់ការ និងភាពជឿជាក់លើជំនាញដែលខ្លួនមាន ទើបធ្វើឲ្យបុគ្គលម្នាក់អាចមានជំហររឹងមាំក្នុងការពុះពារនូវឧបសគ្គផ្សេងៗបានទោះបីជាឧបសគ្គនោះមានទំហំធំធេងក្នុងរយៈពេលខ្លីឬរយៈពេលវែងក៏ដោយ។
លោក ហៃ លីអ៊ាង អគ្គនាយកសហគ្រាស Confirel ជាសហគ្រិនជោគជ័យម្នាក់ដែលបានផលិតផលិតផលធ្វើពីទឹកត្នោត ដំបូងគេនៅកម្ពុជា។
លោកបានប្រាប់ភ្នំពេញ ប៉ុស្តិ៍ កាលពីថ្ងៃម្សិលមិញថា លោកមានគំនិតកែច្នៃផលិតផលចេញពីទឹកត្នោតតាំងពីឆ្នាំ ១៩៩២ ដោយកាលនោះប្រទេសកម្ពុជាចាប់ផ្តើមកសាងសន្តិភាពបន្ទាប់ពីកិច្ចព្រមព្រៀងទីក្រុង ប៉ារីសឆ្នាំ ១៩៩១ តែរហូតដល់ឆ្នាំ ២០០១ ទើបផលិតផលដំបូងគឺស្ករត្នោតបានលេចរូបរាងឡើង។
ការប្រើប្រាស់ពេលវេលាដ៏វែងនោះ គឺដោយសារលោកត្រូវយកផលិតផលស្ករត្នោតទៅពិសោធនៅប្រទេសបារាំង ហើយបន្ទាប់ពីឃើញភាពវិជ្ជមាននៃគុណភាពខ្ពស់ទើបលោកសម្រេចចិត្ត អភិវឌ្ឍផលិតផលនេះ។
លោក ហៃ លីអ៊ាង ក៏ជានាយកសហគ្រាសផលិតឱសថ PPM ផងនោះបានបញ្ជាក់ថា កាលនោះ លោកមានគម្រោងពីរ គឺទីមួយការផលិតឱសថ ហើយវាបានកើតចេញនៅឆ្នាំ ១៩៩៦ និងមួយទៀតការផលិតផលិតផលនានាចេញពីតោ្នតដែលចាប់ផ្តើមដំណើរការនៅឆ្នាំ ២០០១។
រហូតដល់ឆ្នាំ ២០០១ ទើបផលិតផលផ្តើមដំណើរការចេញជារូបរាងបន្ទាប់ពីផលិតផលស្ករត្នោតយកទៅពិសោធនៅប្រទេសបារាំងបានទទួលជោគជ័យ និងមានសារប្រយោជន៍ខ្លាំងពីស្ករត្នោតនេះ។
លោកបន្តថា៖ «ប្រទេសយើងទើបងើបពីសង្គ្រាម យើងត្រូវការចាំបាច់នូវជំនឿ។ ជំនឿលើអត្តសញ្ញាណរបស់យើង លើវប្បធម៌របស់យើង និងកម្លាំងរបស់យើង។ ផលិតផលទាំងនេះនឹងក្លាយជាផលិតផលយូរអង្វែងរបស់ប្រទេសកម្ពុជាយើង ព្រោះនៅស្រុកស្រែដើមត្នោតតែងតែមានជានិច្ច»។
លោកនិយាយថា៖ «យើងគិតថា ប្រទេសយើងធ្លាប់មានអង្គរដែលដើរតួនាទីជាខ្លឹម និងជាកម្លាំង។ បន្ទាប់ពីយើងច្បាំងគ្នា គឺយើងខ្វះនូវជំនឿដែលជឿថា ខ្លួនឯងខ្លាំង ហើយកាលណាយើងខ្វះជំនឿយើងមិនអាចរឹងមំាបានទេ»។
លោកបញ្ជាក់ថា លោកចាប់ផ្តើមគម្រោងនេះដោយមានថវិកាផ្ទាល់ខ្លួនចំនួន ៦ ម៉ឺន ដុល្លារ ហើយលោកត្រូវចំណាយថវិកាជាបន្តបន្ទាប់ទៅលើដំណើរយកផលិតផលទៅធ្វើពិសោធនៅប្រទេសបារាំងជាដើមរហូតមកដល់ពេលនេះលោកបានចំណាយ អស់ជាង ២ លានដុល្លារសម្រាប់ផែនការអភិវឌ្ឍន៍ផលិតផលចេញពីតោ្នតនេះ។
លោកបន្ថែមថា រហូតមកដល់ពេលនេះក្រុមហ៊ុន Confirel បានផលិតផលិតផលជាង ៣០ ប្រភេទចេញពីទឹកត្នោតដែលរួមមាន ស្រាទឹកត្នោត ទឹកខ្មះ ស្ករត្នោត និង គ្រឿងផ្សំផ្សេងៗទៀតដែលមានទីផ្សារនៅក្នុងប្រទេសបារាំង កូរ៉េ តៃវ៉ាន់ ជប៉ុន និងទីផ្សារធំគឺជនបរទេសដែលមកទស្សនាប្រទេសកម្ពុជា។
រហូតមកដល់ពេលនេះមានកសិករជាង ១០០ គ្រួសារជាសមាជិក សកម្ម នៅផ្នែកផលិតទឹកត្នោតបានផ្គត់ផ្គង់ផលិតផលដល់សហគ្រាសមួយនេះហើយបើផលិតផលសម្រេចមានការគាំទ្រកាន់តែខ្លាំងលទ្ធភាពពង្រីកទៅកសិករផ្សេងៗទៀតកាន់តែមានទំហំធំនៅលើខេត្ត ដែលមានសក្តានុពលដើមតោ្នត លោកបានថ្លែងថា៖ «យើងមិនដែល ឃើញនរណាក្លាយជាអ្នកមានដោយគ្រាន់តែទៅទិញផលិតផលពីគេយកមកប្រើប្រាស់នោះទេ គឺទាល់តែផលិតខ្លួនយើង ទើបយើងអាចក្លាយជាអ្នកមានបាន»។
ការកត់សម្គាល់របស់ម្ចាស់សហគ្រាស ដែលវិលត្រឡប់ពីប្រទេសបារាំងក្រោយសន្ធិសញ្ញាក្រុង ប៉ារីសរូបនេះ បានលើកឡើងថា ៖ «ការប្រើប្រាស់ និងពឹងផ្អែកលើផលិតផលនាំចូលពីបរទេសគឺជាការបម្រើសេដ្ឋកិច្ច បរទេស ហើយប្រទេសកម្ពុជាគ្មានឱកាសកសាងសុខសន្តិភាពដោយខ្លួនឯងទេ»។
លោកបន្តថា៖ «យើងទៅទិញពីគេមកយើងឲ្យប្រាក់ខែទៅគេ។យើងឃើញលេខរាប់កោដិ តើគេយកទៅវិញប៉ុន្មាន? បើខ្មែរយើងនៅតែលក់ញើសឲ្យទៅគេ យើងមិនអាចធ្វើជាអ្នកមានបាននោះទេ ហើយប្រទេសយើងនៅតែអស្ថិរភាពជាដរាបដោយសារយើងខ្វះខាតផ្នែកសេដ្ឋកិច្ច»។
ប្រជាជនកម្ពុជាភាគច្រើនជាកសិកររហូតដល់ ៨០ ភាគរយរស់នៅតាមទីជនបទ ហើយច្បាស់ណាស់ថា ពួកគាត់ត្រូវតែមានជំនឿលើខ្លួនឯងទើបពួកគាត់អាចឆ្លងផុតពីភាពក្រីក្រដោយផ្តើមពីការទាញប្រយោជន៍ ពីអ្វីដែលខ្លួនឯងមានដោយមិនត្រូវពឹងមើលឃើញអ្វីដែលមេឈ្មូញធំ លើកកម្ពស់នោះទេ។
លោកនិយាយថា៖ «យើងចង់ឲ្យផលិតផលនេះនាំមកនូវតម្លៃបន្ថែមក្នុងស្រុករបស់យើង។ បើយើងចង់ឲ្យសេដ្ឋកិច្ចយើងសម្បូរបែប យើងត្រូវឲ្យផលិតផលប្រទេសរបស់យើងមានតម្លៃ និង បង្កើតតម្លៃបន្ថែម។ ប្រសិនយើងរង់ចាំផលិតផលដែលឈ្មួញជាអ្នកសម្រេចដំឡើងថ្លៃ ឬបញ្ចុះថ្លៃ ប្រជាជនយើងមិនអាចឆ្លងរួចពីភាពក្រីក្របានទេ»។
លោកបន្តថា តាមរយៈការសាកល្បងភ្លក្សរសជាតិនាពេលកន្លងមកទៅលើអតិថិជននានាបង្ហាញថា ផលិតផលនេះមានអ្នកចូលចិត្តរហូតដល់ ៧៥ ភាគរយនៅប្រទេស បារាំង និង ៩០ ភាគរយនៅប្រទេសកម្ពុជាដោយផ្អែកលើគុណភាព ចំណែកផ្នែកមិនទាន់ជោគជ័យគឺការវេចខ្ចប់នៅអន់ថយនៅឡើយ។
លោកបាននិយាយថា៖ «រហូតដល់ពេលនេះ យើងមានផលិតផល មានការគំាទ្រ មានវត្ថុធាតុដើម មានប្រជាកសិករដែលខិតខំជួយផលិតឲ្យមានគុណភាព យើងមានមុំបីនេះជាកត្តាជោគជ័យទៅលើផលិតនេះ»។
លោកថ្លែងថា ពេលនេះក្រុមហ៊ុនមានផលិតផលគ្រប់គ្រាន់ហើយ ដោយត្រូវផ្តោតលើទីផ្សារក្នុងឆ្នាំក្រោយ។ ឆ្នាំ ២០១៤ ខាងមុខជាឆ្នាំដែលក្រុមហ៊ុននឹងពង្រីកឲ្យកាន់តែខ្លាំងថែម ទៀត ពិសេសតម្លៃបន្ថែមឲ្យដល់កសិករជាអ្នកឡើងត្នោតតែម្តង៕
