ទិដ្ឋភាពនៅឯព្រលានយន្តហោះអន្តរជាតិភ្នំពេញនាពេលកន្លងមក។ ព្រលានយន្តហោះនេះទទួលបានពានរង្វាន់ជាព្រលានយន្តហោះល្អបំផុតទាក់ទងកំណើនអ្នកដំណើរ។ សហការី
ភ្នំពេញៈ ព្រលានយន្តហោះអន្តរជាតិភ្នំពេញទទួលពានរង្វាន់ជាព្រលានយន្តហោះល្អបំផុតទាក់ទងនឹងកំណើនអ្នកដំណើរប្រកបដោយចីរភាពក្នុងតំបន់អាស៊ីប៉ាស៊ីហ្វិកសម្រាប់ ២០១៩។ នេះបើយោងតាមមជ្ឈមណ្ឌលអាកាសចរណ៍ CAPA។
ពានរង្វាន់នេះត្រូវបានប្រគល់ដោយមជ្ឈមណ្ឌលអាកាសចរណ៍ CAPA ជាអង្គការឈានមុខគេ និងទុកចិត្តលើពិភពលោកខាងការផ្ដល់ព័ត៌មានទីផ្សារសម្រាប់ឧស្សាហកម្មអាកាសចរណ៍ និងការធ្វើដំណើរនៅក្នុងកិច្ចប្រជុំកំពូលអាកាសចរណ៍អាស៊ី CAPA ដែលត្រូវបានរៀបចំឡើងនៅសិង្ហបុរីកាលពីថ្ងៃទី ១៤ ខែវិច្ឆិកា។
CAPA ឲ្យដឹងថា ជម្រើសរបស់ព្រលានយន្តហោះអន្តរជាតិភ្នំពេញសម្រាប់ការទទួលយកយុទ្ធសាស្ដ្រនវានុវត្តន៍ដែលបាននាំទៅរកកំណើនអ្នកដំណើរប្រកបដោយចីរភាពជាង ២៥ ភាគរយក្នុងរយៈពេល ២ ឆ្នាំ (២០១៧ និង២០១៨) និង ១៥ ភាគរយ កាលពីត្រីមាសទី ១ និងទី ៣ ឆ្នាំ ២០១៩។
CAPA ផ្ដល់ពិន្ទុលើការបញ្ចប់យ៉ាងរហ័សលើការងារទាក់ទងនឹងផ្លូវរត់ ដែលបានពង្រីកសក្ដានុពលសម្រាប់សេវាហោះហើរចម្ងាយឆ្ងាយ ហើយព្រលានយន្តហោះនេះ រួមជាមួយនឹងព្រលានយន្តហោះ ២ ផ្សេងទៀតនៅសៀមរាប និងក្រុងព្រះសីហនុបានរួមចំណែកដល់ផលិតផលក្នុងស្រុកសរុបរបស់កម្ពុជា និងដើម្បីបង្កើតការងារ។
លោក Peter HARBISON ប្រធាន CAPA បានថ្លែងថា៖ «ក្នុងរយៈពេល ៣ ឆ្នាំ ចាប់ពីឆ្នាំ ២០១៥ ដល់ឆ្នាំ ២០១៨ ព្រលានយន្តហោះអន្តរជាតិភ្នំពេញបានបង្កើនចំនួនអ្នកដំណើរបាន ៥០ ភាគរយ ខណៈសមត្ថភាពតម្លៃដឹកជញ្ជូនទំនិញបានកើនឡើងជិត ២ ដង»។
លោក Alain BRUN អគ្គនាយកក្រុមហ៊ុន Cambodia Airports បានឲ្យដឹងថា ដោយសារជាព្រលានយន្តហោះនេះតូចបានធ្វើឲ្យវាទទួលបានអត្ថប្រយោជន៍ពីសមត្ថភាពក្នុងការទទួលយកដោយងាយស្រួល និងការឆ្លើយតបនឹងតម្រូវការរបស់អតិថិជន។
លោកបន្ថែមថា៖ «ការសរសើរនេះគឺសក្ខីភាពនៃគំរូភាពជាដៃគូឯកជនសាធារណៈរបស់ព្រលានយន្តហោះនេះដែលត្រូវបានអភិវឌ្ឍប្រកបដោយជោគជ័យក្នុងរយៈពេល ២៥ ឆ្នាំចុងក្រោយនេះ។ គំរូយើងធានាចក្ខុវិស័យរយៈពេលវែង ការអាចទុកចិត្តបាន និងការវិនិយោគជាបន្ត ដែលប្រែក្លាយទៅជាកំណើនអ្នកដំណើរដ៏រឹងមាំចាប់ពី ៦០ ម៉ឺននាក់ ទៅ ៦ លាននាក់ ត្រឹមចុងឆ្នាំ ២០១៩»។
លោកស្រី ឆៃ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានឲ្យដឹងថាពានរង្វាន់ដែលបានផ្ដល់នេះឆ្លុះបញ្ចាំងពីផែនការបង្កើន និងនវានុវត្តន៍ព្រលានយន្តហោះក្នុងការឆ្លើយតបចំពោះការកើនឡើងយ៉ាងខ្លាំងនៃការមកដល់ភ្ញៀវទេសចរជារៀងរាល់ឆ្នាំ។
ទោះបីយ៉ាងនេះក្តី លោកស្រីបន្តថាព្រលានយន្តហោះនេះត្រូវតែចាត់វិធានការក្នុងការផ្ដល់សេវាកាន់តែប្រសើរសម្រាប់អ្នកដំណើរ។ លោកស្រីថ្លែងថា៖ «ខ្ញុំគិតថា ជាមួយនឹងពានរង្វាន់នេះ វានឹងទាក់ទាញក្រុមហ៊ុនអាកាសចរណ៍កាន់តែច្រើន ដើម្បីចាប់ផ្ដើមអាជីវកម្មរបស់ពួកគេនៅទីនេះ ខណៈយើងនៅតែប្រឈមនឹងកង្វះជើងហោះត្រង់ចម្ងាយខ្លី និងចម្ងាយវែងពីតំបន់ និងពិភពលោក»។
ទិន្នន័យបានពីក្រុមហ៊ុន Cambodia Airports បង្ហាញថាកាលពីឆ្នាំ ២០១៨ ចំនួនអ្នកដំណើរឆ្លងកាត់ព្រលានយន្តហោះអន្តរជាតិរបស់កម្ពុជាមានចំនួនសរុបជិត ១០,៦ លាននាក់ ក្នុងនោះ ៥,៤ លាននាក់ សម្រាប់ព្រលានយន្តហោះអន្តរជាតិភ្នំពេញ ៤,៤ លាននាក់ សម្រាប់ព្រលានយន្តហោះអន្តរជាតិសៀមរាប និងព្រលានយន្តហោះអន្តរជាតិក្រុងព្រះសីហនុទទួលបានអ្នកដំណើរជាង ៦៥០ ០០០ នាក់។ ចំណតទទួលភ្ញៀវទាំង ៣ បម្រើទិសដៅជាង ៥៥ និងស្វាគមន៍ជើងហោះហើរទៀងទាត់ ៧០០ ក្នុង ១ សប្ដាហ៍៕LA
វីដេអូ៖
