ស្ថាបនាចុះហត្ថលេខាលើកម្ចី$១៥លាន
ភ្នំពេញៈគ្រឹះស្ថានមីក្រូហិរញ្ញវត្ថុស្ថាបនាលីមីធីតបានចុះហត្ថលេខាខ្ចីប្រាក់ចំនួន ១៥ លានដុល្លារ ពីស្ថាប័នមីក្រូហិរញ្ញវត្ថុរបស់ប្រទេសអាល្លឺម៉ង់ (DEG) ដើម្បីបន្ថែមលើកម្ចីដែលបានផ្តល់ដល់អតិថិជន ១៤៣ លានដុល្លារ។
កម្ចី១៥លានដុល្លារក្រោយនេះនឹងផ្តោតសំខាន់លើសហគ្រាសធុនតូចនិងមធ្យមនៅកម្ពុជាដោយការផ្តល់រយៈពេលយូរជាងមុនរហូតដល់ទៅមួយឆ្នាំ។នេះបើតាមការបញ្ជាក់របស់នាយកប្រតិបត្តិរបស់ស្ថាបនា។
លោក ប៊ុន មុនី នាយកប្រតិបត្តិគ្រឹះសា្ថនមីក្រូហិរញ្ញវត្ថុស្ថាបនាបាននិយាយថា ប្រាក់កម្ចី ១៥ លានដុល្លារនោះមានរយៈពេល ៧ឆ្នាំ ដោយមានអត្រាការប្រាក់ចន្លោះពី ៦ ទៅ ៦,៣ ភាគរយ ប្រចាំឆ្នាំ ហើយទឹកប្រាក់នេះនឹងជួយគាំទ្រដល់ការពង្រីកសេវាកម្មដល់អាជីវកម្មខ្នាតតូចនិងមធ្យមក្នុងទម្រង់ហិរញ្ញវត្ថុប្បទានរយៈពេលយូរជាងមុនពី ៣៦ ខែដល់ ៤៨ ខែ។
លោកបន្តថា៖«កិច្ចព្រមព្រៀងនេះជាសក្ខីភាពមួយដែលបានឆ្លុះបញ្ចាំងពីភាពរឹងមាំក្នុងការគ្រប់គ្រងប្រតិបត្តិការរបស់ខ្លួនប្រកបដោយគុណភាពខ្ពស់ដែលមានលក្ខណសម្បត្តិគ្រប់គ្រាន់ស្របតាមលក្ខខណ្ឌស្តង់ដារអន្តរជាតិ»។
រហូតដល់ដំណាច់ខែកក្កដា ស្ថាបនាមានអតិថិជនខ្ចីប្រាក់ ៧២ ០០០ នាក់ ដែលមានទឹកប្រាក់សរុប ១៤៣ លានដុល្លារ។ គ្រឹះស្ថានមីក្រូហិរញ្ញវត្ថុមួយនេះក៏ទទួលបានប្រាក់បញ្ញើ ៧០ លានដុល្លារ ពីអ្នកផ្ញើចំនួន ៥៤ ៣៣៤ នាក់ក្នុងរយៈពេលដូចគ្នា នៅទូទាំងប្រទេសដែលមានការិយាល័យប្រតិបត្តិចំនួន ១០១ ទីតាំង។
លោក មុនី បាននិយាយថា៖ «ស្ថាបនាមានផែនការបង្កើនអតិថិជនឲ្យបាន ១៧៥ ០០០ នាក់ និងទុនឥណទានឲ្យបានដល់ ៥០០ លានដុល្លារ ក្នុងអំឡុង ៥ ឆ្នាំ ខាងមុខនិងអតិថិជន ២៥០ ០០០ នាក់ ជាមួយប្រាក់កម្ចី ១ ០០០ លានដុល្លារ នៅ ១០ ឆ្នាំខាងមុខ»។
DEG ជាក្រុមហ៊ុនវិនិយោគនិងអភិវឌ្ឍន៍អាល្លឺម៉ង់និងជាបុត្រសម្ព័ន្ធធនាគារអភិវឌ្ឍន៍អាល្លឺម៉ង់។
លោក HerbertJaeger នាយកគ្រប់គ្រងវិនិយោគជាន់ខ្ពស់នៃការិយាល័យតំណាង DEG ប្រចាំប្រទេសថៃបាននិយាយថា DEG បានឈានចូលទីផ្សារហិរញ្ញវត្ថុប្រទេសកម្ពុជា ជាង ១០ ឆ្នាំ កន្លងមកហើយ ដោយចាប់ផ្តើមដំបូងជាមួយគ្រឹះស្ថានមីក្រូហិរញ្ញវត្ថុអេស៊ីលីដា។
កាលពីឆ្នាំមុន DEG ក៏បានផ្តល់ប្រាក់កម្ចីដល់មីក្រូហិរញ្ញវត្ថុប្រាសាក់ ១៥ លានដុល្លារសម្រាប់បម្រើសេវាកម្មហិរញ្ញវត្ថុកាន់តែទូលំទូលាយដល់សហគ្រាសធុនតូចនិងមធ្យម។
លោកបន្តថា៖« DEG បានផ្តល់ហិរញ្ញវត្ថុដល់វិស័យឯកជននៅកម្ពុជាប្រមាណ ១០០ លានដុល្លារ ហើយយើងនឹងពង្រីកបន្ថែមទៀត។ យើងនឹងបន្ថែមហិរញ្ញវត្ថុដល់គ្រឹះស្ថានមីក្រូហិរញ្ញវត្ថុផ្សេងទៀតនៅអនាគត»។
លោក ប៊ុន មុនី ឲ្យដឹងថា មកដល់ពេលនេះ ស្ថាបនាមានដៃគូសហការជាង ១០ មកពីប្រទេសផ្សេងៗគ្នា មាន អាមេរិក ស្វ៊ីស ហូឡង់ បែលហ្ស៊ិក លុចសំបួ ប៉េរូ បារំាង និង អាល្លឺម៉ង់ ហើយ ស្ថាបនាកាន់កាប់ភាគហ៊ុនជាមួយធនាគារ ជប៉ុន ម៉ារូហាន់ ដែលមានភាគទុន ៩៥ ភាគរយ នៃទុនសរុប៕
