លោក Ranil Wickremesinghe (កណ្ដាល) ត្រូវបានបណ្ដេញចេញពីតំណែងជានាយករដ្ឋមន្រ្តី និងការរំលាយសភា កាលពីខែតុលា។ AFP
ក្រុងកូឡុំបូៈ ប្រទេស ស្រីលង្កា បានអំពាវនាវឲ្យមូលនិធិរូបិយវត្ថុអន្តរជាតិ (IMF)ពិនិត្យមើលឡើងវិញនូវកញ្ចប់ថវិកាសង្គ្រោះចំនួន ១,៥ ពាន់លានដុល្លារអាមេរិកដែលត្រូវបានព្យួរនៅក្នុងអំឡុងពេលមានវិបត្តិនយោបាយរបស់ប្រទេសកោះនេះកាលពីចុងឆ្នាំមុន។ នេះបើយោងតាមក្រសួងហិរញ្ញវត្ថុស្រីលង្កាកាលពីថ្ងៃពុធ។
កាលពីខែតុលា ប្រធានាធិបតីស្រីលង្កា លោក Maithripala Sirisena បានបង្កឲ្យមានវិបត្តិនយោបាយអស់រយៈពេលជាច្រើនសប្តាហ៍ រួមទាំងជម្លោះនៅក្នុងរដ្ឋសភាតាមរយៈការបណ្តេញលោក Ranil Wickremesinghe ចេញពីតំណែងជានាយករដ្ឋមន្រ្តី និងការរំលាយសភា។
តុលាការ និងសភាក្រោយមកបានសម្រេចថា ទង្វើរបស់លោកប្រធានាធិបតី គឺអធម្មនុញ្ញភាព និងបានស្តារនីតិសម្បទារបស់ពួកគេឡើងវិញ បន្ទាប់ពីភាពចលាចលរយៈពេលជាង ៧ សប្តាហ៍ដែលបានធ្វើឲ្យសហគមន៍អន្តរជាតិមានការភ្ញាក់ផ្អើល។
វិបត្តិនេះបានបណ្តាលឲ្យទីភ្នាក់ងារវាយតម្លៃចំណាត់ថ្នាក់ឥណទានអន្តរជាតិទម្លាក់ចំណាត់ថ្នាក់បំណុលរបស់ប្រទេស ស្រីលង្កា ហើយមូលនិធិ IMF បានព្យួរកម្មវិធីផ្តល់ថវិកាសង្គ្រោះរបស់ខ្លួន ដែលបានចាប់ផ្តើមក្នុងឆ្នាំ ២០១៦ ខណៈដែលអង្គការនេះហៀបនឹងបញ្ចេញកញ្ចប់ប្រាក់បន្ទាប់។
ក្រសួងហិរញ្ញវត្ថុរបស់ស្រីលង្កា បានឲ្យដឹងថា សំណើសុំឲ្យពិនិត្យឡើងវិញនូវកញ្ចប់ថវិកាសង្គ្រោះនេះត្រូវបានធ្វើឡើងក្នុងអំឡុងការជជែកគ្នារវាងរដ្ឋមន្រ្តីហិរញ្ញវត្ថុ លោក Mangala Samaraweera និងលោកស្រី Christine Lagarde ប្រធាន IMF ក្នុងទីក្រុងវ៉ាស៊ីនតោន កាលពីថ្ងៃអង្គារ។
សេចក្តីថ្លែងការណ៍នេះបានឲ្យដឹងថា គណៈប្រតិភូរបស់ប្រទេស ស្រីលង្កា បានធ្វើសំណើ «ជាមួយទស្សនៈមួយ ដើម្បីធ្វើឲ្យសេដ្ឋកិច្ចមានស្ថិរភាពឡើងវិញ» បន្ទាប់ពីមាន«ការអាក់ខាន» ផ្នែកនយោបាយរបស់ប្រទេសនេះ។
ទន្ទឹមនេះដែរមូលនិធិ IMF និយាយថា ខ្លួននឹងបញ្ជូនក្រុមមួយទៅទីក្រុងកូឡុំបូ នៅខែក្រោយដើម្បីពិភាក្សាពីការចាប់ផ្តើមជំនួយនេះឡើងវិញ។
IMF បានឲ្យដឹងនៅក្នុងសេចក្តីថ្លែងការណ៍មួយដោយស្រង់សម្តីរបស់ លោកស្រី Lagarde ថា៖ «យើងបានពិភាក្សាពីបញ្ហាបរិយាកាសសេដ្ឋកិច្ចដែលកំពុងប្រឈម និងអាទិភាពគោលនយោបាយសម្រាប់ស្រីលង្កា»។
មូលនិធិនេះបានឲ្យដឹងថា៖ «មូលនិធិ IMF បានត្រៀមខ្លួនរួចរាល់ ដើម្បីគាំទ្រដល់អាជ្ញាធរ ស្រីលង្កាក្នុងកិច្ចខិតខំប្រែងប្រែងទាំងនេះ ហើយក្រុមការងាររបស់ IMF គ្រោងនឹងទស្សនកិច្ចទីក្រុងកូឡុំបូនៅពាក់កណ្តាលខែកុម្ភៈ ដើម្បីបន្តការពិភាក្សាកម្មវិធី»។
លោក Wickremesinghe បានប្រាប់សភាកាលពីសប្តាហ៍មុនថា ការ បណ្តេញរូបលោកចេញពីតំណែងគួរឲ្យរន្ធត់កាលពីថ្ងៃទី ២៦ ខែតុលា នោះ គឺជា «រដ្ឋប្រហារ» និងជា «ការវាយសម្លាប់» សេដ្ឋកិច្ច។ លោកបន្តថា ប្រទេសស្រីលង្កានឹងត្រូវតែសងសំណង ៥,៩ ពាន់លានដុល្លារនៅឆ្នាំនេះ។
មូលនិធិដែលមានមូលដ្ឋាននៅក្នុងទីក្រុងវ៉ាស៊ីនតោននេះ កំពុងជំរុញឲ្យទីក្រុងកូឡុំបូ ដែលកំពុងងើបចេញពីវិបត្តិជញ្ជីងពាណិជ្ជកម្មឲ្យបម្រុងរូបិយប័ណ្ណអន្តរជាតិរបស់ខ្លួន និងធានាឲ្យមានកំណែទម្រង់សេដ្ឋកិច្ច។
កាលពីឆ្នាំមុន IMF បានព្រមានថា ស្រីលង្កាងាយទទួលរងគ្រោះទៅនឹងវិបត្តិពីក្នុងស្រុក និងពីបរទេសហើយបានសង្កត់ធ្ងន់ថា ការរៀបចំរចនាសម្ព័ន្ធឡើងវិញក្នុងក្រុមហ៊ុនអាកាសចរជាតិដែលមិនទទួលបានប្រាក់ចំណេញ និងការធ្វើកំណែទម្រង់វិស័យថាមពល គឺជារឿងចាំបាច់៕ AFP/PS
